John 6 - Luaniua New Testament

Jesus ehanai lima simaka nakama

¹ Kena Jesus uhaele i kelaa vahi kemoana Galilee, esui hoi ma kemoana Tiberias.

² Keonohenua komaꞌi lo ekaukali kama la, maikinimea lakou eꞌike kama la ehuli aꞌe nahaꞌaku nokonaꞌi nakama lavea la nokaualeꞌa.

³ Kena Jesus ma nakama kaukali aia la uo iluna kemouna nonoho ilaa.

⁴ Ia keualoko la hoi, keꞌai na{Jiu} emale ma kePasova ukapili.

⁵ Vahola, Jesus uꞌike keonohenua elahi la uo aꞌe i aia, kena ime aꞌe Philip, “Kakou mesui nihalaoa i keꞌina hee ihanai nakama la?”

⁶ Jesus ekakala penei ihaꞌike Philip. Ia Jesus namakino avale hea aia hakaꞌoko ipena.

⁷ Ko Philip ime aꞌe, “Niaina kakou eheheaꞌu hemalama hokahi iko namoni, nasui kakou la ame sekau kesui nihalaoa ikau ma nakama la. Kena nakama la ameꞌai nikamamea oia.”

⁸ Andrew kaina Simon Peter ekaukali Jesus hoi. Kama la eme aꞌe,

⁹ “Kaupeala nei eko mai kaulima nahalaoa ia ma sakamaiꞌa. Ia naꞌai nei sekau kehanai keonohenua komaꞌi nei.”

¹⁰ Kena Jesus ume aꞌe, “Me aku nakama la inoho ilalo.” Keꞌina la esomo naveve, kena nakama la hakoa unoho ilaa. Keꞌoina nakanaka la hakoa ekae pela elima nasimaka.

¹¹ Kena Jesus uko nahalaoa la, kena ihamaha aꞌe Keakua, kena ivavae aꞌe i nakama kela enoho ilaa la, kena iko sakamaiꞌa la imea pela hoi. Ia kena nakama la hakoa eꞌai nopohu.

¹² Keualoko nakama la eꞌai nooki, Jesus ume aꞌe nakama kaukali aia la, “Haele hao namanunu ekoe la, isememea puamu.”

¹³ Ia kena nakama la uhaele hao namanunu ekoe la, nopii sanahulu ma lua naꞌeke. Kela keꞌoina ekoe iloko kaulima nahalaoa la.

¹⁴ Keualoko keonohenua la niꞌike Jesus ehuli aꞌe haꞌaku la, nakama la ukakala solakou, “Hamaoni la. Kenei kekama ehakae nakakala Keakua kela ehaele iho i kemaalama nei.”

¹⁵ Ia Jesus umakino pela nakama la ehakaꞌoko ma ikaohi aia ime mo kuꞌu lakou. Kena kama la uvaꞌai soia iluna kemouna la.

Jesus ehaele valuna kemoana

¹⁶ Kulana keiahi, nakama kaukali Jesus la uo ikai.

¹⁷ Saika la upouli, ia Jesus sekae aꞌe nakama la. Ia kena nakama kaukali la uꞌae iluna kemonoui la solakou, kena ialo i Capernaum.

¹⁸ Saika la kemakani la umaili haimahi, kena kemoana la umaꞌini peau.

¹⁹ Nakama la ualo kemonoui la nomao ikaha ma henua la.*f3* Ia saika la, nakama la uꞌike Jesus uhaele aꞌe valuna kemoana, nokapili aꞌe kemonoui la. Kena nakama la umakaꞌu haeꞌo.

²⁰ Ko Jesus ime aꞌe nakama la, “Okou isemakaꞌu. Kenei anau oia.”

²¹ Kena nakama la uhihai Jesus iꞌae aꞌe iluna kemonoui la. Vahola oia, kemonoui la ukae aꞌe henua lakou ehaele la.

Keonohenua la esesee Jesus

²² Ia kahaka kela aho, keonohenua kela enoho i kelaa vahi kemoana la umakino pela hemonoui hokahi useai. Nakama la umakino hoi pela Jesus seo lakou ma nakama kaukali aia la, ia nakama la ualo solakou.

²³ Ia alamonoui eo mai kemakaꞌina Tiberias, kena ihau aꞌe iuka. Kela keꞌina Jesus ehamaha Keakua, kena ivavae aꞌe nahalaoa iꞌai keonohenua la.

²⁴ Ia nakama keꞌina la umakino pela Jesus ma nakama kaukali aia la useai ilaa. Ia kena iꞌae iluna namonoui la, nohulo i Capernaum nosee Jesus.

Jesus o halaoa keola

²⁵ Nakama la elave Jesus i kelaa vahi kemoana la, kena ime aꞌe, “Rabai, aꞌoe ekae mai vahohee?”

²⁶ Ko Jesus ime aꞌe, “Anau eme aku okou kehamaoni. Okou naꞌike avale nahaꞌaku kela anau nihuli aku okou la. Ia vahonei okou esee anau, maikinimea okou eꞌai nahalaoa la nopohu.

²⁷ Naꞌai okou la epala vave. Kena okou sekau kehakekele mahi ma iko naꞌai la. Ia okou ekau kehakekele avale iko naꞌai kela meiau aku okou keola naualoko hamau. {Kama ekipu kama} meau aku okou naꞌai la, maikinimea Keakua Kamana ekini kama la soia.”

²⁸ Kena iko nakama la ime aꞌe Jesus, “Heheaꞌu pehe Keakua ehihai makou ipena?”

²⁹ Iko Jesus ime aꞌe, “Kenei keheheaꞌu Keakua ehihai okou ipena. Hakina i kekama aia nihaunalia iho la.”

³⁰ Iko nakama la ime aꞌe, “Aꞌoe mehuli mai nihaꞌaku pehe iꞌike makou, pela makou amehakina i aꞌoe? Hea aꞌoe meihuli mai?

³¹ Nakipuna makou imua la eꞌai nahalaoa*f4* iloko keꞌina kukuaha. Nakakala nei emau i kelauniu kapu, ‘Kama la eau iho nahalaoa kevaelani iꞌai nakama la.’ ”

³² Kena iko Jesus ime aꞌe, “Anau eme aku kehamaoni. Moses seau aku halaoa kevaelani la. Kela Kamana anau la avale eau iho halaoa hamaoni kevaelani la.

³³ Halaoa Keakua la ehaele iho ikaha ma kevaelani nohaola nakama kemaalama nei.”

³⁴ Kena iko nakama la iainoa aꞌe, “Kealiꞌi, au mai kahi halaoa na.”

³⁵ Kena iko Jesus ime aꞌe, “Anau o halaoa kela eau aku okou keola hamaoni. Oai kekama ehamai i anau mesehiꞌai. Ia oai ehakina i anau mesehiunu.

³⁶ Ia anau nime aku okou imua pela, okou unaꞌike avale anau, ia okou oisehakina oia.

³⁷ Kamana meau mai nakama, kena nakama la meo mai hakoa. Ia anau mesehaise nakama la ikaha.

³⁸ Maikinimea anau ehaele iho ikaha ma kevaelani ipena kehakaꞌoko kekama kela nihaunalia iho anau la. Ia seai pela kehakaꞌoko anau sonau oia.

³⁹ Ia kenei kehakaꞌoko kama la. Kama la eau mai nakama, ia sehihai anau ikiaꞌi hekama i nakama la ilano. Ia anau mehamasiꞌe nakama la hakoa i keaho haoki la.

⁴⁰ Kaukamana la ehihai penei avale, pela nakama hakoa kela eꞌike kekama aia, ia hakina i kama la, meko keola eola kahi. Ia anau mehamasiꞌe nakama la ikaha ma kemake i keaho haoki la.”

⁴¹ Vahola, na{Jiu} la uꞌamaka nokamumu ia Jesus, maikinimea kama la emea ma, “Anau o halaoa kela ehaele iho ikaha ma kevaelani.”

⁴² Kena iko nakama la ime aꞌe, “Seai. Kela Jesus, kekama Joseph oia. Kakou emakino kamana ia ma kina aia la. Okea kama nei ekakala ma, ‘Anau sonau ehaele iho ikaha ma kevaelani.’ ”

⁴³ Kena iko Jesus ime aꞌe nakama la, “Okou isekamumu soꞌokou.

⁴⁴ Kamana la ehaunalia iho anau. Amea kamana la ehakaꞌi mai kekama, kena kama na elavaa kehamai i anau. Kena anau mehamasiꞌe kama na ikaha ma kemake i keaho haoki la.

⁴⁵ Nakama hakae nakakala Keakua nikakaa mai ma, ‘Keakua meaoaꞌo keonohenua la hakoa.’ Nakama hakoa kela ehalono keaoaꞌo Kamana la, meo mai i anau.

⁴⁶ Sehikama eꞌike Kamana la. Ia kekama kela ehamai Keakua, kama na soia eꞌike Kamana.

⁴⁷ Anau eme aku okou kehamaoni. Oai ehakina i anau, meola naualoko hamau.

⁴⁸ Anau o halaoa kela eau aku keola hamaoni.

⁴⁹ Nakipuna okou imua la eꞌai nahalaoa*f5* iloko keꞌina kukuaha la. Ia nakama la emake oia.

⁵⁰ Ia anau o halaoa kela ehaele iho ikaha ma kevaelani. Oai kekama eꞌai halaoa nei selavaa imake.

⁵¹ Anau o halaoa keola hamaoni kela ehaele iho ikaha ma kevaelani. Pena hekama eꞌai halaoa nei, kama na meola kahi. Halaoa nei o kauanohi. Anau meiau aku kauanohi ma ihaola nakama kemaalama nei.”

⁵² Kena keonohenua na{Jiu} la uꞌamaka nohakauoki solakou, “Kama nei meiau mai keanohi aia iꞌai kakou pehe?”

⁵³ Kena iko Jesus ime aꞌe nakama la, “Anau eme aku okou kehamaoni. Pena okou seꞌai keanohi ke{kama ekipu kama}, ia seunu kanakoko, kena okou meseola.

⁵⁴ Oai kekama eꞌai kauanohi ia eunu kaukoko, kama la meola naualoko hamau. Ia anau mehamasiꞌe kama la ikaha ma kemake i keaho haoki la.

⁵⁵ Mai kauanohi heꞌai hamaoni, ia kaukoko hevai hamaoni.

⁵⁶ Oai kekama eꞌai kauanohi, ia eunu kaukoko, kena kama la enoho manau, ia anau enoho ma kama la hoi.

⁵⁷ Kamana eola la ehaunalia iho anau, kena ihaola anau. Ia ehau pela hoi. Oai kekama eꞌai anau meiola, maikinimea anau mehaola kama la.

⁵⁸ Halaoa kela ehaele iho ikaha ma kevaelani esehau poi nahalaoa kela nakipuna kakou imua la niꞌai, kena emake oia. Ia oai eꞌai halaoa nei meiola naualoko hamau.”

⁵⁹ Jesus eaoaꞌo penei iloko hale loku na{Jiu} la i kemakaꞌina Capernaum.

Nakakala keola eola kahi

⁶⁰ Nakama kaukali Jesus la elono nakakala nei, kena ime aꞌe, “Keaoaꞌo nei ehainakaa haeꞌo, oai elavaa kehalono nakakala nei?”

⁶¹ Jesus eailoa ma nakama kaukali aia la ekamumu solakou, kena ime aꞌe nakama la, “Ea, okou emasalo haeꞌo i nakakala nei?

⁶² Keualoko okou eꞌike {kama ekipu kama} evaꞌai iluna i keꞌina aia ninoho imua la, kena okou meimakino.

⁶³ Keanana Kapu soia ehaola okou, seai pela namahi okou soꞌokou. Nakakala anau eme aku okou nei ehamai Keanana Kapu, kena iau aku okou keola hamaoni.

⁶⁴ Ia alakama okou sehakina oia.” (Jesus naailoa mai avale oai nakama mesehakina i aia, ia oai kekama meihaꞌali aꞌe aia i nakama eliloko aia la.)

⁶⁵ Kena iko Jesus ime aꞌe, “Kenei hea anau eme aku okou. Pena Kamana sekonaꞌi okou, kena okou meselavaa keo mai i anau.”

⁶⁶ Ia keualoko la, komaꞌi nakama kaukali Jesus la uo ikaha, usehihai ikaꞌa lakou.

⁶⁷ Kena iko Jesus ime aꞌe sehui ma lua nakama kaukali aia la, “Ia okou. Okou ehihai io ikaha hoi?”

⁶⁸ Kena iko Simon Peter ime aꞌe, “Kealiꞌi, makou io i ai? Aꞌoe soꞌoe eme mai nakakala keola eola kahi.

⁶⁹ Makou uhakina, ia umakino pela aꞌoe o kekama ekapu Keakua.”

⁷⁰ Kena Jesus eme aꞌe, “Anau ekini okou sehui ma lua nakama. Ia kelaa kama okou hekipua saꞌino!”

⁷¹ Ia Jesus ehaꞌali aꞌe nakipukipu Judas, kekama Simon Iscariot. Niaina Judas hekama iloko sehui ma lua nakama kaukali Jesus la, kama la mehaꞌali aꞌe Jesus i nakama hamakua na{Jiu} la.