John 8 - Luaniua New Testament

Kehine epaa laua ma kanaka haiꞌavana

¹ Jesus uhaele i kemouna kela esomo na{Oliv} la nomoe kepo la.

² Kena keualoko keaka, kama la evaꞌai muli hale kapu. Kena keonohenua la hakoa eo aꞌe ia Jesus, kena iko kama la inoho ilalo noaoaꞌo nakama la.

³ Nakama polopolo nakuaa lakou ma naFarasi la ehakaꞌi aꞌe kehine. Nakama la elave kehine la epaa laua ma kanaka haiꞌavana. Nakama la hakuu aꞌe kehine la imua keonohenua la,

⁴ kena ime aꞌe Jesus la, “Rabai. Makou elave kehine nei epaa laua ma kanaka haiꞌavana la.

⁵ Nakuaa Moses emea pela ma makou imaꞌa nahaku ikaa nahine penei la imake. Ia kehakaꞌoko aꞌoe eme pehe?”

⁶ Nakama la ekaiꞌi Jesus maikinimea lakou hihai ihai aꞌe kama la. Ko Jesus isulu ilalo nokakaa iluna kaꞌele ma kemakalima aia.

⁷ Ia nakama la ekauhano kevasili aꞌe Jesus. Kena iko kama la imasiꞌe iluna nome aꞌe, “Poi hekama okou ekonu kahi, kama na ekau keꞌamaka nokaua kia kehine nei.”

⁸ Kena iko Jesus isulu ilalo hoi nokakaa iluna kaꞌele la.

⁹ Nakama kela elono nakakala Jesus la uꞌamaka nohaele kama kakahi ikaha. Nakama makua ekaꞌa imua, kena alakama ekaꞌa vamuli. Kena Jesus ukoe soia ilaa, ma kehine la ekuu imua aia.

¹⁰ Ko Jesus imasiꞌe iluna hoi novasili aꞌe kehine la, “Kehe nakama na? Ea? Sehikama enoho nohai aku aꞌoe?”

¹¹ Ko kehine la ime aꞌe, “Seai Kealiꞌi.” Kena ko Jesus ime aꞌe, “Anau hoi mesehai aku aꞌoe. Haele aku. Ia aꞌoe isepena namesala hoi.”

Kemasina kemaalama nei

¹² Kena Jesus ekakala aꞌe keonohenua la, “Anau ehamasina nakama kemaalama nei. Nakama kaukali anau la meiseo ma kepouli. Ia keahi keola hamaoni mehamasina iluna nakama la.”

¹³ Kena iko naFarasi la ime aꞌe Jesus, “Aꞌoe ekakala kevahi aꞌoe soꞌoe. Ia kena nakakala aꞌoe na esehamaoni.”

¹⁴ Ko Jesus ime aꞌe, “Niaina anau ekakala kevahi anau sonau, nakakala anau nei ehamaoni avale. Anau emakino keꞌina anau ehamai la. Ia anau emakino hoi keꞌina anau mehaele la. Ia okou semakino keꞌina anau ehamai la ma keꞌina anau mehaele la.

¹⁵ Okou ehai mai anau kaukali nahakaꞌoko nakama oia. Ia anau sehamai nohai aꞌe alakama.

¹⁶ Ia niaina anau elaulahu alakama, kehakaꞌoko anau la ehamaoni. Maikinimea anau sekuu sonau. Anau ekuu maua ma Kamana kela nihaunalia mai anau la.

¹⁷ Nakuaa okou eme pela, ‘poi koꞌolua nakama ekakala hanakahi, kena okou emakino pela nakakala laua la ehamaoni.’

¹⁸ Anau ehaꞌali aku nakipukipu anau. Ia Kamana anau la nihaunalia iho anau, kena ihaꞌali aku nakipukipu anau la hoi.”

¹⁹ Ko nakama la ivasili aꞌe Jesus, “Kehe Kamana aꞌoe na?” Ko Jesus ime aꞌe, “Okou semakino anau ma Kamana anau. Koaꞌe okou imakino anau, kena okou amemakino Kamana anau la hoi.”

²⁰ Jesus eaoaꞌo aꞌe keonohenua la nakakala nei iloko hale kapu, kapili aꞌe keꞌina kela nakama la ehoꞌi aꞌe namoni lakou la. Ia sehikama ekaohi kama la, maikinimea seikae keualoko lakou meikaa kama la imake.

Okou selavaa keo i keꞌina anau mehaele la

²¹ Jesus ekakala aꞌe nakama hamakua na{Jiu} la hoi, “Anau meihaele ikaha. Okou meisesee anau, ia okou selavaa keo i keꞌina anau mehaele la. Okou ekauhano kepena namea esala, kela hea okou memake.”

²² Kena iko nakama la ime aꞌe, “Kama la emea pela ma kakou selavaa kekaꞌa i keꞌina aia mehaele la. Ea? Kakala nei emea pela kama la meikuu keola aia soia?”

²³ Ko Jesus ime aꞌe, “Okou nikama kemaalama ilalo nei. Ia anau ehamai keꞌina iluna la, ia seai kemaalama nei.

²⁴ Ia kena anau eme aku okou pela okou ekauhano kepena namea esala, kela hea okou memake. Ia poi okou sehakina pela, {Kenei anau}, kena okou mekauhano kepena namea esala, kena okou memake oia.”

²⁵ Kena iko nakama hamakua la ivasili aꞌe Jesus, “Oai aꞌoe?” Ko Jesus ime aꞌe, “Anau ame kakala aku okou pehe?

²⁶ Anau amelavaa keme aku okou komaꞌi nakakala ihakonukonu okou. Ia anau ehalono nakakala hamaoni kekama kela ehaunalia mai anau la. Kena anau meme aku okou nakakala aia la.”

²⁷ Ia nakama la semakino pela Jesus ekakala aꞌe lakou nakipukipu Kamana.

²⁸ Kena iko Jesus ime aꞌe nakama la, “Keualoko okou esau {kama ekipu kama} iluna, okou meimakino pela, {Kenei anau}. Kena okou meimakino pela anau sekaukali kehakaꞌoko anau sonau. Ia anau ekakala hea Kamana eaoaꞌo mai anau la ikakala.

²⁹ Ia kekama kela ehaunalia mai anau la ekakaꞌa kahi manau. Kama la sekiaꞌi anau, maikinimea anau epena konu hea kama la hihai.”

³⁰ Komaꞌi nakama keonohenua la elono nakakala Jesus, kena ehakina i kama la.

Nakama ekana ma nakama eapikia

³¹ Kena iko Jesus ime aꞌe na{Jiu} kela ehakina i aia la, “Poi okou ekaohi mau naaoaꞌo anau nei, kena okou ekaukali hamaoni anau.

³² Kena okou meimakino laoi kehamaoni, ia kehamaoni la meihakana okou.”

³³ Ko nakama la ime aꞌe, “Makou emamaoha iho keꞌaha Abraham, ia kena makou selepokia alakama. Ia aꞌoe eme mai pela makou meikana pehe?”

³⁴ Ko Jesus ime aꞌe nakama la, “Anau eme aku okou kehamaoni. Poi hekama epena namesala, kama na elepokia nahaisala la.

³⁵ Kekama heheaꞌu kehale eme pela hoi. Kama la eapikia kahi naheheaꞌu aia la, ia amenoho iloko hale la kamasaika oia. Ia kamaliꞌi hamaoni kehale la ekana ikeseheheaꞌu kahi, ia ekau kenoho ma haleaina aia la naualoko hamau.

³⁶ Poi kama Keakua la ehakana okou, kena okou mekana hamaoni.

³⁷ “Anau emakino pela okou nimopuna Abraham, ia okou sehalono nakakala anau. Kela hea okou ehaꞌikeꞌike ma ikaa anau imake.

³⁸ Anau eꞌike hea Kamana anau la ehuli mai anau, ia kena ime aku okou namela. Ia okou epena hea kamana okou la ekakala aku okou ipena.”

³⁹ Ko na{Jiu} la ime aꞌe Jesus, “Kamana makou la Abraham.” Ko Jesus ime aꞌe, “Poi okou nimopuna hamaoni Abraham, okou amepena namea ekonu kela kama la nipena la.

⁴⁰ Anau ekakala aku okou kehamaoni nia Keakua eme mai anau. Ia okou ehaꞌikeꞌike ma ikaa anau imake. Ia Abraham sepena penaa.

⁴¹ Okou epena hea kamana okou la epena.” Ko nakama la ime aꞌe “Makou nikamaliꞌi Keakua avale, ia seai nikama po.”

⁴² Ko Jesus ime aꞌe na{Jiu} la, “Poi okou nikamaliꞌi hamaoni Keakua, kena okou ame laoi anau. Maikinimea anau ehamai i Keakua. Anau sehamai sonau. Kama la ehaunalia mai anau.

⁴³ Okou semakino laoi kehakaꞌoko nakakala anau, maikinimea okou selavaa kehalono nakakala anau.

⁴⁴ Okou nikamaliꞌi, ia kamana okou la Satan. Kela hea okou hihai ikaukali nahakaꞌoko kama la. Amaka mai imua lo, kama la hekama kaa kama, ia sekaukali nakipukipu hamaoni, mai kama la esehamaoni. Keualoko kama la enuku laoi, kama la ekakala nakakala aia soia. Maikinimea kama la enuku laoi kahi. Kama la o kamana nakama nukulaoi hakoa.

⁴⁵ Ia anau ekakala aku kehamaoni, kela hea okou esehakina nakakala anau.

⁴⁶ Oai kekama okou amehai mai pela manau esala? Anau eme aku kehamaoni. Aiea okou sehakina nakakala anau naea?

⁴⁷ Kekama Keakua ehalono nakakala Keakua. Ia okou seinikamaliꞌi Keakua. Kela hea okou sehihai ihalono nakakala aia la.”

Jesus laua ma Abraham

⁴⁸ Kena na{Jiu} la eme aꞌe Jesus, “Makou eme aku aꞌoe pela aꞌoe hekama Samaria, ia eisi kipua saꞌino ekau iloko aꞌoe.”

⁴⁹ Ko Jesus ime aꞌe. “Nakipua saꞌino sekau iloko anau. Anau ehamaha Kamana anau la, ia okou sehamaha i anau.

⁵⁰ Anau sehihai pela okou ihamalu mai anau. Ia kelaa kama ehihai okou ihamalumalu i aia. Kela kekama meihakonukonu okou.

⁵¹ Anau eme aku okou kehamaoni. Poi hekama ekaukali nakakala anau, kama na meiselavaa kemake.”

⁵² Ko na{Jiu} la ime aꞌe Jesus, “Vahonei makou umakino pela aꞌoe eisi kipua saꞌino! Abraham umake, ia nakama kela hakae nakakala Keakua la umake hoi. Ia aꞌoe eme mai pela nakama kela ehalono nakakala aꞌoe la meiselavaa kemake.

⁵³ Aꞌoe sehamakua iluna Abraham, kipuna makou la. Kama la umake. Ia nakama kela nihakae nakakala Keakua imua la umake hoi. Aꞌoe ehakaꞌoko maꞌoe oai?”

⁵⁴ Ko Jesus ime aꞌe, “Poi anau ehamaha i anau sonau, kena anau ehamaha vale oia. Keakua okou la o Kamana anau. Kama la soia ehamaha i anau.

⁵⁵ Okou semakino kama la, ia anau emakino kama la. Poi anau emea pela manau semakino kama la, kena anau amenukulaoi poi okou. Ia anau emakino kama la. Kela hea anau ekaukali nakakala aia la.

⁵⁶ Kipuna okou la Abraham nihakaꞌoko pela aia ameꞌike keaho anau ehananiu la. Ia kena keualoko kama la uꞌike keaho la, kama la uhihia lo.”

⁵⁷ Kena nakama la eme aꞌe Jesus, “Kemakua aꞌoe sekae kipulima nahekau. Okea aꞌoe eme maꞌoe eꞌike Abraham?”

⁵⁸ Ia Jesus eme aꞌe, “Anau eme aku okou kehamaoni. Imua Abraham nihanau mai, {Kenei anau}.”

⁵⁹ Ia kena nakama la eko nahaku ma imaꞌa kama la. Ia Jesus ehaluu soia nohaele ikaha ma keꞌina hale kapu la.