John 7 - Luaniua New Testament

Jesus ma nakaina aia la

¹ Kena Jesus uhaele valoko Galilee. Ia kama la sehihaele muli i Judea, maikinimea nakama hamakua na{Jiu} la ehihai ikaa aia imake.

² Keualoko la, keꞌai esui ma Nakamahale Kapolo la ukapili.

³ Kena iko nakaina Jesus la ime aꞌe kama la, “Haele aku pela i Judea, iꞌike nakama kaukali aꞌoe la namahi aꞌoe.

⁴ Poi hekama ehihai keonohenua imakino i aia, kama la sekau kehuhuu namahi aia. Huli aꞌe namahi aꞌoe na imaka nakama kemaalama nei hakoa imakino nakama la i aꞌoe.”

⁵ (Ia nakaina Jesus la esehakina hamaoni kama la.)

⁶ Kena iko Jesus ime aꞌe nakaina aia la, “Sekau pela anau ihuli aꞌe namahi anau vahonei. Ia okou ehakaꞌoko pela anau ekau kehuli aku name nei naualoko hakoa.

⁷ Nakama kemaalama nei seliloko i okou. Ia nakama la eliloko i anau oia, maikinimea anau ehaꞌali kahi aꞌe pela nakipukipu lakou la esaꞌino.

⁸ Okou io soꞌokou. Ia anau mesehaele aku i keꞌai na, maikinimea sekau pela anau ihaele vahonei.”

⁹ Jesus ekakala penei, kena oinoho i Galilee.

Jesus uhaele i keꞌai la

¹⁰ Nakaina Jesus la eo i keꞌai la, kena Jesus ehaele aku imuli. Ia kama la ehaele semuu oia, isehaꞌali aꞌe oai aia.

¹¹ Nakama hamakua na{Jiu} la esesee ia Jesus i keꞌina keꞌai la, kena ivasisili solakou, “Kehe kama na?”

¹² Keonohenua la ehakauoki solakou. Alakama eme aꞌe, “Kela hekama kaualeꞌa.” Ia alakama emea ma, “Seai. Kama na ehailavaꞌa keonohenua la oia.”

¹³ Ia sehikama ekakala hamaloa, maikinimea nakama la emakaꞌu nakama hamakua na{Jiu} la.

¹⁴ Keualoko keonohenua la eꞌai keꞌai la, Jesus uhaele iloko kehale kapu la, kena iꞌamaka noaoaꞌo keonohenua la.

¹⁵ Nakama hamakua na{Jiu} la emasalo haeꞌo, kena ime aꞌe, “Kama nei se{sikulu}, ia emakonu pehe!”

¹⁶ Kena iko Jesus ime aꞌe, “Keaoaꞌo anau nei seai nikakala anau oia. Kenei keaoaꞌo kekama ehaunalia iho anau.

¹⁷ Alakama okou ehakina pela anau ekakala aku keaoaꞌo Keakua. Ia alakama ehakaꞌoko manau ekakala aku kehakaꞌoko anau sonau oia. Ia poi hekama ehihai ipena hea Keakua ehihai, kama la meiailoa laoi keaoaꞌo anau nei.

¹⁸ Poi hekama ehihai ikakala kehakaꞌoko aia soia, kama la ehihai keonohenua ihamaha i aia. Hano hekama ehihai ihamaha kekama kela ehaunalia iho aia la, kena kama la ekonu kahi hamaoni.

¹⁹ Moses eau aku okou nakuaa, hamaoni la? Ia sehikama okou ehalono nakuaa la. Okea okou ehai ma ikaa anau imake?”

²⁰ Kena iko keonohenua la ime aꞌe, “Aꞌoe eisi kipua saꞌino. Oai kekama hikaa aꞌoe na?”

²¹ Kena iko Jesus ime aꞌe nakama la, “Anau nihuli aku haꞌaku hokahi*f6* i keaho kapu, ia kena okou emasalo hakoa pela anau eheheaꞌu i keaho kapu la.

²² Ia okou ehamakino nakapukapu nakamaliꞌi kanaka okou la i keaho kapu. Poi Moses eme aku okou. (Ia kela nakipuna imua la nihuli mai avale kipukipu la.)

²³ Okou ehamakino nakapukapu nakamaliꞌi kanaka i keaho kapu ikaukali nakuaa Moses. Kena okou sekau keloko manau ekonaꞌi kekama nokaualeꞌa i keaho kapu la.

²⁴ Sehai aꞌe nia okou eꞌike, ia laulahu ilave okou hea ekonu hamaoni.”

Jesus hekama ihee

²⁵ Kena alakama i Jerusalem ekakala ma, “Kenei kekama kela nakama hamakua la ehahaꞌike ma ikaa la.

²⁶ Ila aꞌe! Kama la ukakala hamaloa, ia sehikama ehai aꞌe kama la. Eme pela nakama hamakua la ehakaꞌoko ma kama la o keMesaea.

²⁷ Ia kulana keMesaea la meihaele iho, sehikama eailoa keꞌina kama la ehamai la. Ia kakou hakoa eailoa keꞌina kama nei ehamai la.”*f7*

²⁸ Keualoko la, Jesus nikaꞌu imaka hale kehale kapu la, kena ikakala hamaloa ma, “Okou ehakaꞌoko pela okou emakino anau, ia emakino hoi keꞌina anau ehamai la. Ia anau sehaele iho i kevahi anau sonau. Kelaa kama ehaunalia iho anau. Kama la ehamaoni, ia okou semakino kama la.

²⁹ Ia anau emakino kama la, maikinimea anau ehamai kama la, ia kama la ehaunalia iho anau.”

³⁰ Kena iko nakama la ihaꞌike ma ihapiꞌi Jesus, maikinimea kama la eme pela aia ehamai Keakua. Ia sehikama ekaohi kama la, maikinimea sekae keualoko kama la meimake.

³¹ Komaꞌi nakama keonohenua la eꞌike namahi kela Jesus ehuli aꞌe la, kena ihakina i kama la. Nakama la eme aꞌe, “Kulana keMesaea mehamai, kama la amehuli mai nahaꞌaku, ehau poi nia kama nei ehuli mai la.”

Napulepule ehaꞌike ma ihapiꞌi Jesus

³² NaFarasi la elono keonohenua la ekakala solakou. Kena nakama la ma namaakua hamakua la ehaunalia napulepule lakou la ma ihapiꞌi Jesus.

³³ Kena iko Jesus ime aꞌe keonohenua la, “Anau menoho ma okou kamaualoko oia, ia kena anau mehaele muli i keꞌina kekama kela nihaunalia iho anau la.

³⁴ Okou meisesee i anau, ia okou meiselave anau, maikinimea okou selavaa keo i keꞌina la.”

³⁵ Kena nakama hamakua na{Jiu} la ekakala solakou ma, “Kama la mehaele ihee iselavaa kakou kelave aia la? Alakama kakou enoho i namakaꞌina nakama haGreek emao la. Ea, kama la meihaele i naꞌina la, iaoaꞌo nakama haGreek la hoi?

³⁶ Kama la emea ma makou meisesee i aia, ia meiselave aia. Kama la eme mai hoi pela, ‘Okou selavaa keo i keꞌina anau meinoho la.’ Kenei nikakala pehe?”

Kevai keola eola kahi

³⁷ Keaho haoki keꞌai na{Jiu} la ehamakua, elaꞌa iluna naaho la hakoa.*f8* Keaho la, Jesus ekuu iluna nokakala hamaloa ma, “Oai kekama ehiunu, hamai i anau nei nounu.

³⁸ Nakakala nei emau i kelauniu ekapu ma, ‘Oai kekama ehakina i anau, kevai keola eola kahi la meiosooso iho ikaha ma kama na.’ ”

³⁹ Jesus ekakala haiauna aꞌe nakipukipu Keanana Kapu kela nakama ehakina i aia la meiko. Ia keualoko la, Keakua seiau iho Keanana Kapu, ia ehakali keualoko aia mesau Jesus ialuna.

Keonohenua la ehakauoki solakou

⁴⁰ Keonohenua la elono nakakala Jesus la. Kena alakama eme aꞌe, “Kama na ehakae nakakala Keakua hamaoni.”

⁴¹ Ia alakama emea ma, “Kama na o keMesaea!” Ia alakama emea ma, “KeMesaea la ame sehamai i Galilee.

⁴² Nakakala kelauniu kapu ehuli mai pela ‘keMesaea la meimamaoha iho i keꞌaha David. Ia kena kama la meihanau iho i Bethlehem, kemakaꞌina kekuꞌu David ninoho la.’ ”

⁴³ Kena keonohenua la ehakauoki kehakaꞌoko lakou la, kena ihavaꞌee solakou.

⁴⁴ Alakama eme ma ikaohi Jesus, ia sehikama eapaꞌe nohapiꞌi kama la.

Nakama hamakua na{Jiu} la sehihai Jesus

⁴⁵ Napulepule la evaꞌai muli i namaakua hamakua ma naFarasi la. Kena nakama hamakua la uvasili aꞌe napulepule la, “Okea okou sehakaꞌi mai kama la?”

⁴⁶ Kena iko napulepule la ime aꞌe, “Sehikama epolopolo hakaualeꞌa poi kama la.”

⁴⁷ Ko naFarasi la ihai aꞌe, “Kama la ehailavaꞌa okou hoi?

⁴⁸ Makou naFarasi ia ma nakama hamakua na{Jiu} hakoa sehakina kama la.

⁴⁹ Ia keonohenua la semakino nakuaa Moses, ia kena meinonoho haeꞌo.”

⁵⁰ Nicodemus enoho lakou ilaa. Kela kekama nihaele aꞌe nomaka Jesus imua la. Kama la eme aꞌe nakama la,

⁵¹ “Nakuaa kakou eme penei. Kakou sekau kehai aꞌe kama la, ame avale kakou elaulahu imua, imakino kakou hea kama la esala la.”

⁵² Kena iko nakama la ime aꞌe, “Aꞌoe hekama i Galilee hoi? Pau kelauniu kapu la imakino aꞌoe pela sehikama Galilee ehakae nakakala Keakua imua la.”

⁵³ Kena nakama la uo i nahale lakou la.