Luke 21 - Luaniua New Testament

Kehoꞌi kaukuaha hine haaloha

¹ Keualoko la Jesus uꞌike nakama haimoni epono namoni lakou iloko kepapa hale kapu.

² Ia Jesus uꞌike kaukuaha hine haaloha epono sasileni aia iloko kepapa la hoi.

³ Kena iko Jesus ime aꞌe, “Anau eme aku kehamaoni. Kehoꞌi kehine haaloha la elaꞌa iluna nahoꞌi nakama la hakoa.

⁴ Maikinimea nakama la eau aꞌe namoni lakou ekoe. Ia kehine haaloha la epono namoni haoki aia, sehimoni ekaꞌoko ikonaꞌi aia iola.”

Keseu hale kapu

⁵ Nakama kaukali Jesus la ekakala aꞌe nakipukipu hale kapu la; pela nahaku la elahi, ia nahoꞌi kela keonohenua eau aꞌe ma Keakua la ekaualeꞌa.

⁶ Ko Jesus ime aꞌe, “Okou eꞌike namea kaualeꞌa nei. Imuli, nahaku nei hakoa meimaoha ilalo. Selavaa hehaku emau iluna alahaku.”

Nahalono lihu meikae mai

⁷ Ko nakama kaukali la ivasili aꞌe Jesus, “Rabai. Name nei hakoa meihuli mai vahohee? Makou meiꞌike nahaꞌaku pehe imakino makou pela name nei mehuli mai?”

⁸ Ko Jesus ime aꞌe, “Lolosi hamakonu, iselavaa hekama kehailavaꞌa okou. Komaꞌi nakama meio aku i kemale anau, kena ime aku pela lakou niMesaea. Ia nakama la meme aku hoi pela kehaoki kemaalama nei ukae mai. Ia okou isekaukali nakama la.

⁹ Keualoko okou elono nakaua ia ma nahakaukau, okou isemakaꞌu. Namea nei meiapihi aku imua kehaoki kemaalama nei, ia namea nei sehuli aku kehaoki kemaalama nei la.”

¹⁰ Kena iko Jesus ime aꞌe nakama la, “Naonohenua meivuhu ma alaonohenua. Kenoholana meivuhu ma kelaa noholana.

¹¹ Komaꞌi nahenua meilulu hia kelulu henua haimahi. Ia keone la mekae aꞌe nahenua la, kena naonohenua meimake kehiꞌai ia ma namahana. Namea hamakaꞌu ma nahaꞌaku elahi meihuli mai i kevaelani.

¹² “Ia imua namea nei hakoa ehuli mai, keonohenua la meikaohi okou, nomeme haeꞌo kia okou. Nakama la meihakonu okou iloko nahale loku lakou, kena ipono okou iloko kelokapu. Nakama la meihakaꞌi okou imua nakuꞌu ia ma nakama hamakua {kaumani}, maikinimea okou ekapa kemale anau.

¹³ Vahola, okou meikakala aꞌe nakama la nakipukipu anau.

¹⁴ Ia okou isehakekele hea okou meime aꞌe la.

¹⁵ Okou meme aꞌe nakama la nakakala makonu kela anau meau aku i okou. Ia nakama haihai manava okou la meselavaa kehakauꞌaa ma okou.

¹⁶ “Ia vahola, namaakua okou, nakaina okou, nahaleaina okou, ia ma nasoa okou la meihakaꞌi okou i nakama haihai manava okou la. Kena nakama la meikaa alakama okou nomake.

¹⁷ Nakama hakoa meililoko okou, maikinimea okou ekapa kemale anau.

¹⁸ Ia sehimesala mekae aku okou.

¹⁹ Poi okou ehakina i anau nokae kehaoki, okou meiko keola hamaoni.

Keualoko kehalono lihu

²⁰ “Keualoko okou eꞌike nakama enoho pouli la ekuu hakiꞌe kemakaꞌina Jerusalem novuhu kaua, kena okou meimakino pela kemakaꞌina la meiseua.

²¹ Keualoko la, nakama Judea mehulo i namouna iloko nomuni. Keonohenua iloko Jerusalem mehulo ikaha hoi. Ia nakama kapili aꞌe Jerusalem mesehulo iloko kemakaꞌina la.

²² Nakakala kelauniu kapu ehaꞌali mai pela nahalono lihu la meikae mai.

²³ Nahine haikama ia ma nahine eisi nakamaliꞌi sasapai la mehalono lihu haeꞌo. “Vahola, nakama enoho pouli la meliloko nakama henua nei, kena nakama la meihalono lihu haeꞌo.

²⁴ Nakama enoho pouli la meikalo keonohenua nei napenisi, kena meihakaꞌi alakama keꞌina nei nopono i nahenua lakou emao, kena meiseu kemakaꞌina Jerusalem. Kena nakama enoho pouli la mehananiu saika loloa.

{Kama ekipu kama} meihamai

²⁵ “Nahaꞌaku meihuli mai i kelaa, i kemalama ialuna, ia ma nahekuu. Naonohenua kemaalama nei mekipuaina i kehua peau kemoana.

²⁶ Keakua meilulu kevaelani iseo konu namela naala lakou. Ia kena naonohenua la meioho nomakaꞌu i namahi kela Keakua ehuli mai i kemaalama nei.

²⁷ Vahola, naonohenua meiꞌike {kama ekipu kama} ehamai iluna napuleulehu eꞌiva la i namahi hananiu.

²⁸ Keualoko namea nei ehuli aku, okou isekipuaina. Okou meꞌike kekama mekonaꞌi okou la uhamai.”

²⁹ Kena Jesus eme aꞌe kakala hulihuli nei. “Ila aꞌe kelaꞌau ke{fig} la, ia ma nalaꞌau la hakoa.

³⁰ Keualoko nalaumea lakou la esomo, okou umakino pela keualoko haaua ukapili.

³¹ Kulana okou eꞌike nahaꞌaku nei hakoa ehuli mai, okou umakino pela Keakua ukapili ihamai nohamakua kenoholana aia.

³² “Anau eme aku kehamaoni. Kulana namenei hakoa meapihi aku, alakama kaukama nei meoiola.

³³ Kevaelani ialuna ma kemaalama nei meio nooki, ia nakakala anau selavaa keoki.

Kanakana kahi kehamai Kealiꞌi

³⁴ “Okou ilolosi hamakonu. Aoki okou meapikia nakahao okou. Alakama okou eunu kahi namevale, ia alakama okou ekipuaina haeꞌo naola lakou. Kena keaho hakonukonu la meikae aku okou

³⁵ poi kaiꞌi. Keaho la meikili nakama naꞌina hakoa iloko kemaalama nei.

³⁶ Okou iala kahi. Ia ainoa kahi aꞌe Keakua pela okou isao ikaha ma namea saꞌino kela meiapihi mai la. Pela okou meisenapa kekuu imua {kama ekipu kama}.”

³⁷ Keaho ma keaho, Jesus eaoaꞌo iloko hale kapu. Keualoko keiahi, kama la uhaele nomoe kepo iluna kemouna emale ma na{Oliv}.

³⁸ Ia kahaka, keonohenua la hakoa eo i hale kapu la nohalono kama la.