Luke 24 - Luaniua New Testament

Jesus uola muli

¹ Kahaka po keaho kela kapu, nahine la eko nalo manoni lakou nikanakana la, kena io i kaluma la.

² Nakama la uꞌike kehaku kokoꞌa la nahakaꞌape avale ikaha.

³ Ia keualoko nakama la uo iloko kelua haku la, nakama la useꞌike kinokama Kealiꞌi Jesus,

⁴ kena umasalo haeꞌo. Vahola oia, sakoꞌolua nakama ekuu aꞌe kevahi nakama la. Naauꞌahu koꞌolua la eꞌivaꞌiva poi heꞌemo.

⁵ Kena nahine la umakaꞌu haeꞌo, kena ihamalu ilalo. Ia koꞌolua la eme aꞌe nahine la, “Okou sesee kama eola i keꞌina nakama umake nei ma ia?

⁶ Jesus useai inei. Kama la uola muli. Ea, okou emanaku hea kama la nikakala aku okou i Galilee?

⁷ ‘Kelaa hekama mehaꞌali aꞌe {kama ekipu kama} i nakama haisala. Kena nakama la mekii kama la iluna {kolosi}. Ia kama la meola muli i keaho kanahakolu.’ ”

⁸ Kena nahine la umanaku nakakala Jesus la.

⁹ Vahola, nahine la ukaꞌa ikaha ma keꞌava la, kena io nomaka sehui ma kahi nakama kaukali la, ia ma nakama kela enoho ma lakou. Kena nahine la ehaꞌali aꞌe hea lakou niꞌike la.

¹⁰ Anei namale nahine la; Mary Magdalene, Joanna, ia ma Mary kina James. Ia alahine ekaꞌa ma lakou hoi. Nahine la eme aꞌe nakama heheaꞌu Jesus la hea lakou niꞌike i keꞌina kelua haku la.

¹¹ Ia nakama la sehakina nahine la, ia ihakaꞌoko pela nahine la ekakala havailalao oia.

¹² Ia Peter umasiꞌe iluna nokele i keꞌava haku la, kena ihakiu nomaka napamalo Jesus emoe pela oia. Kena Peter ehaele ikaha, emasalo soia.

Keala i Emmaus

¹³ Keaho la, koꞌolua nakama kela nikaꞌa ma Jesus la uo i kemakaꞌina emale ma Emmaus, kemakaꞌina emao ikaha*f22* ma Jerusalem.

¹⁴ Koꞌolua la ehaele kakala namea hakoa kela nihuli mai la.

¹⁵ Keualoko koꞌolua la ekakala, Jesus soia ehaele aꞌe nokaꞌa ma lakou.

¹⁶ Ia Keakua epui sakoꞌolua la isemakino Jesus.

¹⁷ Ko Jesus ime aꞌe, “Ana nikakala pehe olua ehaele kakala na?” Ia koꞌolua la uhamau, kena iꞌila haaloha aꞌe.

¹⁸ Kena kekama emale ma Cleopas ume aꞌe, “Aꞌoe soꞌoe semakino namea kela uhuli mai vahonei iloko Jerusalem?”

¹⁹ Ko Jesus ime aꞌe koꞌolua la, “Nimea pehe?” Ko koꞌolua la ime aꞌe, “Kelono Jesus i Nazareth. Kama la hekama haimahi kehakae nakakala Keakua, ia ehuli mai namahi aia, ia ihananiu imua namaisu Keakua ia ma keonohenua.

²⁰ Namaakua hamakua lakou ma nakama hananiu makou la eau aꞌe kama la ihakonukonu ikaia imake, nokii kama la iluna {kolosi}.

²¹ “Makou uhakina imua pela kama la amehakana makou na{Jiu} ikaha ma nahaisala makou la. Ia kenei kanahakolu naaho imuli kama la umake la.

²² Kena keaho nei, nahine makou la ekakala mai makou nomasalo haeꞌo. Kahaka nei, nakama la ekaꞌa i kelua haku.

²³ Ia nakama la selave kinokama Jesus. Nahine la uo mai nome mai makou pela ma lakou eꞌike na{enselo}. Ia na{enselo} la eme aꞌe lakou pela Jesus uola muli.

²⁴ Kena alakama keukulana makou uo i kelua haku la hoi. Nakama la elave poi hea nahine la nikakala mai makou la, ia seꞌike Jesus.”

²⁵ Kena iko Jesus ime aꞌe koꞌolua la, “Olua oivale, ia enase kehakina nakakala nakama hakae nakakala Keakua la.

²⁶ Nakama la ekakala aku pela ma keMesaea meihalono lihu, kena ihananiu ialuna.”

²⁷ Ko Jesus iaoaꞌo koꞌolua la nakuaa Moses ia ma nakakala nakama hakae nakakala Keakua, imakino laua nakipukipu aia.

²⁸ Kulana nakama la usasaika aꞌe kemakaꞌina Emmaus, eꞌila pela Jesus sehakaꞌoko maia menoho ilaa.

²⁹ Kena iko koꞌolua la ime aꞌe kama la, “Noho inei. Kemela uhiahi, kapili ipo.” Kena iko Jesus io ma koꞌolua la nonoho ilaa.

³⁰ Keualoko Jesus enoho ma nakama la noꞌai, kama la eko nahalaoa noloku aꞌe Keakua, kena ikohikohi ivavae aꞌe i nakama la.

³¹ Keualoko la, nakama la uꞌila aꞌe nomakino Jesus, ia kama la uhakeꞌi noseai.

³² Ko koꞌolua la ikakala solaua, “Keualoko Jesus niaoaꞌo mai kaua iluna keala la, nohaꞌali mai kaua kehakaꞌoko kelauniu kapu, kaua hihalono haeꞌo.”

³³ Vahola oia, koꞌolua la umasiꞌe iluna nokaꞌa muli i Jerusalem, nolave sehui ma kahi nakama kaukali la ma alakama enoho ma lakou la. Koꞌolua la ehaꞌuku nakama la hakoa,

³⁴ kena ime aꞌe, “Kealiꞌi uola muli hamaoni. Kama la ehakuu aꞌe soia i Simon.”

³⁵ Kena koꞌolua la ekakala aꞌe hea laua eꞌike iluna keala la hoi, ia hea laua emakino Jesus keualoko kama la nikohi halaoa la.

Jesus ehakuu aꞌe soia i nakama kaukali aia la

³⁶ Keualoko koꞌolua la oikakala, Jesus ekuu aꞌe lakonu nakama la, kena ime aꞌe, “Noho laoi okou.”

³⁷ Kena nakama kaukali la eoho nomakaꞌu. Nakama la ehakaꞌoko ma lakou eꞌike kipua.

³⁸ Kena iko Jesus ime aꞌe, “Aiea okou emakaꞌu naea? Okou sehakina oia?

³⁹ Ila mai nalima anau ma navae anau. Kenei anau nei. Apaꞌe mai nohahaa, imakino okou pela anau eola. Kipua sehikinokama penei.”

⁴⁰ Kena Jesus ehuli aꞌe nakama la nalima ma navae aia.

⁴¹ Nakama kaukali la umasalo nohihia haeꞌo, ia ehainakaa kehakina pela kama la eola hamaoni. Kena Jesus ume aꞌe nakama la, “Okou eisi naꞌai?”

⁴² Ko nakama la iau aꞌe keme ponohi emoa.

⁴³ Kena Jesus uko ponohi la noꞌai imua lakou.

⁴⁴ Kena Jesus eme aꞌe, “Keualoko anau ninoho ma okou, anau eme aku penei, ‘Nakuaa Moses, ia ma nakama hakae nakakala Keakua, ia ma nahua keloku la hakoa ehaꞌali aku nakipukipu anau. Nakakala la meihuli aku nohamaoni.’ ”

⁴⁵ Kena iko Jesus iaoaꞌo nakama la nomakino kehakaꞌoko kelauniu kapu.

⁴⁶ Kama la eme aꞌe, “Ekakaa mai pela ma ‘keMesaea mehalono lihu nomake, ia keaho kanahakolu uola muli.’

⁴⁷ Kena nakama kaukali aia la meꞌamaka i Jerusalem nokaukaꞌu aꞌe naonohenua hakoa i kemale aia, pela ikiꞌe ikaha ma nahaisala lakou, imea Keakua ihaialoha aꞌe lakou.

⁴⁸ Okou uꞌike name nei hakoa.

⁴⁹ Halono. Anau meihaunalia aku Keanana Kapu, ehau poi Kamana anau nime aku la. Ia okou inoho i Jerusalem ikae keualoko okou meko namahi ialuna la.”

Jesus uvaꞌai muli kevaelani

⁵⁰ Keualoko Jesus uhakaꞌi nakama kaukali aia la ikaha ma Jerusalem nokapili aꞌe Bethany, kama la usau nalima aia iluna nohakapu nakama la.

⁵¹ Ia kulana kama la oihakapu, kama la uvae ikaha ma nakama la nosau lia iluna kevaelani.

⁵² Kena nakama la ehihia lo, kena ivaꞌai muli Jerusalem,

⁵³ nonoho iloko hale kapu nohamaha kahi Keakua.