Mark 11 - Luaniua New Testament

Jesus uhaele aꞌe Jerusalem poi hekuꞌu

¹ Kulana Jesus ia ma nakama kaukali aia la usasaika aꞌe i Jerusalem, nakama la ukae namakaꞌina Bethphage laua ma Bethany, kapili aꞌe kemouna kela esomo na{Oliv}. Kena Jesus ehaunalia koꞌolua nakama kaukali aia la imua,

² kena ime aꞌe koꞌolua la, “Olua ikaꞌa i kemakaꞌina la. Keualoko olua mekae ilaa, olua melave ke{kolt} esaisai lia, ia sehikama eꞌae iluna kemanu la nokele. Veke kemanu la, kena uhakaꞌi mai anau.

³ Poi hekama eme aku, ‘Olua eko ke{kolt} na ia?’, olua ume aꞌe kama na pela, ‘Kealiꞌi hihai ke{kolt} nei kamasaika oia, kena kama la mevaꞌai aku kemanu nei.’ ”

⁴ Kena koꞌolua la uo iloko kemakaꞌina la nokili ke{kolt} la esai kapili aꞌe kokoꞌa hale la. Ia kulana koꞌolua la eveke kemanu la,

⁵ alakama kela ekuu valaa ume aꞌe laua, “Hea olua eveke ke{kolt} na?”

⁶ Kena koꞌolua la ume aꞌe hea Jesus nime aꞌe laua la. Kena nakama la uhaakana aꞌe kemanu la koꞌolua la iko.

⁷ Kena koꞌolua la uhakaꞌi aꞌe ke{kolt} la ia Jesus, kena iko napamalo laua la iꞌahu valuna kemanu la. Kena Jesus uꞌae nonoho iluna.

⁸ Komaꞌi haeꞌo nakama eholahola napamalo lakou la valoko keala. Kena alakama ekuu nalauniu napaupaꞌu lakou la noholahola valoko keala hoi.

⁹ Kena alakama nakama la ekaꞌa vamua Jesus, ia alakama eo mai vamuli. Kena keonohenua la hakoa uananaa hamaloa ma, “Hamaha Keakua. Keakua hakapu kama nei kela ehamai kemale Kealiꞌi.

¹⁰ Keakua ihakapu kama nei kela ehamai mo kuꞌu kakou, ehau poi David, kipuna kakou imua. Hamaha Keakua ialuna.”

¹¹ Keualoko Jesus ekae Jerusalem, kama la ehaele i hale kapu noꞌike namea hakoa iloko hale la. Ia saika la ukae keiahi, ia kena Jesus ma sanahulu ma lua nakama kaukali aia la uo i Bethany.

Jesus haise nakama kela esusui iloko hale kapu

¹² Kela aho, Jesus ma nakama kaukali aia la uo ikaha ma Bethany novaꞌai muli i Jerusalem. Kulana nakama la nio, Jesus uhiꞌai.

¹³ Kena kama la uꞌike ke{fig} emao, eisi nalaumea. Ia kena Jesus uhaele nomaka nahua kelaꞌau la, ia kelaꞌau la sehihua, maikinimea seikae keualoko kelaꞌau la meihua.

¹⁴ Kena Jesus ume aꞌe kelaꞌau la, “Sehikama meiꞌai nahua aꞌoe imuli.” Ia nakama kaukali la elono hea Jesus eme aꞌe la.

Jesus uhaele i hale kapu

¹⁵ Keualoko nakama la ukae Jerusalem, Jesus uhaele iloko hale kapu. Kena kama la ehaise nakama kela esusui namea valoko hale kapu la, kena ikuleꞌi na{sevolo} nakama kela ehikihiki nasileni la. Kena kuleꞌi hoi nakuai nakama kela enonoho nosusui nalupe.

¹⁶ Kena Jesus upui pela i selavaa hekama keamo namea valoko hale kapu la.

¹⁷ Kena Jesus upolopolo nakama la ma, “Nakakala Keakua nei emau iloko kelauniu kapu ma, ‘Hale kapu anau nei ehakuu ilokuloku nakama hakoa. Ia okou ehuli sia hale nei ime mo hale nakama ailalao.’ ”

¹⁸ Namaakua hamakua ia ma nakama polopolo nakuaa la ulono hea Jesus eme aꞌe la, kena usee keala ma ikaa kama la imake. Ia nakama la emakaꞌu Jesus, maikinimea keonohenua la umasalo i namahi naaoaꞌo aia la.

¹⁹ Keiahi la, Jesus ma nakama kaukali aia la uo ikaha ma kemakaꞌina la.

Namahi kela kehakina

²⁰ Keualoko kahaka, Jesus ia ma nakama kaukali aia la eo nohalaꞌa kevahi kelaꞌau ke{fig} la. Nakama la uꞌike kelaꞌau la ukuu make hakoa.

²¹ Kena Peter umanaku kelaꞌau la, kena ime aꞌe Jesus, “Rabai, ila aꞌe. Kelaꞌau aꞌoe nihai aꞌe la umake.”

²² Kena iko Jesus ime aꞌe nakama kaukali la, “Hakina Keakua.

²³ Anau eme aku kehamaoni. Poi okou ehakina hamaoni hea okou ekakala, pela namea la meiapihi aku, kena okou elavaa keme aꞌe hemouna imasiꞌe iluna, nohaele nokuu kelokai, kena Keakua meihuli aku kemela.

²⁴ Kulana okou eainoa aꞌe Keakua hea okou hihai, hakina pela okou meiko kemela. Kena Keakua meiau aku ma okou, ehau poi okou eainoa aꞌe i aia.

²⁵ Kulana okou ekuu iluna noloku aꞌe Keakua, ia okou emakino pela okou eloko alakama, okou ihaialoha nakama la imua. Ia kena Kamana okou ialuna mehaialoha okou nia okou esala hoi.

²⁶ Ia pena okou sehaialoha alakama, kena Kamana okou i kevaelani mesehaialoha okou nia okou esala.”

Namahi Jesus

²⁷ Kena Jesus ia ma nakama kaukali aia la uvaꞌai muli i Jerusalem. Ia keualoko Jesus ehaele valoko hale kapu, namaakua hamakua, ia ma nakama epolopolo nakuaa, lakou ma nakama hamakua na{Jiu} la eo aꞌe i aia.

²⁸ Kena nakama la ume aꞌe, “Namahi aꞌoe na, nimahi ai? Oai kekama eau aku namahi na?”

²⁹ Kena iko Jesus ime aꞌe nakama la, “Anau meme aku hevasili hokahi imua. Okou ime mai anau. Ia kena anau meme aku oai kekama eau mai namahi anau nei.

³⁰ Kulana John nihaauꞌau kapu keonohenua la, kela hehaauꞌau kapu ai? Kama la ehuli aku namahi Keakua, ma namahi aia soia? Me mai.”

³¹ Kena nakama la uhakauoki solakou, “Ame kakou eme aꞌe ‘John ehuli mai namahi Keakua’, kena Jesus meme mai ma, ‘Okea okou sehakina nakakala kama la?’

³² Ia ame kakou eme aꞌe Jesus, ‘John ehuli mai namahi aia soia,’ kena kakou imakaꞌu keonohenua la. Maikinimea nakama la ehakaꞌoko pela John ehakae nakakala Keakua hamaoni.”

³³ Kena nakama hamakua la eme aꞌe Jesus, “Makou semakino.” Kena iko Jesus ime aꞌe nakama la, “Kena anau ameseme aku okou oai kekama eau mai namahi anau nei.”