Mark 2 - Luaniua New Testament

Jesus ekonaꞌi kekama navae emake

¹ Kela heaho, Jesus uvaꞌai i Capernaum. Keonohenua la ulono pela Jesus ukae aꞌe kehale aia ninoho la.

² Ia kena komaꞌi nakama uo aꞌe nonoho iloko hale la. Kena kehale la uꞌapi haeꞌo, ia nakokoꞌa la uꞌapi hoi. Kena iko Jesus ikakala aꞌe nakama la nakakala Keakua.

³ Saika la, koahaa nakama esau aꞌe kekama navae emake ia Jesus.

⁴ Ia koahaa la uselavaa kekae aꞌe keꞌina Jesus enoho la, maikinimea hale la uꞌapi haeꞌo. Kena iko nakama la ihahoku keinaꞌi iluna keꞌina Jesus enoho, kena ihakele iho kemoena kela kama navae emake emoe la.

⁵ Keualoko Jesus niꞌike nakama la, kama la eailoa pela nakama la ehakina i aia, kena ime aꞌe kama navae emake la, “Kaukama, anau esolo nahaisala aꞌoe ikaha.”

⁶ Nakama epolopolo nakuaa la enoho ilaa, kena ihakaꞌoko solakou,

⁷ “Kama nei ekakala pehe? Oai kekama elavaa kesolo nahaisala ikaha? Keakua soia ia. Kama la ekakala poi aia Keakua.”

⁸ Saika la, Jesus eailoa soia nahakaꞌoko nakama la, kena ime aꞌe, “Aiea okou ehakaꞌoko penaa iloko nahakumanava okou naea?

⁹ Okou ehakaꞌoko pela ehainahie i keme aꞌe kama navae emake la, ‘Anau esolo nahaisala aꞌoe la ikaha.’ Ia hainakaa i keme aꞌe kama la, ‘Kuu iluna, ko kemoena aꞌoe la, aꞌoe uhaele.’

¹⁰ Anau ehuli aku okou pela {kama ekipu kama} eisi namahi aia iloko kemaalama nei i kesolo nahaisala ikaha.” Kena Jesus eme aꞌe kekama navae emake la,

¹¹ “Anau eme aku aꞌoe, kuu iluna, ko kemoena aꞌoe na, aꞌoe uhaele i hale aꞌoe la.”

¹² Saika la oia, kama navae emake la ukuu iluna, noko kemoena aia la, ihaele valakonu nakama la hakoa. Kena keonohenua la emasalo haeꞌo, kena ihamaha i Keakua penei, “Kakou sehimea eꞌike penei imua.”

Jesus eanaa aꞌe Levi ikaukali aia

¹³ Jesus evaꞌai imuli ikai, kena komaꞌi nakama uo aꞌe i aia. Kena iko Jesus iaoaꞌo aꞌe nakama la.

¹⁴ Kulana Jesus ehaele vakai, kama la uꞌike Levi, kekama kela Alphaeus, enoho i keꞌina eaoao na{kakisi}. Jesus eme aꞌe kama la, “Kaukali mai anau.” Kena iko Levi imasiꞌe iluna nokaukali Jesus.

¹⁵ Kulana Jesus ma nakama kaukali aia la enoho i kehale Levi noꞌai, komaꞌi nakama aoao na{kakisi} ia ma nakama haisala enoho ilaa hoi. Maikinimea komaꞌi nakama la ekakaꞌa ma Jesus hoi.

¹⁶ Saika la, naFarasi kela epolopolo nakuaa la eꞌike Jesus eꞌai ma nakama haisala ia ma nakama aoao na{kakisi} la. Kena nakama la evasili aꞌe nakama kaukali Jesus la penei, “Aiea kama la eꞌai ma nakama aoao na{kakisi} ia ma nakama haisala laea?”

¹⁷ Ia Jesus elono nakakala naFarasi la, kena ime aꞌe nakama la, “Nakama selavea la meseo nomaka ke{tresa}. Emeia nakama lavea la ehihai io nomaka ke{tresa} la. Anau sehamai noanaa nakama kela ehakaꞌoko pela lakou ekonu kahi. Emeia anau ehamai noanaa nakama kela eailoa pela lakou ehaisala.”

Keaoaꞌo Jesus vahonei

¹⁸ Nakama kaukali John la ia ma naFarasi la ehasese hiꞌai. Kena alakama uo nome aꞌe Jesus, “Aiea nakama kakaꞌa ma John la, lakou ma nakama kakaꞌa ma naFarasi la ehasese hiꞌai, ia nakama kaukali aꞌoe la eꞌai oia?”

¹⁹ Kena iko Jesus ime aꞌe, “Kulana nakama ealu mia i keꞌai keꞌavana la, nakama la ekau kehasese hiꞌai? Seai. Saika kekama hananiu keꞌai keꞌavana la enoho ma lakou, nakama la meꞌai oia.

²⁰ Ia keualoko alakama meiko kama hananiu la ikaha, kena nakama la meihasese hiꞌai.

²¹ “Sehikama amekui kemepamalo vahonei iluna pamalo kuai. Maikinimea kemepamalo la ame masae ikaha, kena keꞌina masae la ulahi.

²² Sehikama euku nahaupu mevale iloko kelo kuai. Maikinimea kulana kealeve la mepia, kealeve la amehaa kelo kuai la nomahaa. Kena kealeve la umanini puamu. Emeia kama la ekau keuku nahaupu iloko kelo vahonei.”

Jesus o Kealiꞌi keaho kapu

²³ I keaho kapu, Jesus ma nakama kaukali aia la ekaꞌa valoko paupaꞌu kela esomo na{uit}. Kena nakama kaukali aia la eko nahua na{uit} la noꞌai.

²⁴ Ia kena naFarasi la eme aꞌe Jesus, “Ila aꞌe. Ame sekonu pela nakama kaukali aꞌoe la eꞌoki nahua la i keaho kapu.”

²⁵ Kena iko Jesus ime aꞌe naFarasi la, “Okou napau avale hea David nipena imua la. Keualoko kama la ma nakama kaukali aia la ekuku haeꞌo, kena hiꞌai,

²⁶ David ehaele i hale kapu, kulana Abiathar o pohoulu hamakua namaakua la. Kena David eꞌai halaoa ekapu la, kena iau aꞌe nahalaoa i nakama kaukali aia la noꞌai hoi. Ia ekapu kekama vale ikeꞌai halaoa la. Namaakua solakou ekau.”*f1*

²⁷ Kena Jesus eme aꞌe naFarasi la, “Keakua ehili keaho kapu ma ihamalolo naonohenua la. Ia Keakua sepena naonohenua la ma ilolosi keaho la oia.

²⁸ Ke{kama ekipu kama} ehamakua iluna keaho kapu la hoi.”