Luke 20 - Luaniua New Testament

Namahi Jesus

¹ Kela heaho, Jesus eaoaꞌo keonohenua la iloko hale kapu, kena ikaukaꞌu kelono kaualeꞌa. Vahola, namaakua hamakua ia ma nakama polopolo nakuaa, lakou ma nakama hamakua na{Jiu} la eo aꞌe ia Jesus,

² kena ime aꞌe, “Aꞌoe ime mai. Namahi aꞌoe na, nimahi ai? Oai kekama eau aku namahi na?”

³ Ko Jesus ime aꞌe nakama la, “Anau mevasili aku okou hoi.

⁴ Me mai. Kulana John nihaauꞌau kapu keonohenua la, kela hehaauꞌau kapu ai? Kama la ehuli aku namahi Keakua, ma namahi aia soia?”

⁵ Kena nakama la ukakala solakou ma, “Ame kakou eme aꞌe, ‘John ehuli mai namahi Keakua,’ kena Jesus meme mai, ‘Okea okou sehakina nakakala kama la?’

⁶ Ia ame kakou eme aꞌe kama la, ‘John ehuli mai namahi aia soia’, kena keonohenua la hakoa memaꞌa kakou nahaku. Maikinimea nakama la ehakaꞌoko pela John ehakae nakakala Keakua.”

⁷ Kena nakama hamakua la eme aꞌe Jesus pela lakou semakino oai kekama eau aꞌe John namahi la.

⁸ Kena Jesus eme aꞌe nakama la, “Kena anau amesemea aku okou oai kekama eau mai namahi anau nei.”

Kakala hulihuli nakama lolosi paupaꞌu

⁹ Kena iko Jesus ikakala aꞌe keonohenua la kakala hulihuli nei. “Kela hekama ekoli nahua na{grep} iloko paupaꞌu aia, kena iau aꞌe paupaꞌu la nololosi alakama, kena iholau keꞌina emao, nonoho ilaa saika loloa.

¹⁰ “Keualoko nahua nalaꞌau la uleu, kama hamakua paupaꞌu la ehaunalia kama heheaꞌu aia la nomaka nakama lolosi paupaꞌu aia la, pela nakama la meau aꞌe kuhana aia la. Ia keualoko kama heheaꞌu la nikae ilaa, nakama lolosi paupaꞌu la elili kia kama la, kena ihaunalia muli, sehikuhana au aꞌe.

¹¹ “Kena iko kama hamakua la ihaunalia kelaa kama heheaꞌu aia. Ia nakama lolosi paupaꞌu la elili kia kama la hoi, ikaakaa puamu kama la, kena ihaunalia muli, sehimea au aꞌe.

¹² “Ko kama hamakua la ihaunalia kama hakoukolu. Nakama lolosi paupaꞌu la ekaia kama la nomemele haeꞌo, kena ihaise kama la ikaha.

¹³ “Kena iko kama hamakua paupaꞌu la ime aꞌe, ‘Hea anau mepena? Anau mehaunalia kaupeala hokahi anau nei. Anau elaoi kama nei. Ia kena nakama la amehamaha kama nei.’

¹⁴ “Ia keualoko nakama la niꞌike kaupeala la uhaele aꞌe, ko nakama la ikakala solakou ma, ‘Kenei kaupeala kekama hamakua paupaꞌu nei. Kakou ikaa kama nei imake, kena kakou uko paupaꞌu kama nei ma kakou.’

¹⁵ Kena iko nakama lolosi paupaꞌu la ihaise kama la ikaha ma paupaꞌu la, kena ikaa kama la nomake.” Kena Jesus eme aꞌe, “Kama hamakua paupaꞌu la meimea pehe nakama lolosi paupaꞌu la?

¹⁶ Kama la mehamai nokaa nakama la imake, kena iau aꞌe paupaꞌu la ilolosi alakama.” Keonohenua ulono kakala nei, kena ime aꞌe, “Kemena ameseme penaa.”

¹⁷ Ia Jesus eꞌila aꞌe nakama la, kena ime aꞌe, “Kehakaꞌoko nakakala kelauniu kapu la emea maea? ‘Kehaku kela nakama hakuu nahale nihaseseꞌe lia, Kehaku la emau soia kekaohi savahi kokoꞌa kehale la hakoa.’

¹⁸ “Kekama kela ekeiho iluna kehaku la mepoꞌu nomaokiꞌoki naivi aia. Ia poi kehaku la ekeiho iluna kama la, kena kemela mepoꞌu kama la nomaseuseu.”

¹⁹ Saika la, nakama polopolo nakuaa, lakou ma namaakua hamakua la umakino pela Jesus ekakala haiauna aꞌe lakou. Kena nakama la ehaꞌikeꞌike ma ikaohi Jesus. Ia nakama la emakaꞌu keonohenua la.

Kevasili kesui na{Kakisi}

²⁰ Kena nakama hamakua na{Jiu} la ehaunalia alakama ihakikiu, pela ilono laoi hea Jesus ekakala la. Nakama la ehaiꞌahi ma lakou nikama ekonu. Ia seai. Nakama la ehihai ikaohi Jesus, kena iau aꞌe kama la i nakama hananiu {kaumani} Rome.

²¹ Nakama la evasili aꞌe Jesus, “Rabai, makou eailoa pela nakakala aꞌoe ma naaoaꞌo aꞌoe la ekonu. Aꞌoe sehakekele nahakaꞌoko alakama, ia aoaꞌo kehamaoni keala Keakua.

²² Ea, ekonu pela kakou isui ke{kakisi} i kekuꞌu i Rome? Kakou isui aꞌe, ma seai?”

²³ Ia Jesus umakino pela nakama la ehailavaꞌa oia, kena ime aꞌe,

²⁴ “Huli mai sileni la imaka anau. Kenei hemaisu ai, ia kenei hemale ai iluna sileni nei?” Nakama la eme aꞌe, “Kekuꞌu i Rome.”

²⁵ Kena ko Jesus ime aꞌe, “Au aꞌe kekuꞌu la namea kela ekau ma kekuꞌu. Kena au aꞌe Keakua namea kela ekau ma Keakua.”

²⁶ Nakama hamakua la uselavaa kekaiꞌi Jesus imua keonohenua la. Keualoko Jesus esui muli aꞌe navasili lakou la, nakama la emasalo, kena inoho semuu.

Kevasili i keola muli

²⁷ Kena naSatiusi la uo aꞌe novasili aꞌe Jesus. (Nakama la emea ma nakama emake selavaa keola muli.)

²⁸ Nakama la eme aꞌe, “Rabai, Moses ekakaa mai nakuaa nei ma kakou, ‘Poi hekama emake, ia keꞌavana aia la sehikamaliꞌi, kaina aia la meꞌavana kaukuaha la. Kena kehine la amehanau nikamaliꞌi iko kesao keꞌavana aia imua la.’

²⁹ Kela koahiku nahaikaina. Kama makua la uꞌavana nomake, sehikamaliꞌi.

³⁰ Kena kama asoaꞌe la, ia ma kama kanahakolu la uꞌavana nomake pela hoi, sehikamaliꞌi.

³¹ Ia kena haikaina koahiku la hakoa eꞌavana kehine la nomake, sehikamaliꞌi esula.

³² Kena imuli, kehine la umake hoi.

³³ Kulana nakama emake umasiꞌe ikaha ma kemake, kehine la meiꞌavana ai? Koahiku la hakoa eꞌavana kehine la.”

³⁴ Ko Jesus ime aꞌe nakama la, “Nakama kemaalama nei eꞌavana.

^35-36 Ia nakama kela ekau kemasiꞌe ikaha ma kemake ia inoho iloko kemaalama imuli, nakama la ehau poi na{enselo} Keakua. Nakama la meseꞌavana, ia mesemake hoi. Maikinimea nakama la nikamaliꞌi Keakua.

³⁷ “Keualoko Moses uꞌike keahi eula iloko napupu, kama la ehuli mai pela nakama emake meola muli. Kama la ekapa Kealiꞌi ma, ‘Keakua kela Abraham, Keakua kela Isaac, ia Keakua kela Jacob.’

³⁸ Ia semea pela kama la Keakua nakama umake. Emeia kama la Keakua nakama eola kahi, kena iau aꞌe keola i namea hakoa.”

³⁹ Alakama polopolo nakuaa la eme aꞌe “Rabai, nakakala aꞌoe na ekonu.”

⁴⁰ Ia nakama la umakaꞌu kevasili aꞌe Jesus hoi.

Kevasili keMesaea

⁴¹ Kena Jesus evasili aꞌe nakama la, “Aiea alakama eme ma keMesaea o kemopuna kekuꞌu David laea?

⁴² David soia emea iloko kelauniu nahua keloku pela, ‘Keakua eme aꞌe kauAliꞌi, Noho i kevahi laua anau,

⁴³ Nokali anau meikuꞌu nakama eliloko aꞌoe la Ilalo namahi aꞌoe.’

⁴⁴ “David ekapa keMesaea la ma, ‘KauAliꞌi.’ Kama la o Kealiꞌi David, kena keMesaea la elavaa kehanau mai mo haimopuna David pehe?”

Lolosi hamakonu nakama polopolo nakuaa

⁴⁵ Keualoko keonohenua la hakoa nihalono aꞌe Jesus, kama la ekakala aꞌe nakama kaukali aia la,

⁴⁶ “Lolosi hamakonu nakama polopolo nakuaa. Nakama la hihai hahao naauꞌahu loloa kaualeꞌa, ihamaha lia lakou valoko namakaꞌina. Nakama la ehihai inoho ma nakama hamakua iloko nahale loku ia ma naꞌailana.

⁴⁷ Ia nakama la eko naloku loloa ihamaha lia lakou keonohenua. Ia nakama la ehailavaꞌa noko naheheaꞌu nakaukuaha hine la. Ia kena nahalono lihu nakama la meilahi haeꞌo.”