Luke 7 - Luaniua New Testament

Jesus ekonaꞌi kama heheaꞌu

¹ Jesus uoki kekakala haiauna aꞌe keonohenua la, kena kama la uhaele nokae kemakaꞌina Capernaum.

² Kela hekama hamakua napulepule enoho ilaa. Kama hamakua la elaoi hamaoni kama heheaꞌu aia la, ia kama heheaꞌu la elavea haeꞌo, ukapili make.

³ Keualoko kama hamakua la elono nakipukipu Jesus, ko kama la ihaunalia nakama hamakua na{Jiu} la ime aꞌe Jesus ihamai nokonaꞌi kama heheaꞌu aia la.

⁴ Ko nakama la ikaꞌa noainoa aꞌe Jesus, “Hamai nokonaꞌi kama lavea la. Kama hamakua aia la hekama kaualeꞌa.

⁵ Kama hamakua la elaoi makou, kena ihakuu hale loku makou la.”

⁶ Kena iko Jesus io ma nakama la nokapili ikae kehale kama hamakua napulepule la. Ia kama hamakua la ehaunalia nasoa aia la nome aꞌe Jesus, “Kealiꞌi, aꞌoe isehakekele kehamai nokae mai inei. Anau sekau pela aꞌoe ihamai nonoho iloko hale kehale makou nei.

⁷ Ia anau ehakaꞌoko pela anau sekau kehaele aku hoi. Emeia aꞌoe ime mai kakala oia, kena kama heheaꞌu anau la memaakala muli.

⁸ “Anau ehalono nakama hamakua anau la. Ia napulepule anau la ehalono anau. Poi anau eme aꞌe pulepule la ihaele, kama la ehaele. Ia poi anau eme aꞌe kelaa pulepule ihamai, kena kama la ehamai. Ia poi anau eme aꞌe kama heheaꞌu la ipena kemea, kama la ehalono mai anau.”

⁹ Keualoko Jesus elono nakakala nei, kama la umasalo haeꞌo, kena ihakiꞌe nome aꞌe keonohenua la, “Anau eme aku okou. Kama nei ehakina hamaoni Keakua. Anau sehikama elave iloko Israel kela ehakina penei hoi.”

¹⁰ Kena nasoa kama hamakua la uvaꞌai muli i hale, noꞌike kama heheaꞌu la ukaualeꞌa.

Jesus ehaola muli kama emake

¹¹ Kena kela aho, Jesus uhaele kemakaꞌina Nain. Nakama kaukali aia la ia ma keonohenua elahi la ekaꞌa maia hoi.

¹² Keualoko nakama la nikaꞌa nokapili aꞌe kokoꞌa kemakaꞌina la, alakama keꞌina la esau aꞌe kinokama kekama umake. Kama umake la kaukahi kama kela kaukuaha hine keꞌina la. Ia komaꞌi nakama kemakaꞌina la ekaꞌa lakou ma kehine la hoi.

¹³ Ia keualoko Kealiꞌi uꞌike kehine la, kama la ualoha haeꞌo, kena ime aꞌe kehine la, “Aꞌoe isekani.”

¹⁴ Kena iko Jesus ikaohi kemoena kama umake la, kena nakama kela esau kinokama la uhamau. Kena iko Jesus ime aꞌe, “Kaupeala, masiꞌe iluna.”

¹⁵ Ko kama la inoho iluna nokakala. Kena iko Jesus ivaꞌai muli aꞌe kaupeala la i kina aia la.

¹⁶ Nakama la hakoa umasalo, kena i hamaha Keakua, kena ikakala solakou, “Kama hananiu kela ehakae nakakala Keakua la ukae mai. Keakua uhamai nokonaꞌi makou keonohenua aia la.”

¹⁷ Kena kelono Jesus upalalaha iloko Judea ia ma naꞌina kapili aꞌe kemakaꞌina la.

Jesus laua ma John Baptist

¹⁸ Nakama kaukali John Baptist la eme aꞌe John kelono Jesus. Kena iko John ianaa koꞌolua nakama la,

¹⁹ kena ihaunalia koꞌolua la novasili aꞌe Jesus, “Aꞌoe o kekama kela Keakua ehaunalia iho? Poi seai, makou amehakali kelaa kama hoi?”

²⁰ Kena koꞌolua la eo aꞌe Jesus, kena ime aꞌe, “John Baptist ehaunalia mai maua novasili aku, ‘Aꞌoe o kekama kela Keakua ehaunalia mai, ma makou ihakali kelaa kama hoi?’ ”

²¹ Saika la ia, Jesus ekonaꞌi komaꞌi nakama lavea ia ma nakama ehalono lihu namahana, ia ma nakama ekau lia nakipua saꞌino. Kama la ekonaꞌi komaꞌi nakama alemaka seni la noꞌike hoi.

²² Kena iko Jesus ime aꞌe koꞌolua nakama kaukali John la, “Vaꞌai muli nome aku John hea olua eꞌike, ia hea olua elono. Nakama alemaka seni la uꞌike, Nakama navae emake la uhahaele. Nakama elavea kemahana {leprosi} la ukaualeꞌa, Nakama akalina kuli la ulono muli, Nakama emake la umasiꞌe ikaha ma kemake, Ia nakama haaloha la ehalono kelono kaualeꞌa Keakua.

²³ Poi hekama esenapa i nakipukipu anau nei, kena kama na mehakapu lia Keakua.”

²⁴ Kulana nakama kaukali John la uo, ko Jesus ikakala aꞌe keonohenua la nakipukipu John. “Okou ekaꞌa i keꞌina kukuaha la nomaka hekama pehe? Hekama enanaue, ehau poi naveve loloa aninia kemakani? Seai.

²⁵ Okou uo nomaka kekama kela eauꞌahu naauꞌahu kaualeꞌa? Seai hoi. Nakama ekuku laoi la eauꞌahu naauꞌahu esuinakaa, kena inoho i nahale nakuꞌu.

²⁶ Okou ekaꞌa keꞌina la noa? Imaka kekama hakae nakakala Keakua? Ino. Anau eme aku okou pela John elaꞌa iluna nakama hakae nakakala Keakua la hakoa.

²⁷ Nakakala nakipukipu John la emau iloko kelauniu kapu penei, ‘Anau ehaunalia iho kama hakae nakakala anau la imua aꞌoe, nokanakana keala aꞌoe mehaele la.’

²⁸ “Anau eme aku okou. Sehikama kemaalama nei ehananiu iluna John. Ia kekama emoulalo soia iloko kenoholana Keakua mehananiu iluna John.”

²⁹ Keualoko keonohenua la nilono nakakala Jesus, nakama la uhaio hakoa pela Keakua ekonu. Niaina nakama aoao na{kakisi} la ehaio pela hoi. Ala nikama kela John Baptist nihaauꞌau kapu la.

³⁰ Ia naFarasi ma nakama polopolo nakuaa la sehihai Keakua ikonaꞌi lakou. Ala nikama kela John sehaauꞌau kapu la.

³¹ Ko Jesus ime aꞌe, “Nakama kaukama nei ekipu pehe?

³² Nakama la ehau poi nikamaliꞌi kamumu kahi. Nakama la enoho iloko kalaniu nohavava solakou penei, ‘Makou kahao keꞌohe ilue okou. Ia okou sehilue. Makou ehua saꞌa, ma ikani okou, ia okou sekani.’

³³ “John Baptist ehamai hamakapu ma ihasese hiꞌai, ia seunu namevale. Kena okou ekamumu ma, ‘Kama la ekau lia kipua saꞌino.’

³⁴ Ia keualoko ke{kama ekipu kama} uhamai, kama la eꞌai ia eunu. Kena okou ekamumu hoi, ‘Ila aꞌe. Kama la aiꞌai vale, ia unuꞌunu vale. Ia kama la esoa laoi ma nakama aoao na{kakisi}, ia ma nakama haisala.’

³⁵ Ia {Kama ekipu kama} eakamai. Naola nakama kaukali aia la hakoa ehuli aꞌe pela aia ekonu.”

Simon keFarasi

³⁶ Kela hekama naFarasi eme aꞌe Jesus iꞌai maia. Kena Jesus uhaele iloko hale kehale keFarasi la, nonoho noꞌai.

³⁷ Vahola, hehine haisala haeꞌo enoho iloko kemakaꞌina la. Ia kulana kehine la emakino pela Jesus eꞌai iloko hale kehale keFarasi la, kama la uhaele aꞌe, ma kelo*f4* manoni esuinakaa haeꞌo.

³⁸ Kena kehine la uhaele aꞌe nokuu kevahi Jesus nokani kani. Naleimaka aia emaoha iluna nakapuae Jesus. Kena iko kehine la ikoukuli ilalo ihapaupaꞌu nakapuae Jesus keloulu aia, kena ivaisoni nakapuae kama la. Kena iko kelo la noamusi nakapuae Jesus.

³⁹ KeFarasi kela nialu aꞌe Jesus la uꞌike kehine la, kena ekakala soia, “Poi Jesus hekama hakae nakakala Keakua, kama nei ekau kemakino pela kehine kela ekaohi aia la ehaisala.”

⁴⁰ Ko Jesus ime aꞌe keFarasi la, “Simon, anau hihai ikakala aku aꞌoe.” Ko Simon ime aꞌe, “Rabai, me mai hea.”

⁴¹ Ko Jesus ime aꞌe, “Kela hekama hamakua eau aꞌe namoni aia i sakanaka, kekama eko lima huikalau namoni, kelaa kama eko kipulima namoni oia.

⁴² Koꞌolua la sehimoni kesui muli kama hamakua la. Kena iko kama la ihakana koꞌolua la isesui muli namoni aia la. Kama hee iloko koꞌolua la melaoi mahi kama hamakua la?”

⁴³ Ko Simon ime aꞌe, “Anau hakaꞌoko meo kekama amaka. Kama hamakua la ehaialoha kama la isesui muli namoni komaꞌi.” Ko Jesus ime aꞌe Simon, “Kehakaꞌoko aꞌoe la ekonu.”

⁴⁴ Kena iko Jesus ihakiꞌe noꞌike kehine la, kena ime aꞌe Simon, “Aꞌoe eꞌike kehine nei? Keualoko anau nihamai iloko hale kehale aꞌoe nei, aꞌoe seau mai hevai isolo nakapuae anau. Ia kehine nei esolo naleimaka aia iluna nakapuae anau, kena ihapaupaꞌu nakapuae anau keloulu aia.

⁴⁵ Aꞌoe sevaisoni mai anau. Ia keualoko anau ukae mai, kehine nei uꞌamaka novaisoni kahi nakapuae anau.

⁴⁶ Aꞌoe seamusi pohoulu anau kelo, ia kama nei eamusi nakapuae anau kelo manoni.

⁴⁷ Anau eme aku aꞌoe. anau mesolo nahaisala kehine nei hakoa ikaha. Kela hea kama nei elaoi hamaoni anau. Ia poi okou sehihai anau isolo nahaisala okou la hakoa ikaha, kena okou meselaoi hamaoni anau.”

⁴⁸ Kena iko Jesus ime aꞌe kehine la, “Anau esolo nahaisala aꞌoe ikaha.”

⁴⁹ Ia nakama kela enoho ilaa ukakala solakou, “Kenei hekama pehe? Kama nei eme aꞌe pela aia elavaa kesolo nahaisala ikaha.”

⁵⁰ Kena iko Jesus ime aꞌe kehine la, “Anau konaꞌi aꞌoe, maikinimea aꞌoe ehakina. Haele. Aꞌoe menoho laoi.”