Luke 4 - Luaniua New Testament

Jesus ekaoleole lia Satan

¹ Jesus uhaele ikaha ma keꞌina ke{liva} Jordan. Keualoko la, Keanana Kapu unoho iloko kama la, ihakaꞌi kama la iloko keꞌina kukuaha.

² Jesus enoho ilaa kipuhaa naaho, ikaoleole hia Satan. Ia Jesus sehimea eꞌai, haele nokae kehaoki naaho la. Ia kena kama la ulono kana hiꞌai.

³ Kena Satan eme aꞌe Jesus, “Amea aꞌoe hekama hamaoni Keakua, me aꞌe kehaku nei ihuli mo halaoa.”

⁴ Ia Jesus eme aꞌe, “Nikakaa mai i kelauniu kapu pela, ‘Kekama seme ma eola i keꞌai oia.’ ”

⁵ Kena iko Satan ihakaꞌi Jesus iluna kemouna iꞌike nahenua kemaalama nei hakoa.

⁶ Kena Satan eme aꞌe, “Keakua eau mai namahi, ia ma namea kaualeꞌa hakoa iloko kemaalama nei. Kena anau elavaa keau aꞌe namea la i kekama kela anau hihai la.

⁷ Poi aꞌoe hamalu mai anau, kena anau meau aku namea nei hakoa maꞌoe.”

⁸ Ko Jesus ime aꞌe, “Ekakaa mai pela, ‘Hamaha Keakua mo Aliꞌi aꞌoe, ia heheaꞌu ma kama la soia ia.’ ”

⁹ Kena iko Satan ihakaꞌi Jesus i Jerusalem, nohakuu kama la iluna kauhu mouluna hale kapu, kena ime aꞌe kama la, “Poi aꞌoe hekama hamaoni Keakua, lee ilalo.

¹⁰ Maikinimea nikakaa mai i kelauniu kapu pela, ‘Keakua mehaunalia iho na{enselo} aia la ilolosi aꞌoe,

¹¹ nosapai aꞌoe iluna, isepoꞌu navae aꞌoe nahaku.’ ”

¹² Ia Jesus eme aꞌe, “Eme mai hoi pela, ‘Aꞌoe sekau kehaꞌikeꞌike Kealiꞌi koAkua.’ ”

¹³ Satan uoki nakaoleole la hakoa, kena ihaele ikaha, ihakali keualoko aia ehakaꞌoko kevaꞌai muli.

Jesus aoaꞌo keonohenua

¹⁴ Jesus uvaꞌai muli i Galilee, ma namahi Keanana Kapu. Ia kena kelono Jesus upalalaha i namakaꞌina la hakoa.

¹⁵ Kama la eaoaꞌo iloko nahale loku lakou la. Kena nakama la hakoa ehamaha i aia.

Nakama Nazareth sehihai Jesus

¹⁶ Jesus uhaele i Nazareth, kemakaꞌina aia nimakua mai la. Keaho kapu la, Jesus uhaele iloko hale loku, ehau poi aia nihaele imua la. Kena kama la ekuu imua keonohenua la nopau kelauniu kapu.

¹⁷ Kama lolosi hale loku la eau aꞌe Jesus kelauniu Isaiah, kama hakae nakakala Keakua. Jesus ekalaꞌi kelauniu la nopau nakakala nei,

¹⁸ “Keanana Kapu Keakua enoho manau. Keakua eau mai namahi anau ikaukaꞌu kelono kaualeꞌa i nakama haaloha. Keakua ehaunalia mai anau nome aꞌe naonohenua hakoa pela aia meihasao nakama epono kia; Kena ime aꞌe nakama eseni pela lakou meilavaa keꞌike muli; Kena ihakana nakama haaloha ikaha ma namahi nakama hakanaka;

¹⁹ Kena ime aꞌe pela hekau nei hekau kaualeꞌa Kealiꞌi.”

²⁰ Ko Jesus ipui kelauniu la, kena iau aꞌe muli kama lolosi hale loku la, kena inoho ilalo. Nakama iloko hale loku la hakoa ukoꞌa aꞌe Jesus.

²¹ Ko kama la ime aꞌe nakama la, “Keaho nei, nakakala okou elono la ehuli aku nohamaoni.”

²² Keonohenua la ehamaha Jesus, ia emasalo i nakakala kaualeꞌa aia la. Kena ime aꞌe, “Kenei hekama Joseph. Seai la?”

²³ Ko Jesus ime aꞌe nakama la, “Anau makino. Okou meme mai anau kakala hulihuli nei, ‘{Tresa}, konaꞌi aꞌoe soꞌoe ikaualeꞌa. Makou ulono pela aꞌoe ekonaꞌi nakama elavea iloko Capernaum. Kena konaꞌi nakama lavea iloko kemakaꞌina aꞌoe nei hoi.’ ”

²⁴ Ia Jesus eme aꞌe, “Anau eme aku kehamaoni. Naonohenua hakoa sehihai nakama namakaꞌina lakou kela ehakae nakakala Keakua.

²⁵ “Ia anau eme aku kehamaoni. Elijah ehaꞌapi kevaelani, koukolu koe nahekau, sehiua eloꞌu. Kena keone la ukae aꞌe Israel, keonohenua la uhiꞌai haeꞌo. Vahola, nakaukuaha hine iloko Israel la ekomaꞌi.

²⁶ Ia Keakua ehaunalia Elijah ikonaꞌi kaukuaha hine hokahi oia. Ia kehine la senoho iloko Israel. Kama la enoho i kemakaꞌina Zarephath iloko Sidon.

²⁷ “Kela hekama hakae nakakala Keakua emale ma Elisha. Keualoko kama la enoho iloko Israel, nakama lavea kemahana ke{leprosi} la ekomaꞌi. Ia kama la ekonaꞌi Naaman soia nokaualeꞌa. Ia Naaman senoho iloko Israel. Kama la hekama Syria.”

²⁸ Keualoko nakama iloko hale loku la nilono nakakala nei, nakama la uloko haeꞌo.

²⁹ Nakama la emasiꞌe iluna nohakui Jesus ikaha ma kemakaꞌina la. Kemakaꞌina la ekuu iluna kemouna mouluna. Kena nakama la eko kama la nokuleꞌi kevahi kemouna mouluna la ma ikeiho kama la.

³⁰ Ia Jesus ehaele valoko keonohenua la oia, nohaele ikaha.

Jesus ehaise kipua saꞌino ikaha

³¹ Kena Jesus uhaele i kemakaꞌina Capernaum iloko Galilee. Kena keaho kapu, kama la eꞌamaka noaoaꞌo keonohenua la.

³² Ia nakama la umasalo keaoaꞌo Jesus la, maikinimea kama la eaoaꞌo ma namahi aia.

³³ Vahola, hekama iloko hale loku la eisi kipua saꞌino iloko aia. Kena kama la eanaa aꞌe hamaloa,

³⁴ “Jesus, kekama Nazareth. Hea ilakonu kakou? Aꞌoe ehamai noseu makou? Anau makino i aꞌoe. Aꞌoe o kaukahi ekapu Keakua.”

³⁵ Ko Jesus ihamakaꞌu aꞌe kipua saꞌino la, “Sevaa. O ikaha ma kama na.” Kena iko kipua la ilakua kama la ilalo, kena ikiaꞌi kama la. Ia kama la ukaualeꞌa oia.

³⁶ Keonohenua la hakoa umasalo, kena ikakala solakou, “Kenei heaoaꞌo pehe? Kama nei ekakala aꞌe nakipua la ma namahi aia. Kena nakipua la uo iho ikaha.”

³⁷ Kena kelono Jesus la upalalaha i naꞌina valaa hakoa.

Jesus ekonaꞌi komaꞌi nakama

³⁸ Kena Jesus emasiꞌe nohaele ikaha ma hale loku la, ihaele iloko hale kehale Simon. Ia hinaona hine Simon la elavea kinoꞌo. Kena nakama kehale la eme aꞌe Jesus ikonaꞌi kehine la.

³⁹ Ko Jesus ikuu kevahi kehine la, nokakala aꞌe kemahana la ikiaꞌi kama la. Saika la oia, kehine la umasiꞌe iluna noau aꞌe naꞌai nakama la iꞌai.

⁴⁰ Keualoko kelaa la nisulu, keonohenua la eko aꞌe nakama lavea namahana ia Jesus, ihapili nalima aia iluna nakama la hakoa nokaualeꞌa.

⁴¹ Komaꞌi nakipua saꞌino uo ikaha ma nakama la. Vahola, nakipua la eanaa aꞌe hamaloa ma, “Aꞌoe o kekama Keakua.” Ia Jesus ehamakaꞌu aꞌe nakipua la isekakala, maikinimea nakama la emakino pela aia o keMesaea.

Jesus ekaukaꞌu i Judea

⁴² Ia kahaka kaiao, Jesus uhaele nonoho i keꞌina soia. Kena keonohenua la usee aꞌe, nolave kama la, kena ikaohi kama la isehaele ikaha ma lakou.

⁴³ Ia Jesus eme aꞌe nakama la, “Keakua ehaunalia iho anau ikaukaꞌu kelono kaualeꞌa kenoholana aia i nakama alamakaꞌina hoi.”

⁴⁴ Kena Jesus uhaele nokaukaꞌu iloko nahale loku i Judea.