John 18 - Luaniua New Testament

Keonohenua ekaohi Jesus

¹ Keualoko Jesus niloku nooki, kama la uhaele ma nakama kaukali aia la nokae keꞌina ilakonu samouna, emale ma Kidron. Kena nakama la ekaꞌa i kelaa vahi keꞌina la nokae paupaꞌu kela esomo na{Oliv}.

² Keualoko la, Judas ehihai ihaꞌali aꞌe Jesus i nakama hamakua la. Kama la emakino paupaꞌu la, maikinimea Jesus ma nakama kaukali aia la nikae ilaa imua.

³ Kena kama la ehakaꞌi aꞌe napulepule haRome lakou ma nakama hamakua na{Jiu} la. Ala nikama heheaꞌu namaakua hamakua ia ma naFarasi la. Nakama la eko nahana ma naahi lakou, kena io aku paupaꞌu la.

⁴ Jesus emakino hea nakama la eo aꞌe la, kena ihaele imua novasili aꞌe nakama la, “Okou sesee i ai?”

⁵ Ko nakama la ime aꞌe, “Jesus kekama Nazareth.” Kena Jesus eme aꞌe, “{Kenei anau}.” Judas ekuu lakou ma napulepule la. Kela kekama ehaꞌali aꞌe Jesus i nakama hamakua la.

⁶ Ia keualoko Jesus nime aꞌe nakama la ma, “{Kenei anau},” nakama la usolo muli nosina ilalo.

⁷ Ko Jesus ivasili aꞌe hoi, “Okou esesee i ai?” Ko nakama la ime aꞌe, “Jesus kekama Nazareth.”

⁸ Kena Jesus eme aꞌe, “Anau name aku okou avale pela {Kenei anau}. Poi okou esesee anau, kena kiaꞌi nakama nei io ikaha.”

⁹ Jesus ekakala penei imea pela nakakala aia nei amehuli mai nohamaoni, “Aꞌoe eau mai nikama imea anau ilolosi nakama la, ia sehikama elano ikaha ma anau.”

¹⁰ Kena Simon Peter euhu pulamoa aia la nokuu ikaha keakalina laua kela kama heheaꞌu pohoulu hamakua namaakua la. Kama heheaꞌu la emale ma Malchus.

¹¹ Ko Jesus ime aꞌe Peter, “Kuꞌu muli pulamoa aꞌoe na. Kamana ehihai pela anau mehalono lihu, kena anau mehalono lihu.”

Napulepule ehakaꞌi Jesus nohakuu imua Annas

¹² Kena iko napulepule haRome ma kama hamakua lakou, ia ma napulepule na{Jiu} la ikaohi Jesus, nosaisai nalima aia,

¹³ kena ihakaꞌi kama la nomaka Annas, hinaona Caiaphas.*f24* Hekau la, Annas pohoulu hamakua namaakua la.

¹⁴ Kela Caiaphas nime aꞌe nakama hamakua na{Jiu} pela, “Kekama hokahi ekau kemake ma ikonaꞌi keonohenua la.”

Peter eꞌole pela aia semakino Jesus

¹⁵ Simon Peter ekaꞌa vamuli Jesus, nokuu imaka hale pohoulu hamakua namaakua la. Ia kelaa kama kaukali hoi ekaꞌa maia. Ia haleaina pohoulu hamakua la emakino kama hasiaoa la.

¹⁶ Kena keualoko Peter ehakali i maka hale, kama hasiaoa la ehaele i hale nokakala aꞌe kaupu kela elolosi kokoꞌa la, kena ihakaꞌi aꞌe Peter inoho haseꞌe la.

¹⁷ Ko kaupu la ime aꞌe Peter, “Aꞌoe hekama kaukali kanaka la hoi?” Ko Peter ime aꞌe, “Anau seai.”

¹⁸ Keualoko la, keꞌina la usamalio. Kena nakama heheaꞌu kehale la lakou ma napulepule la uhaula keahi nohamahana lakou kevahi keahi la. Ia Peter ekuu lakou nohamahana hoi.

Pohoulu hamakua namaakua evasisili aꞌe Jesus

¹⁹ Pohoulu hamakua namaakua la evasili aꞌe Jesus kevahi kela nakama kaukali kama la la, ma naaoaꞌo kama la.

²⁰ Ko Jesus ime aꞌe, “Anau ekakala nolono nakama iloko naꞌina hakoa, kena iaoaꞌo naukulana na{Jiu} iloko nahale loku lakou ia ma hale kapu la hoi. Ia anau sehiualoko ehuu nakakala anau.

²¹ Okea aꞌoe evasili mai anau penei? Vasili aꞌe nakama kela elono nakakala anau la. Nakama la eailoa hea anau ekakala aꞌe lakou.”

²² Keualoko Jesus nime aꞌe nakakala nei, ko pulepule la ipaa namaisu kama la, kena ime aꞌe, “Aꞌoe sekau kekakala aꞌe pohoulu hamakua namaakua pena.”

²³ Ko Jesus ime aꞌe kama la, “Poi aꞌoe ehakaꞌoko pela nakakala anau la esala, kena haꞌali mai anau ilono. Ia poi nakakala anau la ekonu, hea aꞌoe elave ivuhu anau?”

²⁴ Ia keualoko la, Annas seme aꞌe napulepule la ivekeveke namaea kela esaisai nalima Jesus la, ia ihaunalia Jesus ilaulahu lia hinaona aia la Caiaphas, pohoulu hamakua namaakua la.

Peter eꞌole pela aia semakino Jesus hoi

²⁵ Peter oikuu imaka hale nohamahana keahi. Ko kelaa kama ime aꞌe kama la, “Aꞌoe hekama kaukali kanaka la hoi?” Ko Peter iꞌole pela, “Anau seai.”

²⁶ Ia kelaa kama nakama heheaꞌu pohoulu hamakua la ekuu ilaa hoi. Kela hekaina kekama Peter nikuu keakalina nosopo. Kama la eme aꞌe. “Anau eꞌike aꞌoe ma kanaka la iloko paupaꞌu. Seai la?”

²⁷ Ko Peter iꞌole hoi. Saika la ia, kemoa la ukani.

Jesus ekuu imua Pilate

²⁸ Kena kahaka kela aho, na{Jiu} la ehakaꞌi Jesus ikaha ma kehale Caiaphas noꞌave kehale kela {kaumani}. Ia na{Jiu} la sehihai ikaꞌa iloko hale {kaumani} la, aoki lakou mesala i kevahi nakuaa lakou, iselavaa lakou keꞌai kePasova.

²⁹ Kela hea Pilate ehaele imaka hale nokili lakou, kena ivasili aꞌe nakama la, “Aiea okou ekaohi mai kama nei naea?”

³⁰ Ko nakama la ime aꞌe, “Makou ehakaꞌi mai kama nei, mai kama nei epena name sala.”

³¹ Kena iko Pilate ime aꞌe nakama la, “Kena okou soꞌokou uko kama na, hakonukonu kama na i kevahi nakuaa okou la.” Ko nakama la ime aꞌe muli, “Nakuaa makou la epui makou isekaa kama nei imake.”

³² Jesus uoki kehaꞌali aꞌe nakipukipu kemake aia. Kena namenei eapihi mai ihuli aꞌe pela nakakala aia imua la ehamaoni.

³³ Pilate uvaꞌai muli i hale nolaulahu aꞌe Jesus, kena ivasili aꞌe kama la, “Aꞌoe o kekuꞌu na{Jiu}?”

³⁴ Ko Jesus ime aꞌe, “Kenei hevasili aꞌoe soꞌoe? Ea? Alakama eme aku aꞌoe nakipukipu anau?”

³⁵ Ko Pilate eme aꞌe muli, “Anau sehi{Jiu}. Keonohenua okou la lakou ma namakua hamakua okou la ehaunalia mai aꞌoe. Hea aꞌoe esala?”

³⁶ Ko Jesus ime aꞌe, “Kenoholana anau sekuu iloko kemaalama nei. Poi kenoholana anau ekuu iloko kemaalama nei, kena nakama kaukali anau la amevuhu ihasao anau ikaha ma nakama hamakua na{Jiu} la. Ia kenoholana anau la sekuu inei.”

³⁷ Kena ko Pilate ivasili aꞌe kama la, “Kena aꞌoe hekuꞌu?” Ko Jesus ime aꞌe, “Aꞌoe me mai manau hekuꞌu na. Ia anau ehanau nohaele iho iloko kemaalama nei, pela ihaꞌali aꞌe keonohenua la kehamaoni. Nakama kela hihai ikaukali nakakala hamaoni la, mehalono nakakala anau.”

³⁸ Kena Pilate evasili aꞌe Jesus, “Kehe kehamaoni na?” Kena ko Pilate ivaꞌai muli i maka hale nome aꞌe keonohenua la, “Anau sehisala elave ikaa kama nei imake.

Keonohenua la ehai aꞌe Jesus

³⁹ Ia kipukipu okou imua eme penei. Keualoko keꞌai kePasova, anau euhu hekama iloko kelokapu. Okou ehihai anau ihakana aku kekuꞌu na{Jiu} nei?”

⁴⁰ Ko keonohenua la ihaio aꞌe, “Seai kama na! Makou hihai Barabbas!” Ia kama la hekama ailalao oia.