John 21 - Luaniua New Testament

Nakama kaukali la eꞌike Jesus

¹ Kena imuli, Jesus ehuli aꞌe soia hoi i nakama kaukali aia la i kevahi kemoana Galilee.

² Nakama nei enoho ilaa, Simon Peter, Thomas, esui ma Keoꞌoa, Nathanael, kama kemakaꞌina Cana iloko Galilee, Nakama kela Zebedee, Ia ma kelaa koꞌolua nakama kaukali Jesus hoi.

³ Simon Peter eme aꞌe nakama la, “Anau mehaele nopupui.” Kena nakama la eme aꞌe, “Kakou io.” Ko nakama la iꞌae kemonoui la nopupui kepo la hakoa, ia sehimea ekau.

⁴ Keualoko keaka, Jesus ukuu ikaunakai, ia nakama kaukali la semakino ma kela Jesus.

⁵ Kena iko Jesus ianaa aꞌe nakama la, “Ausoa. Okou haiponohi?” Ia nakama la eme aꞌe, “Sehimea.”

⁶ Kena iko Jesus ime aꞌe, “Pehi keupena okou na kevahi laua kemonoui na ma sehiiꞌa emau.” Kena iko nakama la ipehi keupena lakou la noselavaa kehuki muli, maikinimea komaꞌi naiꞌa ekau.

⁷ Kena iko kama kaukali Jesus elaoi la ime aꞌe Peter, “Kela o Kealiꞌi!” Keualoko Peter nilono nakakala nei, ko kama la ikakaꞌi peala aia la nomau, kena ilee iloko kelokai noꞌau iuka.

⁸ Kena nakama kaukali la ealo aꞌe kemonoui la, noaleko keupena la iuka upii keiꞌa. Maikinimea nakama la semao ikaha ma kaunakai.*f30*

⁹ Nakama la eo aku iuka noꞌike naponohi ia ma nahalaoa ehakuu iluna kemakaahi.

¹⁰ Kena iko Jesus ime aꞌe nakama la, “Au mai niiꞌa i naiꞌa okou nipui la.”

¹¹ Ko Simon Peter ihaele noaleko aꞌe keupena la iuka upii keiꞌa elahi, kela huikalau kipulima ma kolu naiꞌa hakoa. Niaina ma komaꞌi naiꞌa, keupena la semasae oia.

¹² Ko Jesus ime aꞌe nakama la, “Omai noꞌai.” Ia nakama kaukali la emakaꞌu kevasili aꞌe kama la, “Oai aꞌoe,” maikinimea nakama la umakino ma kela o Kealiꞌi.

¹³ Kena iko Jesus ihaele aꞌe noko nahalaoa la ia ma naponohi la novavae aꞌe nakama la.

¹⁴ Kenei kanahakolu naualoko Jesus ehuli aꞌe soia i nakama kaukali aia la, imuli kela aia niola muli la.

Jesus ekakala laua ma Peter

¹⁵ Keualoko nakama la niꞌai nooki, ko Jesus ime aꞌe Simon Peter, “Simon kama John, aꞌoe elaoi anau elaꞌa iluna ma alakama?” Ko Peter ime aꞌe, “Ino Kealiꞌi, aꞌoe makino pela anau elaoi aꞌoe.” Kena Jesus eme aꞌe kama la, “Hanai napunua {sipisipi} anau la.”*f31*

¹⁶ Ia Jesus evasili aꞌe kama la hoi ma, “Simon kama John, aꞌoe elaoi hamaoni anau?” Ko Peter ime aꞌe, “Ino, Kealiꞌi, aꞌoe makino pela anau elaoi aꞌoe.” Ko Jesus ime aꞌe kama la, “Lolosi na{sipisipi} soliliꞌi anau la.”

¹⁷ Keualoko kanahakolu ko Jesus ime aꞌe, “Simon kama John, ea, aꞌoe elaoi anau?” Ia Peter ukipuaina, maikinimea Jesus evasili aꞌe aia koukolu naualoko pela, “Aꞌoe elaoi anau?” Kena Peter eme aꞌe, “Kealiꞌi, aꞌoe ailoa namea hakoa. Kena aꞌoe makino pela anau elaoi aꞌoe.” Ko Jesus ime aꞌe kama la, “Hanai na{sipisipi} soliliꞌi anau la.

¹⁸ Anau eme aku aꞌoe kehamaoni. Keualoko aꞌoe nikipu aꞌe, aꞌoe eleleu pamalo aꞌoe soꞌoe nohaele heꞌina pehe aꞌoe hihai. Ia keualoko aꞌoe umakua, kelaa kama meihaleleu aku pamalo aꞌoe la, kena ihakaꞌi aꞌoe i keꞌina aꞌoe sehihai kehaele la.”

¹⁹ Jesus ekakala penei ihaꞌali aꞌe pela kipukipu kemake Peter la meihuli aꞌe namahi Keakua. Kena Jesus eme aꞌe kama la, “Kaukali mai anau.”

Jesus ma kelaa kama kaukali aia la

²⁰ Kama kela Jesus elaoi la ehaele vamuli Jesus laua ma Peter. Kela o kekama nihakiꞌe nohapale aꞌe Jesus keualoko keꞌai imua la novasili aꞌe ma, “Kealiꞌi, oai kekama mehaꞌali aꞌe aꞌoe i nakama hamakua la?” Peter ehakiꞌe imuli aia noꞌike kama la.

²¹ Kena Peter evasili aꞌe Jesus, “Kealiꞌi, ia kama nei?”

²² Ko Jesus ime aꞌe Peter, “Poi anau hihai kama nei iola ikae keualoko anau meivaꞌai mai muli, kela hevahi maua somaua. Aꞌoe ikaukali mai anau.”

²³ Kena kakala nei ukoha nolono alakama kaukali Jesus la, pela ma kama kaukali la meselavaa imake. Ia Jesus semea pela ma kama la mesemake. Jesus emea ma, “Poi anau hihai kama la iola nokae keualoko anau meivaꞌai mai muli, kela hevahi maua somaua.”

²⁴ Kama kaukali la ekakala aku nakakala nei, kena ikakaa nakakala nei iloko kelauniu nei. Kena kakou emakino pela hea kama la ekakala la ehamaoni.

Nakakala haoki

²⁵ Jesus ehuli aꞌe komaꞌi namea hoi, kela anau sekakaa iloko kelauniu nei. Poi hekama ekakaa namea la hakoa, nalauniu la amekomaꞌi haeꞌo. Anau ehakaꞌoko ma naꞌina kemaalama nei mesekau kehakau nalauniu la hakoa.