Mark 3 - Luaniua New Testament

Kekama kelima epiꞌo

¹ Jesus uvaꞌai muli i hale loku noꞌike kekama kelima epiꞌo enoho ilaa.

² Alakama ilaa hihai mau kakala hakoa ia Jesus. Ia kena nakama la eꞌilaꞌila hamakonu, aoki Jesus uapaꞌe nokonaꞌi kama la i keaho kapu la.

³ Kena Jesus eme aꞌe kekama kelima epiꞌo la, “Masiꞌe iluna. Kuu imua keonohenua.”

⁴ Kena Jesus eme aꞌe nakama la, “Nakuaa kakou i keaho kapu emea pehe? Ea? Kakou ipena namea kaualeꞌa, ma ipena namea saꞌino? Kakou ekau kekonaꞌi nakama iola, ma ikiaꞌi nakama la imake?” Ia nakama la enoho semuu oia.

⁵ Jesus eꞌila haloko aꞌe i nakama la. Kama la ekipuaina haeꞌo pela nakama la ehakapanaka lo. Kena Jesus eme aꞌe kekama kelima epiꞌo la, “Hola kelima aꞌoe.” Kena iko kama la ihola aꞌe kelima aia nokaualeꞌa.

⁶ Kena naFarasi la uo noꞌuku ma nakama Herod la. Pela lakou mesesee hakaꞌoko ma ikaa Jesus imake.

Keonohenua kaukali Jesus

⁷ Jesus ma nakama kaukali aia la uo ikaha ma hale loku la nokaꞌa ikai. Kena komaꞌi nakama ekakaꞌa ma Jesus hoi. Ala nikama Galilee, Judea,

⁸ Idumea, ia ma nakama namakaꞌina Jerusalem, Tyre, ia ma Sidon. Ia ma nakama kela enoho i kelaa vahi ke{liva} Jordan. Nakama la hakoa ulono pela Jesus ehuli aꞌe namahi aia la. Kela hea nakama la uo aꞌe nomaka Jesus.

⁹ Kena Jesus eme aꞌe nakama kaukali aia la ikanakana hemonoui maia, maikinimea keonohenua la umumui aia.

¹⁰ Kama la uoki kekonaꞌi komaꞌi nakama la nokaualeꞌa, ia kena komaꞌi nakama lavea ehihai ikaohi Jesus imea lakou ikaualeꞌa hoi.

¹¹ Kulana nakaulaiku la eꞌike Jesus, nakama la ehamaoha imua Jesus, kena nakipua saꞌino iloko lakou uanaa hamaloa, “Aꞌoe o kekama Keakua.”

¹² Ia Jesus ehamakaꞌu aꞌe nakipua la pela i sehaꞌali aꞌe oai aia.

Jesus ekini sanahulu ma lua nakama heheaꞌu

¹³ Jesus ehaele i keꞌina namouna la noanaa nakama kela aia ekini la. Kena iko nakama la io aꞌe i aia.

¹⁴ Kena Jesus ehilihili sanahulu ma lua nakama nonoho maia, kena iꞌave nakama la nokaukaꞌu,

¹⁵ ia iau aꞌe namahi i nakama la nohakui nakipua saꞌino la ikaha.

¹⁶ Anei sanahulu ma lua nakama kela Jesus ehilihili la, Simon kela Jesus emale ma Peter,

¹⁷ James laua ma John nakama Zebedee. Jesus esui namale koꞌolua la ma “Boanerges”. (emea ma “nikama hakuli”)

¹⁸ Andrew Philip Bartholomew Matthew Thomas James, kekama Alphaeus Thaddaeus Simon, kekama sehihai pela Rome ilolosi Israel,

¹⁹ Ia Judas Iscariot, kekama meihaꞌali aꞌe Jesus i nakama hamakua la.

Jesus ia ma Baꞌal Zebub

²⁰ Jesus uhaele i hale, ia kena komaꞌi nakama uo aꞌe i hale la hoi. Kena ehainakaa Jesus ma nakama kaukali aia la ikeꞌai.

²¹ Ia kulana kina Jesus ia ma nakaina aia la nilono kelono la, nakama la uo aꞌe ma iko Jesus, maikinimea alakama ekakala ma, “Jesus uvale.”

²² Nakama kela polopolo nakuaa iloko Jerusalem ukae kehale la, kena ime aꞌe, “Baꞌal Zebub*f2* ekau iloko Jesus. Kekuꞌu nakipua la eau aꞌe kama la namahi nohakui nakipua saꞌino la ikaha.”

²³ Jesus eanaa aꞌe nakama la io aꞌe aia, kena ime aꞌe kakala hulihuli nei, “Ea? Satan elavaa kehakui nakipua aia la ikaha? Seai.

²⁴ Amea nakama henua la ehavavaꞌee solakou, nakama la meselavaa kenoho kaualeꞌa.

²⁵ Ia amea haleaina ehavavaꞌee solakou, haleaina la meselavaa kenoho kaualeꞌa hoi.

²⁶ Ia amea nakipua Satan la ehavavaꞌee i naukulana novuhu solakou, namahi Satan la umakea.

²⁷ “Ia pena hekama hihai iulu iloko kehale kekama eivi noailalao; kama na ekau kesaisai kekama eivi la imua, kena uailalao namea iloko kehale kama eivi la.*f3*

²⁸ “Anau eme aku kehamaoni. Niaina ma nakama kemaalama nei la ehaisala haeꞌo, kena ikakala saꞌino Keakua, Keakua elavaa kehaialoha nakama la.

²⁹ Ia poi hekama ekakala saꞌino Keanana Kapu, Keakua mesehaialoha kama la. Maikinimea haisala la emoe naualoko hamau.”

³⁰ Jesus ekakala penei, maikinimea nakama epolopolo nakuaa la ekakala ma, “Kama la eisi kipua saꞌino iloko aia.”

Nakaina ia ma kina Jesus

³¹ Vahola, kina Jesus ia ma nakaina aia la ukae kehale la, kena ihaunalia kekama nome aꞌe Jesus ihaele iho imaka hale.

³² Nakama kela enoho hakiꞌe Jesus la eme aꞌe, “Ila aꞌe, kina aꞌoe la, ia ma nakaina aꞌoe la ekuu i maka hale, maꞌoe ihaele aꞌe.”

³³ Kena iko Jesus ime aꞌe nakama la, “Oai kina anau ma nakaina anau?”

³⁴ Jesus eꞌila hakaꞌa nakama enoho maia la, kena ime aꞌe, “Anei nakina anau ia ma nakaina anau.

³⁵ Poi hekama epena nia Keakua hihai, kena kaina anau, keꞌave anau, ia ma kina anau.”