Luke 6 - Luaniua New Testament

Jesus o Kealiꞌi keaho kapu

¹ I keaho kapu, Jesus ma nakama kaukali aia la ekaꞌa valoko paupaꞌu kela esomo na{uit}. Nakama kaukali la eꞌoki na{uit} nomulumulu nalima lakou noꞌai nahua la.

² Kena naFarasi la eme aꞌe, “Ame sekonu pela okou iꞌoki nahua la i keaho kapu.”

³ Kena iko Jesus ime aꞌe naFarasi la, “Okou napau avale hea David nipena imua. Kama la ma nakama kaukali aia la uhiꞌai.

⁴ Ia kena David ehaele i hale kapu la noꞌai nahalaoa ekapu, kena iau aꞌe nahalaoa la i nakama kaukali aia la noꞌai hoi. Ia ekapu kekama vale ikeꞌai halaoa la. Namaakua solakou ekau.”*f3*

⁵ Kena iko Jesus ime aꞌe naFarasi la, “{Kama ekipu kama} ehamakua iluna keaho kapu.”

Kekama kelima epiꞌo

⁶ Kela heaho kapu, Jesus ehaele iloko hale loku noaoaꞌo. Kela hekama kelima laua aia epiꞌo la enoho ilaa hoi.

⁷ Nakama polopolo nakuaa lakou ma naFarasi la ilaꞌila hamakonu solakou, aoki Jesus uapaꞌe nokonaꞌi kama la i keaho kapu la, ilavaa nakama la kemau kakala ia Jesus.

⁸ Ia Jesus emakino nahakaꞌoko nakama la, kena ime aꞌe kama kelima epiꞌo la, “Masiꞌe iluna. Hamai nokuu imua keonohenua nei.” Ko kama la imasiꞌe iluna nokuu imua keonohenua la.

⁹ Kena iko Jesus ime aꞌe nakama la, “Anau eme aku okou, ekonu pela kakou ipena namea kaualeꞌa i keaho kapu, ma ipena namea saꞌino? Ekonu pela kakou ikonaꞌi nakama iola ma ikaa nakama la imake?”

¹⁰ Ko Jesus iꞌila hakaꞌa aꞌe nakama la hakoa, kena ime aꞌe kama la, “Hola kelima aꞌoe.” Kena iko kama la ihola aꞌe kelima aia nokaualeꞌa hakoa.

¹¹ Ia kena naFarasi lakou ma nakama polopolo nakuaa la uloko haeꞌo, kena ikakala solakou hea lakou mehai.

Jesus ekini sehui ma lua nakama kaukali aia

¹² Kela heaho, Jesus ehaele nonoho iluna kemouna noloku, kena kama la eloku aꞌe Keakua kepo la hakoa.

¹³ Ia kahaka, kama la uanaa aꞌe nakama kaukali aia la hakoa, kena ikini sehui ma lua nakama. Anei nakama kela Jesus ekini, kena ihaunalia noheheaꞌu maia.

¹⁴ Simon kela Jesus ekapa ma Peter, Andrew, kaina Peter, James John, Philip Bartholomew;

¹⁵ Matthew Thomas, James, kekama Alphaeus Simon, kekama sehihai Rome ilolosi Israel,

¹⁶ Judas, kama James, ia ma Judas Iscariot, kekama ehaꞌali aꞌe Jesus i nakama hamakua la.

Jesus ekonaꞌi nakama lavea

¹⁷ Jesus ma nakama kaukali aia la uo ilalo kemouna nokae keꞌina hanakahi. Komaꞌi nakama ehaꞌuku i keꞌina la; ala nikama keonohenua elahi kela ekakaꞌa ma Jesus, naonohenua Jerusalem laua ma Judea, lakou ma naonohenua namakaꞌina kela ekuu vakai kapili aꞌe Tyre laua ma Sidon.

¹⁸ Nakama la uo aꞌe nolono nakakala Jesus. Ia nakama lavea la ehihai kama la ikonaꞌi lakou ikaualeꞌa. Kena Jesus ekonaꞌi hoi nakama kela eisi nakipua saꞌino iloko lakou.

¹⁹ Nakama la hakoa hamamahi ikaohi Jesus, maikinimea kama la ehuli aꞌe namahi aia ikonaꞌi nakama la hakoa.

Nakama kela hakapu lia Keakua

²⁰ Kena iko Jesus iꞌila aꞌe nakama kaukali aia la, kena ime aꞌe, “Okou nakama haaloha mehakapu lia Keakua, maikinimea kenoholana Keakua heꞌina okou.

²¹ Okou nahiꞌai ana mehakapu lia Keakua, maikinimea naola okou meꞌakoa. Okou nakani ana vahonei mehakapu lia Keakua, maikinimea okou meiꞌaka.

²² “Okou meihakapu lia Keakua. Alakama meililoko okou. Nakama la mehanaꞌino okou, ia mekamoa haeꞌo okou, kena ikakala halihu namale okou, maikinimea okou ekaukali {kama ekipu kama}.

²³ Ia nakipuna lakou la umeme haeꞌo kia nakama hakae nakakala Keakua imua ehau pela hoi. Ia okou ekau kehihia mahi, ilue kehihia okou, maikinimea kuhana elahi okou emoe mai i kevaelani.

²⁴ Ia okou nakama hai heheaꞌu meihalono lihu, maikinimea okou nako avale nakuhana okou.

²⁵ Okou nakama eꞌai kaualeꞌa meihalono lihu. maikinimea okou mehiꞌai haeꞌo. Okou puaꞌa aka alakama meihalono lihu. maikinimea okou mekani nokipuaina.

²⁶ “Niaina keonohenua ekakala hakaualeꞌa okou, okou meihalono lihu. Nakama la nikakala hakaualeꞌa aꞌe nakama hakae nakakala Keakua imua la hoi, kena ihai haeꞌo kia nakama la.

Sevuhu muli

²⁷ “Anau eme aku okou nakama kela ehalono mai anau, ilaoi nakama haihai manava okou. Okou ihakaualeꞌa nakama eliloko okou la.

²⁸ Kakala hakaualeꞌa nakama kela ekamoa haeꞌo okou. Kena loku aꞌe Keakua ikonaꞌi nakama kela ekakala halihu okou.

²⁹ Poi hekama evuhu papaiaha aꞌoe, huli aku kela papaiaha ivuhu kama la hoi. Poi hekama eko keauꞌahu makolu aꞌoe, aꞌoe sehaꞌapi. Kiaꞌi kama la iko keauꞌahu manihi aꞌoe la hoi.

³⁰ Au aꞌe alakama nia nakama la eainoa aku aꞌoe. Poi hekama eko kemea aꞌoe la, aꞌoe seme aꞌe kama na ivaꞌai aku kemela.

³¹ “Konaꞌi alakama, ehau poi okou hihai nakama la ikonaꞌi okou.

³² “Poi okou elaoi nakama kela elaoi okou, ea, okou amekonu i namaisu Keakua? Seai. Nakama haisala elaoi nakama kela elaoi lakou la hoi.

³³ Poi okou ekonaꞌi nakama kela ekonaꞌi okou, ea, okou amekonu i namaisu Keakua? Seai. Nakama haisala emea pela hoi.

³⁴ Poi okou eau aꞌe namea okou la ikonaꞌi alakama, ia hakaꞌoko ma iko muli name la, okou sekonu i namaisu Keakua. Nakama haisala eau aꞌe namea lakou la ikonaꞌi alakama, ia hakaꞌoko ma iko muli name la hoi.

³⁵ “Ia okou ilaoi nakama haihai manava okou la. Konaꞌi nakama la, ia sehakaꞌoko pela iko muli nimea. Kena kuhana okou melahi. Ia okou meme mo kama Keakua ialuna. Keakua ealoha nakama saꞌino ma nakama aimake.

³⁶ Kena okou ialoha alakama, ehau poi Kamana okou la ealoha nakama la.

Sehakonu alakama

³⁷ “Okou isehakonu alakama, kena alakama mesehakonu okou. Okou isehai aꞌe alakama, kena alakama mesehai aku okou. Okou isili hia nahaisala alakama, kena alakama mesili hia nahaisala okou.

³⁸ Hoꞌi aꞌe alakama, kena alakama mehoꞌi aku okou. Kena kehoꞌi okou meko melahi haeꞌo, kela okou meselavaa kekaohi. Poi okou eau aꞌe namea, kena alamea mevaꞌai aku pela hoi.”

³⁹ Ko Jesus ikakala haiauna aꞌe, “Kama alemaka seni selavaa kehakaꞌi kelaa kama alemaka seni. Aoki koꞌolua na memaoha iloko kelua enoko.

⁴⁰ Kama aoaꞌo la elaꞌa iluna ma nakama aia eaoaꞌo la. Keualoko kama kaukali la niaꞌo namea hakoa kama hamakua aia la, kama la meau aꞌe nohau ma kama hamakua la.

⁴¹ “Aꞌoe eꞌike kaꞌele emau keꞌalemaka kaina aꞌoe na, ia seꞌike keunaloko laꞌau epui naꞌalemaka aꞌoe naea?

⁴² Kena aꞌoe sekau keme aꞌe kaina aꞌoe la pela, ‘Kaina, hamai ipisi kaꞌele emau keꞌalemaka aꞌoe na.’ Ia aꞌoe soꞌoe seꞌike keunaloko laꞌau emau keꞌalemaka aꞌoe la. Aꞌoe ekakala uhiuhi oia. Aꞌoe ekau kesau keunaloko laꞌau emau keꞌalemaka aꞌoe na imua. Kena aꞌoe meꞌike laoi nopisi kaꞌele emau keꞌalemaka kaina aꞌoe la.

Nalaꞌau ia ma nahua

⁴³ “Kelaꞌau kaualeꞌa sehua nahua saꞌino. Ia hoi kelaꞌau saꞌino selavaa kehua nahua kaualeꞌa.

⁴⁴ Nahua ehuli mai nakipukipu nalaꞌau. Selavaa hekama keꞌahi nanaku ikaha ma napavuhu. Ia selavaa hekama keui nahui kehala ikaha ma navasa.

⁴⁵ Nakama kaualeꞌa epena namea kaualeꞌa, ikaukali nakipukipu kaualeꞌa nahakumanava lakou la. Ia nakama saꞌino epena namea saꞌino, ikaukali nakipukipu saꞌino naola lakou la. Nakama hakoa ekakala kaukali nakipukipu nahakumanava lakou.

Nakama hakuu nahale

⁴⁶ “Aiea okou eanaa mai anau pela Kealiꞌi, ia okou sepena hea anau eme aku?

⁴⁷ Alakama eo mai. Nakama la elono nakakala anau, kena ipena kaukali nakakala anau nei.

⁴⁸ Nakama la ehau poi hekama kela eꞌeli napou kehale aia la ihakuu iluna hakupaa. Kena hua peau la elohia nopoꞌu hale la. Ia hale la senanaue, maikinimea hale la epena hakaualeꞌa.

⁴⁹ Ia alakama elono nakakala anau, ia sepena kaukali nakakala anau nei. Nakama la ehau poi hekama kela ehakuu hale aia la iluna kaꞌele semau. Saika hua peau uhamai nopoꞌu hale la, kehale la usina ilalo nomaseu hakoa.”