John 17 - Luaniua New Testament

Jesus eloku aꞌe Keakua

¹ Jesus uoki kekakala aꞌe nakama kaukali aia la, kena iꞌila iluna noloku aꞌe ma, “Kamana. Vahonei, kapili anau mehalono lihu. Anau kekama hamaoni aꞌoe. Kena huli aꞌe namahi anau, pela anau mehuli aꞌe namahi aꞌoe.

² Aꞌoe niau mai anau namahi ilolosi nakama hakoa. Kena aꞌoe eau mai nikama ilolosi anau, ilavaa anau keau aꞌe nakama la keola eola kahi.

³ Keola kahi la ekipu penei. Nakama la emakino aꞌoe, Keakua hamaoni. Ia emakino anau hoi, Jesus Christ, kama kela aꞌoe nihaunalia iho.

⁴ Anau epena nookia laoi naheheaꞌu aꞌoe niau mai la, pela ihuli aꞌe namahi aꞌoe iloko kemaalama nei.

⁵ Kamana! Huli aꞌe vahonei namahi anau imua namaisu aꞌoe. Ala namahi kela kaua nihuli aꞌe imua keꞌamaka iho kemaalama nei.

⁶ “Aꞌoe ehilihili nakama aꞌoe i kemaalama nei, kena iau mai nakama la, pela anau ilolosi lakou. Anau ehuli aꞌe nakama la nakipukipu aꞌoe, ihalono nakakala aꞌoe.

⁷ Kena vahonei nakama la umakino namea hakoa kela aꞌoe eau mai la, pela namela ehamai aꞌoe.

⁸ Anau eau aꞌe nakama la nakakala kela aꞌoe niau mai anau la. Ia nakama la ehakina nakakala la. Kena umakino laoi pela anau ehamai i aꞌoe, ia ehakina hoi pela aꞌoe ehaunalia iho anau.

⁹ Vahonei anau seainoa aku aꞌoe ikonaꞌi nakama kemaalama nei hakoa. Anau eainoa aku aꞌoe ikonaꞌi nakama kela aꞌoe eau mai la, maikinimea ala nikama aꞌoe.

¹⁰ Namea anau la, ala nimea aꞌoe. Ia namea aꞌoe la nimea anau hoi. Kena nakama la ehuli aꞌe namahi anau.

¹¹ Vahonei anau mehaele aku aꞌoe, ia senoho iloko kemaalama nei. Ia nakama la menoho i kemaalama nei. Kamana Ekapu. Lolosi laoi nakama la i namahi kemale aꞌoe. Kela kemale aꞌoe niau mai manau. Pela nakama la isuꞌui poi hekama hokahi, ihau poi kaua esuꞌui hekama hokahi.

¹² Keualoko anau ninoho ma nakama la, anau elolosi laoi nakama la i namahi kemale aꞌoe. Kela kemale aꞌoe niau mai anau la. Anau elolosi nakama la iselavaa hekama nakama la ilano. Ia hekama hokahi elano oia, kekama kela ekau kehalono lihu la. Ihuli aꞌe pela nakakala kelauniu kapu la ehamaoni.*f23*

¹³ “Kena keualoko nei, anau uhaele aku i aꞌoe. Ia anau ekakala penei keualoko anau oinoho iloko kemaalama nei, imea nakama la ihihia hamaoni. Ehau poi anau ehihia hoi.

¹⁴ Anau eme aꞌe nakama la nakakala aꞌoe la. Ia nakama kemaalama nei eliloko nakama la, maikinimea nakama la sekaukali nakipukipu kemaalama nei. Ehau poi anau sekaukali nakipukipu kemaalama nei.

¹⁵ Anau seainoa aku aꞌoe iko nakama la ikaha ma kemaalama nei. Emeia anau eainoa aku aꞌoe ilolosi laoi nakama la ikaha ma kama saꞌino la.

¹⁶ Nakama la seai nikama kemaalama nei. Ehau poi anau sehikama kemaalama nei.

¹⁷ Nakakala aꞌoe la ehamaoni. Kena hakapu naola nakama la ikau ma kehamaoni la.

¹⁸ Anau ehaunalia nakama la ikaꞌa valoko kemaalama nei. Ehau poi aꞌoe nihaunalia iho anau iloko kemaalama nei.

¹⁹ Anau ehakea keola anau, ilavaa nakama la kehakea hamaoni naola lakou la.

²⁰ “Anau eainoa aku aꞌoe ikonaꞌi nakama la, kena ikonaꞌi hoi nakama kela meihalono nakakala nakama la, kena ihakina i anau.

²¹ Pela nahakina ana la mesuꞌui poi hekama hokahi. Kamana! Mea nakama la hakoa isuꞌui ma kaua. Ihau poi aꞌoe esuꞌui manau, ia anau esuꞌui maꞌoe. Kena nakama kemaalama nei meihakina pela aꞌoe ehaunalia iho anau.

²² Anau eau aꞌe namahi i nahakina ana la, ehau poi namahi aꞌoe niau mai anau la. Imea nakama la isuꞌui poi hekama hokahi, ehau poi kaua esuꞌui hekama hokahi.

²³ Anau esuꞌui ma nahakina ana la, ia aꞌoe esuꞌui manau. Imea nakama la hakoa isuꞌui hamaoni poi hekama hokahi. Imakino nakama kemaalama nei pela aꞌoe ehaunalia iho anau, ia ehaikama laoi nahakina ana la, ehau poi aꞌoe ehaikama laoi anau.

²⁴ “Kamana! Aꞌoe ehaikama laoi anau, ia kena iau mai namahi anau imua keꞌamaka iho kemaalama nei, kena iau mai hoi nakama la, pela anau melolosi lakou. Kena anau hihai nakama la inoho manau i keꞌina anau menoho la, iꞌike nakama la namahi anau.

²⁵ “Kamana. Aꞌoe ekonu kahi. Nakama kemaalama nei semakino i aꞌoe, ia anau makino i aꞌoe. Ia nakama la ailoa pela aꞌoe ehaunalia iho anau.

²⁶ Anau ehuli aꞌe nakama la nakipukipu aꞌoe. Pela nakama la melaoi alakama, ehau poi aꞌoe elaoi anau, isuꞌui anau ma lakou.”