Luke 2 - Luaniua New Testament

Kehanau iho Jesus

¹ Keualoko la, kela hekama emale ma Augustus o kekuꞌu hananiu i Rome. Kama la ehaunalia nakama heheaꞌu aia la ihamau namale naonohenua aia la hakoa iloko nalauniu {kaumani}, imakino aia keꞌoina nakama hakoa.

² Nakama la ekakaa nalauniu la, keualoko Quirinius nihamakua iloko Syria.

³ Ia kena nakama hakoa ekaꞌa i namakaꞌina lakou nihanau la, nohamau namale lakou.

⁴ Kena iko Joseph ihaele ikaha ma Nazareth, kemakaꞌina iloko Galilee, nohaele kemakaꞌina Bethlehem iloko Judea, kemakaꞌina kela David. Maikinimea kama la emamaoha iho i keꞌaha David.

⁵ Joseph laua ma Mary uhanoa iꞌavana, kena koꞌolua la uo nohamau namale laua. Mary uhaikama,

⁶ ia kena keualoko koꞌolua la ninoho i Bethlehem, Mary emamaoha,

⁷ kena ihanau kelipou kanaka amaka aia. Mary eꞌahu kamaliꞌi la napamalo, kena ihamoe kamaliꞌi la iloko kama hale namanu*f1* laua enoho la, maikinimea nahale iloko kemakaꞌina la hakoa uꞌapi.

Nakama lolosi na{sipisipi} elono pela Jesus uhanau iho

⁸ Kepo la, alakama enoho iloko napaupaꞌu kapili aꞌe Bethlehem nololosi na{sipisipi} lakou.

⁹ Keualoko la, ke{enselo} Keakua ukuu aꞌe imua nakama la, kena namahi Keakua umasina iluna nakama la. Ia kena nakama la umakaꞌu haeꞌo.

¹⁰ Ko ke{enselo} la ime aꞌe nakama la, “Okou isemakaꞌu, maikinimea anau ehamai nokakala aku kelono kaualeꞌa. Nakama hakoa kela elono nakakala nei meihihia lo.

¹¹ Keaho nei, Kealiꞌi okou la uhanau iho iloko Bethlehem, kemakaꞌina David. Kama la o keMesaea, kama kela meikonaꞌi okou.

¹² Ia okou meilave kememea la emoe iloko kama hale namanu, eꞌahu napamalo.”

¹³ Vahola oia, komaꞌi na{enselo} kevaelani usuꞌui aꞌe ma ke{enselo} la nohamaha Keakua penei,

¹⁴ “Makou ehamaha i aꞌoe Keakua i kevaelani. Nakama kela aꞌoe hihai i kemaalama nei la meinoho laoi.”

¹⁵ Kena iko na{enselo} la ikiaꞌi nakama lolosi namanu la, kena ivaꞌai muli i kevaelani. Ko nakama la ikakala solakou ma, “Kakou ikaꞌa Bethlehem nomaka kememea kela Keakua nikakala mai kakou la.”

¹⁶ Kena iko nakama la ihakekele nokaꞌa ma iꞌike Mary laua ma Joseph, ma kememea kela emoe iloko kama hale namanu la.

¹⁷ Ia keualoko nakama la niꞌike kememea la, nakama la uhaele kakala aꞌe nakama iloko kemakaꞌina la hea na{enselo} la nikakala aꞌe nakipukipu kememea la.

¹⁸ Ia kulana nakama kemakaꞌina la nilono nakakala nakama lolosi namanu la, nakama la hakoa umasalo.

¹⁹ Ia Mary eꞌumi semuu nakakala la iloko hakumanava aia.

²⁰ Kena iko nakama lolosi namanu la ivaꞌai keꞌina lakou la, kena ihamaha Keakua, maikinimea lakou eꞌike, ia elono namea kela ke{enselo} la nime aꞌe lakou.

²¹ Keualoko kememea la ukae evalu naaho kemakua aia, nakama hamakua la eo aꞌe nohamakino kapukapu kamaliꞌi la. Kena namakua kamaliꞌi la esui kemale kama la Jesus. Kela kemale ke{enselo} la nime aꞌe a Mary, imua kaupu la nihaikama.

Joseph laua ma Mary eau aꞌe Jesus iloko hale kapu imaka Keakua

²² Keualoko la, Mary laua ma Joseph uo i Jerusalem nohoꞌi aꞌe namanu imea Mary imakahua i kevahi nakuaa Moses. Kena koꞌolua la uko Jesus hoi nokaꞌa ma laua i hale kapu, iau aꞌe kememea la imaka Kealiꞌi,

²³ ihalono nakakala kela emau iloko nakuaa Keakua, “Keualoko kelipou kanaka ehanau iho, kamaliꞌi na ekapu i namaisu Keakua.”

²⁴ Kena Mary laua ma Joseph eau aꞌe nahoꞌi laua ikaukali nakuaa Keakua, “Hoꞌi aꞌe sapunua lupe ma sapunua leꞌia.”

Simeon eꞌike Jesus

²⁵ Kela hekama emale ma Simeon enoho i Jerusalem. Kama la ekonu kahi, ia hekama ehakina keloku. Kena Keanana Kapu enoho ma kama la. Kama la ehakina pela Keakua meiau iho kekama ikonaꞌi nakama Israel.

²⁶ Keanana Kapu la eme aꞌe Simeon pela Simeon meiꞌike keMesaea la, imua aia meimake.

²⁷ Kena Keanana Kapu la uhakaꞌi Simeon iloko hale kapu. Kena Mary laua ma Joseph uko aꞌe Jesus iloko hale kapu la, iau aꞌe kama la imaka Keakua, ikaukali nakuaa lakou imua.

²⁸ Kena iko Simeon iapaꞌe nosau kamaliꞌi la, kena ihamaha Keakua penei, Nunc Dimittis

Nunc Dimittis

²⁹ “Keakua, anau heheaꞌu maꞌoe. Ia vahonei aꞌoe esui kesao anau, poi aꞌoe nikakala mai imua, Ia anau selavaa kehakekele,

³⁰ Maikinimea anau uꞌike kama nei kela aꞌoe ehaunalia iho ikonaꞌi makou.

³¹ Aꞌoe nakanakana mai avale kama nei imua namaisu naonohenua hakoa.

³² Kama nei ehau poi heahi, kela ekonaꞌi nakama enoho pouli imakino nakipukipu aꞌoe. Kena ehamaha keonohenua aꞌoe, nakama Israel.”

³³ Joseph laua ma Mary umasalo haeꞌo hea Simeon ekakala ia Jesus.

³⁴ Kena iko Simeon ihakapu haimakua la, kena ime aꞌe ia Mary, “Komaꞌi nakama Israel meihalono lihu, maikinimea lakou ehakina kamaliꞌi na. Ia nakama la meimasiꞌe iluna ikaha ma kemake. Ia alakama meime aꞌe pela Keakua seau iho kamaliꞌi na.

³⁵ Kamaliꞌi na meihaꞌali aꞌe nahakaꞌoko nakama la. Ia aꞌoe meihalono lihu koaloha, ehau poi keiꞌai ekalo iloko hakumanava aꞌoe.”

Anna eꞌike Jesus

³⁶ Kela hehine umakua lo emale ma Anna enoho iloko hale kapu la, hekama iloko kemanava Phanuel, iloko haleaina Asher. Ia kehine la ehakae nakakala Keakua iloko kehale kapu la. Imua lo, kehine la enoho ma keꞌavana aia la nokae kauhiku nahekau,

³⁷ kena keꞌavana aia la umake. Kena kehine la unoho kaukuaha nokae kipuvalu ma haa nahekau kemakua aia. Keaho ma kepo, Anna enoho iloko hale kapu la iheheaꞌu ma Keakua, sehaele imaka hale. Kama la eloku kahi, ia hasese hiꞌai.

³⁸ Saika la, Anna ekuu imua keonohenua la nohamaha Keakua. Nakama la hakoa uhakina pela Keakua meikonaꞌi nakama i Jerusalem. Kena iko Anna ihaꞌali aꞌe nakama la nakipukipu Jesus.

Joseph laua ma Mary uvaꞌai muli kemakaꞌina lakou

³⁹ Joseph laua ma Mary uoki kepena namea hakoa kela Keakua nikakala iho iloko nakuaa aia la, kena uvaꞌai muli i Nazareth, kemakaꞌina laua iloko Galilee.

⁴⁰ Kamaliꞌi la usomo nomakua, kena uakamai, maikinimea Keakua elolosi hakaualeꞌa aia.

Jesus iloko hale kapu

⁴¹ Hekau ma hekau, namakua Jesus ekaꞌa Jerusalem noꞌai keꞌai kePasova.

⁴² Keualoko Jesus ukae sehui ma lua nahekau kemakua aia, kama la elavaa kekaꞌa lakou ma namakua aia la, ikau ma nakipukipu keꞌai kePasova la.

⁴³ Keꞌai la uoki, namakua Jesus la uvaꞌai muli kemakaꞌina lakou la, ia semakino pela kama la oinoho i Jerusalem.

⁴⁴ Emeia koꞌolua la ehakaꞌoko ma Jesus eo ma lakou, kena iholau keaho la hakoa. Kena keiahi la, koꞌolua la uo nomaka nahaleaina lakou ma nasoa lakou la nosee kama la,

⁴⁵ ia selave. Kena iko koꞌolua la ivaꞌai muli nosee kama la iloko Jerusalem.

⁴⁶ Kena imuli ekolu naaho, koꞌolua la ulave Jesus iloko hale kapu la, enoho ma naRabai la.*f2* Kama la ehalono nakakala nakama hamakua la, kena ivasisili aꞌe nakama la hoi.

⁴⁷ Ia keualoko nakama la elono kamaliꞌi la esui aꞌe navasili lakou la, nakama la umasalo haeꞌo.

⁴⁸ Ia keualoko namakua Jesus la uꞌike kama la, koꞌolua la umasalo hoi. Kena kina aia la ume aꞌe, “Aꞌoe emea pehe? Maua enanae haeꞌo kesesee aꞌoe.”

⁴⁹ Ia Jesus eme aꞌe, “Olua sekau kesesee anau. Olua namakino avale pela anau amenoho iloko kehale kamana anau nei.”

⁵⁰ Ia koꞌolua la semakino hea kama la eme aꞌe la.

⁵¹ Kena iko Jesus ivaꞌai muli ma namakua aia la i Nazareth, ia ehalono koꞌolua la. Kina aia la eꞌumi semuu nakakala kamaliꞌi la iloko hakumanava aia.

⁵² Kena Jesus emakua vave, kena eakamai hoi. Keakua ehihai nakipukipu kamaliꞌi la, ehau poi keonohenua la hakoa.