Mark 4 - Luaniua New Testament

Kakala hulihuli kekama ekoli nahua

¹ Jesus uvaꞌai imuli noaoaꞌo nakama vakai. Kena komaꞌi nakama uo aꞌe nohalono nakakala kama la. Ia kena Jesus uꞌae iluna kemonoui nonoho ilaa, ia keonohenua la enoho vauka.

² Jesus epolopolo nakama la i nakakala hulihuli, kena iaoaꞌo nakama la penei,

³ “Halono. Kela hekama ehaele laku nahua ma isomo.

⁴ Kulana kama la ehaele laku nahua la, alahua emaoha i keala, ia namanu elee iho noꞌai nahua la.

⁵ Alahua emaoha i keꞌina ehaku. Kaꞌele la epakaꞌe. Kamasaika oia, nahua la usomo, maikinimea kaꞌele la senoko.

⁶ Ia saika kelaa la nisopo aꞌe novela, nahua esomo la umake, maikinimea napakiaꞌa nahua la uselavaa keulu iloko kaꞌele la.

⁷ Alahua emaoha i keꞌina kiale. Kiale la esomo noꞌuhi valuna nahua la, kena nahua la sesomo kaualeꞌa, seisi nahua lakou.

⁸ Alahua emaoha i kaꞌele kaualeꞌa nosomo, kena eisi nahua lakou; alalaꞌau eisi kipukolu nahua, alalaꞌau kipuono, kena alalaꞌau ekae huikalau.”

⁹ Ia kena Jesus eme aꞌe nakama la, “Pena okou hihai ailoa, kena halono mai.”

Hakaꞌoko kela nakakala hulihuli

¹⁰ Kulana Jesus enoho ma nakama kaukali aia la, ia ma alakama hoi, nakama la evasili aꞌe ia Jesus kehakaꞌoko nakakala hulihuli aia la.

¹¹ Kena iko Jesus ime aꞌe nakama la, “Keakua ehuli aku okou nakipukipu kenoholana aia. Ia kulana anau aoaꞌo alakama, Keakua ehuu kehakaꞌoko la iloko nakakala hulihuli la. Ia kena nakakala Keakua nei uhamaoni,

¹² ‘Nakama la eꞌila aꞌe Ia semakino hea lakou eꞌike. Nakama la elono kahi Ia semakino kehakaꞌoko nakakala lakou elono. Aoki lakou amekiꞌe ikaha ma nahaisala lakou, Imea anau ihaialoha lakou.’ ”

Kakala hulihuli kekama ekoli nahua

¹³ Jesus eme aꞌe nakama la, “Okou seailoa kehakaꞌoko nakakala hulihuli nei? Okou meiailoa alakakala hulihuli pehe?

¹⁴ Kekama ekoli nahua la ehau poi hekama kela ehaele kakala nakakala Keakua.

¹⁵ Nahua emaoha i keala ehau poi nakama kela elono nakakala Keakua. Ia kamasaika oia, Satan uhaele aꞌe noko nakakala la ikaha ma nakama la.

¹⁶ Nahua emaoha i keꞌina ehaku ehau poi nakama kela elono nakakala Keakua. Ia saika lakou nilono, nakama la ehakina nakakala la nohihia lo.

¹⁷ Ia nakama la sekaohi mau nakakala la iloko naola lakou. Ia kena nakama la ehihia kamasaika oia. Nakama la ehalono nakakala Keakua la, ia kena alakama ehai haeꞌo kia lakou. Vahola oia, nakama la ukiaꞌi hua hea lakou nilono la.

¹⁸ Nahua esomo i keꞌina kiale la ehau poi nakama kela elono nakakala Keakua.

¹⁹ Ia nakama la ehakekele maha naola lakou i kemaalama nei. Nakama la emanaꞌo nasileni, ia komaꞌi namea hoi. Ia namea la epui nakakala Keakua isehuli aꞌe nakipukipu kaualeꞌa iloko naola lakou.

²⁰ “Nahua emaoha i kaꞌele kaualeꞌa ehau poi nakama kela ehalono nakakala Keakua, kena hihai nakakala la, kena ihuli aꞌe komaꞌi nakipukipu kaualeꞌa iloko naola lakou; alakama kipukolu, alakama kipuono, ia alakama ekae huikalau.”

Keahi ilalo keumeke

²¹ Kena Jesus eme aꞌe nakama la, “Ea, ekau pela hekama eau aꞌe keahi nohakuu ilalo keumeke, ia ihaluu ilalo kelomoena? Seai. Emeia kama la ihakuu keahi la iluna imasina.

²² Namea hakoa kela ehunaa lia meihuli aꞌe. Ia namea kela eꞌuhi meilavea lia oia.

²³ Pena okou hihai iailoa, kena halono mai.”

²⁴ Kena Jesus eme aꞌe nakama la ma, “Hamakonu hea okou elono. Poi okou eau aꞌe namea, kena alamea mevaꞌai aku pela hoi.

²⁵ Poi hekama eko namea Keakua eau aꞌe i aia, kena Keakua mehapaa aꞌe alamea hoi. Ia pena hekama seko namea kela Keakua eau aꞌe i aia la, Keakua meiko namea aia niau aꞌe la ikaha.”

Kakala hulihuli nahua esomo

²⁶ Kena Jesus eme aꞌe nakama la, “Kenoholana Keakua ehau poi hekama haele laku nahua iloko paupaꞌu aia.

²⁷ Kama la ehahaele keao, kena emoe kepo. Ia nahua la esomo solakou oia. Kama la semakino nahua la esomo pehe.

²⁸ Kaꞌele la emea nahua la nosomo. Kelaumea la esula amaka, kena naꞌauke la umakala, ia kena na{uit} la uhua.

²⁹ Kulana nahua la eleu, kama la ekuu na{uit} la ma pulamoa aia noko nahua, maikinimea ukae keualoko nahua la uleu.

Kehua soliꞌi

³⁰ “Kenoholana Keakua ekipu pehe? Kakou meihuli aꞌe kenoholana Keakua i nakakala hulihuli pehe?

³¹ Nakipukipu kenoholana Keakua ehau poi kehua holiliꞌi kela hekama ekoli iloko keeleꞌele la. Kehua la esoliꞌi, ilalo nahua hakoa kemaalama nei.

³² Kulana meikoli, kehua la esomo nolahi iluna napupu hakoa. Kena namanu la epena naohana lakou iloko kemalu nalala elahi kelaꞌau la.”

³³ Kena Jesus eme aꞌe komaꞌi nakakala hulihuli iaoaꞌo keonohenua la nakakala Keakua, ikau ma hea nakama la elavaa keailoa.

³⁴ Jesus eme aꞌe nakama la nakakala hulihuli oia. Ia kulana Jesus enoho ma nakama kaukali aia la solakou, kena kama la ehaꞌali aꞌe nahakaꞌoko nakakala hulihuli la.

Jesus ehamau kemakani

³⁵ Keiahi la, Jesus eme aꞌe nakama kaukali aia la, “Kakou io i kelaa vahi kemoana.”*f4*

³⁶ Ia kena nakama la ekiaꞌi keonohenua la iuka, kena iꞌae iluna kemonoui kela Jesus enoho la nohaele. (Alamonoui ekuu vakai hoi.)

³⁷ Kulana nakama la ekae ilakonu kemoana, nakama la ukilia kemakani maili haimahi. Napeau la uꞌae iluna kemonoui la nokapili ma iapulu.

³⁸ Ia Jesus emoe aluna kakeni imuli kemonoui la. Vahola, nakama kaukali la ehano Jesus, kena ime aꞌe, “Rabai, aꞌoe sehakekele pela kakou memalemo?”

³⁹ Jesus emahulu nohai aꞌe kemakani la, kena ime aꞌe napeau la, “Malino, ukau.” Kena kemakani la ukeiho nomalino.

⁴⁰ Kena Jesus eme aꞌe nakama kaukali aia la, “Aiea okou emakaꞌu naea? Okou sehakina?”

⁴¹ Ia nakama la umakaꞌu haeꞌo, kena ikakala solakou, “Kenei hekama pehe? Kemakani ia ma napeau la ehalono i aia.”