Mark 5 - Luaniua New Testament

Jesus ehakui nakipua ikaha

¹ Jesus ia ma nakama kaukali aia la ukae aꞌe kelaa vahi kemoana, i keꞌina nakama Gerasa enoho la.

² Ia saika Jesus nikuu iho ikaha ma kemonoui la, hekama eisi nakipua saꞌino iloko aia uhaele iho ikaha ma keꞌava haku nokili Jesus.

^3-4 Kama la enoho valoko nalua nakaluma la. Imua lo, nakama keꞌina la esaisai nalima ia ma navae kama la i naseni. Ia kama la emosi na{seni} la ikaha. Kena sehikama eivi kekaohi kama la nosaisai kama la hoi.

⁵ Keaho ma kepo, kama la ehahaele valoko naꞌava haku ia ma namouna la. Kama la eapipihi vaalo, ia ekaa kinokama aia soia i nahaku la.

⁶ Kulana kama la niꞌike Jesus oimao, kama la uhaele nokili Jesus, kena ikoukuli nohamalu imua Jesus,

⁷ kena ianaa hamaloa, “Jesus, kama Keakua hananiu. Hea ilakonu kaua? Anau eainoa aku aꞌoe imua namaisu Keakua isemea anau ihalono lihu.”

⁸ Kipua la ekakala penei, maikinimea Jesus ume aꞌe aia, “Kipua saꞌino, o ikaha ma kama na.”

⁹ Jesus evasili aꞌe kama la, “Oai kemale aꞌoe?” Ia kipua la eme aꞌe Jesus, “Anau emale ma ‘Komaꞌi,’ maikinimea makou ekomaꞌi haeꞌo.”

¹⁰ Kipua la eainoa aꞌe Jesus isehakui lakou ikaha ma keꞌina la.

¹¹ Saika la, komaꞌi na{piki} esusuei i kevahi kemouna la nolave naꞌai.

¹² Nakipua saꞌino la eainoa aꞌe Jesus, “Haunalia makou ikau iloko na{piki} la.”

¹³ Kena Jesus ehakana nakipua la io, ia kena nakipua la uo iho ikaha ma kama la nokau iloko na{piki} la. Saika la, kapili lua simaka na{piki} la uhulo ilalo keunuku mokuhua la nomaoha i kemoana, kena na{piki} la umalemo nomake hakoa.

¹⁴ Nakama lolosi na{piki} la uhulo nopaa kelono la i nakama kemakaꞌina la ia ma naꞌina kapili aꞌe. Kena komaꞌi nakama uo nomaka.

¹⁵ Kulana keonohenua la nikae aꞌe Jesus, nakama la eꞌike pela nakipua uo ikaha ma kama la, kena kama la eleleu pamalo, ia hakaꞌoko aia la ukaualeꞌa. Ia kena nakama la umakaꞌu.

¹⁶ Nakama lolosi na{piki} la ekakala aꞌe keonohenua la pela nakipua uo ikaha ma kama la, ia ekakala aꞌe hoi kemake na{piki} la.

¹⁷ Ia kena iko nakama la iainoa aꞌe Jesus ihaele ikaha ma keꞌina lakou la.

¹⁸ Keualoko Jesus niꞌae iluna kemonoui la, kekama nikau lia nakipua la eainoa aꞌe Jesus penei, “Anau hihai ikaukali aꞌoe.”

¹⁹ Ia Jesus sehaakana kama la ikaukali aia. Emeia Jesus eme aꞌe kama la, “Haele i nahaleaina aꞌoe la, nokakala aꞌe nakama la pela Kealiꞌi ealoha aku aꞌoe, kena ikonaꞌi aꞌoe.”

²⁰ Ia kena kama la uhaele nokakala aꞌe nakama Decapolis pela Jesus ekonaꞌi aia. Ia kena nakama ilaa hakoa umasalo haeꞌo.

Kamaliꞌi hine umake ia ma kehine eosooso haeꞌo

²¹ Jesus uꞌae kemonoui la nohaele i kelaa vahi kemoana la. Kulana Jesus nikuu iho ikai, keonohenua la eo aꞌe nomumui aia.

²² Jairus, kekama hamakua hale loku la, uhaele ilaa hoi. Saika Jairus eꞌike Jesus, kama la ukoukuli imua Jesus,

²³ kena iainoa aꞌe Jesus penei, “Kamaliꞌi hine anau la ukapili imake. Hamai nohaapili nalima aꞌoe iluna kamaliꞌi la, iola kamaliꞌi la.”

²⁴ Kena iko Jesus io laua. Ia keonohenua la umumui hakiꞌe koꞌolua la.

²⁵ Kela hehine ehaele valaa hoi. Sanahulu ma lua nahekau, kama la elavea kemahana eosooso haeꞌo.

²⁶ Kehine la ehoꞌi aꞌe naheheaꞌu aia la hakoa nosui aꞌe nakama hamamaliꞌi,*f5* ia kama la oihalono lihu oia. Kemahana aia la seioki, ia umahi lo.

²⁷ Kehine la elono nakipukipu Jesus, ia kena ihaele valoko keonohenua la vamuli Jesus, nohakili naheheaꞌu kama la.

²⁸ Hakaꞌoko kehine la emea penei, “Pena anau ehakili keunuku pamalo kama la, anau amemaakala muli.”

²⁹ Vahola oia, haeꞌo osooso la uhamoku. Ia kena kehine la ulono kemaakala kinokama aia.

³⁰ Ia saika la hoi, Jesus umakino soia pela alamahi aia uo ikaha maia, kena ihakiꞌe aꞌe keonohenua la, nome aꞌe nakama la penei, “Oai kekama ehakili mai pamalo anau nei?”

³¹ Nakama kaukali la emasalo, kena ime aꞌe Jesus ma, “Aꞌoe eꞌike keonohenua nei emumui hakiꞌe aꞌoe. Ia aꞌoe evasili ma oai kekama ehakili aꞌoe naea?”

³² Kena Jesus eꞌila hakaꞌa ma iꞌike aia oai kekama ehakili aꞌe i aia.

³³ Saika la, kehine la umakino pela haeꞌo aia la uhamoku. Ia kena kama la uhaele aꞌe nokoukuli imua Jesus. Kehine la epole kemakaꞌu aia. Ia kama la ehaꞌali aꞌe Jesus kehamaoni keoki kemahana aia.

³⁴ Kena Jesus eme aꞌe kehine la, “Kaukama, aꞌoe ehakina ia anau, ia kena aꞌoe ukaualeꞌa. Haele. Aꞌoe menoho laoi. Kemahana aꞌoe na uoki.”

³⁵ Kulana Jesus ekakala penei, alakama kehale Jairus uo nome aꞌe kama la, “Aꞌoe iseme aꞌe keRabai na ikonaꞌi kamaliꞌi hine aꞌoe la, kamaliꞌi la umake.”

³⁶ Ia Jesus sehakekele hea nakama la ekakala la. Emeia Jesus eme aꞌe Jairus, “Aꞌoe isehakekele, hakina oia.”

³⁷ Jesus sehaakana nikama io maia, ia eko Peter, James, laua ma John kaina James la.

³⁸ Kulana nakama la nikae kehale Jairus la, Jesus eꞌike alakama ehua saꞌa, ia alakama kanikani hamaloa.

³⁹ Kena Jesus eulu i hale la nome aꞌe nakama la, “Okou ekanikani hamaloa naea? Kamaliꞌi hine na semake, kamaliꞌi na emoe oia.”

⁴⁰ Ia nakama la ekakala hasanosano aꞌe Jesus la oia. Ia kena Jesus ehaise nakama la imakaaho, kena iko namakua kamaliꞌi la, ma koukolu nakama kaukali aia la, kena io iloko puikana kamaliꞌi la emoe.

⁴¹ Jesus ekaohi kelima kamaliꞌi la, kena ime aꞌe, “{Talitha Kum}.” (Emea ma, “Kamaliꞌi hine, anau eme aku aꞌoe imasiꞌe iluna.”)

⁴² Vahola oia, kamaliꞌi hine la umasiꞌe iluna nohaele. (Kamaliꞌi hine la ukae sanahulu ma lua nahekau kemakua aia.) Kena nakama la umasalo haeꞌo.

⁴³ Ia Jesus ekakala hamakaꞌu aꞌe nakama la isekakala aꞌe hea lakou eꞌike, ia iau aꞌe niꞌai iꞌai kamaliꞌi la.