Mark 7 - Luaniua New Testament

Nakuaa Keakua ehananiu iluna nakipukipu nakama

¹ NaFarasi ia ma nakama epolopolo nakuaa la eo aꞌe ikaha ma Jerusalem noꞌuku lakou ma Jesus.

² Nakama la eꞌike pela nakama kaukali Jesus la sekaukali nakipukipu lakou imua. Eme pela nakama kaukali la sesolo nalima lakou imakahua imua lakou eꞌai.

³ NaFarasi ia ma na{Jiu} la ekaukali nakipukipu nakipuna lakou imua. Ia kena poi nakama la sesolo nalima lakou, kena nakama la selavaa keꞌai.

⁴ Keualoko nakama la esui naꞌai lakou i ke{makete}, nakama la esolo naꞌai la*f6* imua lakou eꞌai. Ia nakama la ekaukali komaꞌi namakeala lakou imua la hoi. Nakama la esolo na{kapu} ia ma na{ketolo} ia ma na{suspeni} nomakahua.

⁵ Kena naFarasi ia ma nakama epolopolo nakuaa la eme aꞌe Jesus, “Okea nakama kaukali aꞌoe la sekaukali namakeala nakipuna kakou imua laea? Okea nakama la eꞌai naꞌai, ia nalima lakou la eꞌele.”

⁶ Kena iko Jesus ime aꞌe “Okou ekakala uhiuhi. Hea Isaiah nikakaa mai imua nohuli aꞌe nakipukipu okou la ame konu oia. ‘Nakama na emea ma lakou ehamaha i anau, Ia nahakaꞌoko lakou emao haeꞌo ikaha manau.

⁷ Nakama na ehamalumalu i anau Ia lakou hamalumalu vale oia, Maikinimea nakama na epolopolo nakuaa nakama oia.’

⁸ Ia okou ekiaꞌi nakuaa Keakua, kena ihalono namakeala nakama oia.”

⁹ Kena Jesus eme aꞌe nakama la, “Okou sehalono nakuaa Keakua. Emeia okou ekaukali namakeala okou soꞌokou la oia.

¹⁰ Moses eme mai, ‘Hamaha kamana ia ma kina aꞌoe.’ Kama la eme mai hoi, ‘Pena hekama kakala saꞌino kamana ia ma kina aia la, okou ukaa kama la imake.’

¹¹ Ia okou eaoaꞌo aꞌe alakama ikakala aꞌe namakua lakou la ma, ‘Anau eisi namea iau aku olua. Ia ala nimea anau amehoꞌi aꞌe Keakua.’

¹² Saika okou ekakala penei, okou epui kama la isekonaꞌi kamana ma kina aia la.

¹³ Ia kena okou eaoaꞌo nakama hakoa nokiaꞌi nakakala Keakua. Okou eaoaꞌo nakama la nokaukali namakeala nakipuna okou la oia. Ia okou epena komaꞌi haeꞌo namea pela hoi.”

Namea kela emea kekama ihaisala

¹⁴ Jesus eanaa aꞌe keonohenua la ivaꞌai halaoi, kena ime aꞌe, “Okou hakoa ihalono mai anau, ia ailoa laoi nakakala anau nei.

^15-16 Namea kela eo iloko kekama semea kama na ihaisala. Emeia namea kela esopo mai ikaha ma kekama, namena emea kekama ihaisala.”

¹⁷ Jesus uhaele ikaha ma keonohenua la nonoho iloko hale. Kena nakama kaukali aia la evasili aꞌe aia kehakaꞌoko kakala hulihuli la.

¹⁸ Kena iko Jesus ime aꞌe, “Okou seailoa? Naꞌai kekama eꞌai semea kama la ihaisala.

¹⁹ Maikinimea naꞌai okou eꞌai la seo iloko nahakumanava okou. Naꞌai la ekaꞌa iloko keopuu avale. Kena uoki, upesia.” (Kulana Jesus ekakala penei, kama la emea ma naꞌai hakoa ekaualeꞌa keꞌai, sehimesala.)

²⁰ Kena Jesus ekakala hoi ma, “Namea kela esopo iho ikaha ma nakama, namea la emea nakama la ihaisala.

²¹ Nakipukipu saꞌino esopo iho ikaha ma nahakumanava nakama. Kela hea nakama la ehakekele saꞌino, ia epaa huli. Nakama la eailalao, ekaa kama, ia sekino naꞌavana lakou.

²² Nakama la aimake, kena enonoho haeꞌo ma nakama lakou. Nakama la ehailavaꞌa, kena ihai huli. Nakama la emanava sano, kena eveuveꞌu alakama. Nakama la eahu, kena evale haeꞌo.

²³ Nakipukipu saꞌino la hakoa esopo iho ikaha ma kekama, ia ala nimea kela emea kama na ihaisala.”

Jesus ekonaꞌi kehine enoho pouli

²⁴ Jesus ehaele ikaha ma kemakaꞌina la, nokae keꞌina kapili aꞌe Tyre laua ma Sidon. Kena kama la ehaele iloko kehale, ia sehihai ma nikama imakino keꞌina hee aia enoho. Ia niaina Jesus ehasili nohaele iloko hale la, nakama la esee nolave oia.

²⁵ Saika la hehine elono pela Jesus enoho ilaa. Kamaliꞌi hine aia la eisi kipua saꞌino iloko aia. Kena kina kamaliꞌi la uhaele nohamalu imua Jesus.

²⁶ Kehine la hekama enoho pouli, hehine Greek, ehanau mai i Phoenicia iloko Syria. Kehine la eainoa aꞌe Jesus ihaise kipua saꞌino la ikaha ma kamaliꞌi hine aia la.

²⁷ Ia kena Jesus ume aꞌe kehine la, “Anau ame hanai nakamaliꞌi la ipohu imua, maikinimea sekonu pela anau eko naꞌai nakamaliꞌi la iau aꞌe napoi.”*f7*

²⁸ Ia kehine la ume aꞌe, “Ekonu Kealiꞌi. Ia napoi emoe kaꞌele la elavaa keꞌai namanunu kela nakamaliꞌi la seꞌai.”

²⁹ Kena Jesus ume aꞌe, “Hakaꞌoko na ekonu. Haele i hale, kipua saꞌino na ukele ikaha ma kamaliꞌi aꞌoe la.”

³⁰ Ia kena kehine la uvaꞌai i hale, noꞌike kamaliꞌi la ukaualeꞌa, emoe iluna kelomoena aia la. Kipua la ukele ikaha.

Jesus ekalaꞌi naakalina kekama ekuli nolono

³¹ Kena Jesus uhaele ikaha ma kemakaꞌina kapili Tyre, kena ihaele valoko Sidon, nokae kemoana i Galilee, kena ihaele i keꞌina Decapolis.*f8*

³² Nakama kemakaꞌina la ehakaꞌi aꞌe kekama naakalina ekuli ia Jesus, ia kama la ulavaa kekakala hamalie ia. Kena nakama la eainoa aꞌe Jesus ihapili kelima aia iluna kama la ikaualeꞌa.

³³ Ia kena Jesus eko kama la, io ikaha ma keonohenua la, kena ikalo samakalima aia iloko naakalina kama la. Jesus esavale namakalima aia hoi, kena ikaohi kealelo kama la.

³⁴ Jesus uꞌila iluna, iko kemanava aia, kena ime aꞌe kama la i nakakala kemakaꞌina la, “Efatha” (Eme ma, Kalaꞌi.)

³⁵ Saika la, kama la ulono, kealelo aia ukaualeꞌa, kena kama la ukakala konu.

³⁶ Ia Jesus ehamakaꞌu aꞌe nakama la isekakala hea aia epena. Ia niaina Jesus ekauhano aꞌe pela lakou isekakala, nakama la eo nokakala oia.

³⁷ Nakama la hakoa umasalo haeꞌo, kena ikakala solakou, “Namea hakoa kama nei epena nei, ekaualeꞌa. Nakama nakalina lakou ekuli la ulono, ia nakama seailoa kekakala la ukakala.”