John 14 - Luaniua New Testament

Jesus o keala Kamana

¹ Kena Jesus eme aꞌe nakama kaukali aia la, “Okou isekipuaina. Hakina Keakua ia hakina mai anau hoi.

² Napuikana kehale Kamana anau la ekomaꞌi. Anau mehaele nokanakana niꞌina ma okou. Kakala nei ehamaoni, kela hea anau ekakala aku okou penei.

³ Anau mehaele nokanakana niꞌina ma okou. Kena anau meivaꞌai mai muli noko okou io manau inoho keꞌina anau la.

⁴ Okou emakino laoi keala kela ehanokae keꞌina anau meihaele la.”

⁵ Ko Thomas ime aꞌe kama la, “Kealiꞌi. Makou semakino keꞌina aꞌoe meihaele na. Ia makou meailoa pehe keala na?”

⁶ Ko Jesus ime aꞌe kama la, “Anau o keala hamaoni keola. Anau sonau o keala hokahi kela ehanokae Kamana.

⁷ Vahonei okou makino anau. Kena okou memakino Kamana la hoi. Amaka vahonei okou emakino kama la, ia eꞌike kama la.”

⁸ Ko Philip ime aꞌe Jesus, “Kealiꞌi. Huli mai Kamana iꞌike makou. Kena naola makou meꞌakoa.”

⁹ Ia Jesus eme aꞌe, “Philip. Kau saika loloa anau enoho ma okou hakoa. Ea aꞌoe oisemakino anau? Keualoko hekama eꞌike anau, kama la eꞌike Kamana hoi. Aiea aꞌoe emea ma ‘Huli mai Kamana’ naea?

¹⁰ Aꞌoe ekau kehakina pela anau esuꞌui ma Kamana, ia kama la esuꞌui manau. Anau sekakala aku okou nakakala anau sonau. Kamana esuꞌui ma anau nohuli aku namahi aia.

¹¹ “Okou ekau kehakina ia anau. Anau eme aku pela anau esuꞌui ma Kamana, ia kama la esuꞌui manau. Poi okou sehakina nakakala nei, kena hakina mai namahi kela anau ehuli aku okou.

¹² Anau eme aku okou kehamaoni. Poi hekama ehakina i anau, kama la mehuli aꞌe namahi kela anau nihuli aꞌe la. Ia kama la mehuli aꞌe namahi elaꞌa iluna ma namahi kela anau nihuli aꞌe la. Maikinimea anau meihaele nonoho ma Kamana.

¹³ Kena anau meihuli aku hea okou ainoa mai i kemale anau la, pela ihuli aku namahi Kamana.

¹⁴ Poi okou eainoa mai nimea i kemale anau, kena anau meihuli aku namea la.

Keanana Kapu meihamai

¹⁵ “Poi okou elaoi anau, okou meihalono hea anau eme aku okou.

¹⁶ Kena anau meiainoa aꞌe Kamana iau aku kelaa kama ihapoꞌi okou, ia inoho kahi ma okou naualoko hamau.

¹⁷ Okou emakino Keanana hamaoni la, maikinimea kama la enoho ma okou, kena meikakaꞌa ma okou. Ia nakama kemaalama nei sehihai kama la, maikinimea nakama la seꞌike kama la, ia semakino nakipukipu kama la.

¹⁸ “Keualoko anau meihaele, anau mesekiaꞌi okou poi nimanu sili. Seai. Anau meivaꞌai mai muli.

¹⁹ Imuli kamaualoko, nakama kemaalama nei meiseꞌike anau. Ia okou meiꞌike anau, maikinimea anau eola, ia kena okou meola hoi.

²⁰ Keualoko la, okou meimakino pela anau esuꞌui ma Kamana anau, ia okou esuꞌui manau, ia anau esuꞌui maꞌokou hoi.

²¹ “Poi hekama ehalono nakakala anau, kama na elaoi hamaoni anau. Kena Kamana anau la melaoi kama na. Ia anau melaoi kama na, kena ihuli aꞌe kama na nakipukipu anau.”

²² Kena kelaa Judas (seai Judas Iscariot), kama la eme aꞌe, “Kealiꞌi, aiea aꞌoe mehuli mai makou nakipukipu aꞌoe, ia seai i nakama kemaalama nei naea?”

²³ Ko Jesus ime aꞌe kama la, “Poi hekama elaoi anau, kena kama na meihalono naaoaꞌo anau. Kena Kamana anau la mehaikama laoi kama na, kena maua meo aꞌe nonoho ma kama na.

²⁴ Ia poi hekama selaoi anau, kama na mesehalono naaoaꞌo anau. Naaoaꞌo okou elono nei seai niaoaꞌo anau sonau. Anei niaoaꞌo Kamana kela nihaunalia iho anau la.

²⁵ “Anau ekakala aku namea nei keualoko anau oinoho ma okou.

²⁶ Kamana anau la mehaunalia iho Keanana Kapu i namahi anau, nohapoꞌi okou. Kama la meiaoaꞌo aku okou namea hakoa, imanaku mai okou namea hakoa kela anau nikakala aku i okou la.

²⁷ “Anau mekonaꞌi okou inoho laoi. Kenei kipukipu kenoho laoi anau. Ia nakipukipu anau nei sehau ma nakipukipu nakama kemaalama nei. Kena okou isekipuaina, ia semakaꞌu.

²⁸ Okou nalono avale keualoko anau nime aku okou penei. Anau mehaele ikaha ma okou, ia kena mevaꞌai mai muli. Poi okou elaoi anau, kena okou amehihia pela anau mehaele i Kamana, kela ehamakua iluna anau.

²⁹ Anau ekakala aku okou name nei vahonei, imua kela name nei meapihi aku. Pela saika name nei ehuli aku, okou mehakina nakakala anau nei.

³⁰ Anau mesekakala loloa ma okou. Maikinimea kama hamakua kemaalama ilalo nei mehamai. Ia kama la seisi namahi iluna anau.

³¹ Anau ehalono namea hakoa kela Kamana eme mai anau. Kela hea nakama kemaalama nei emakino pela anau ehai kamana laoi kama la. Kena oia. Kakou io ikaha ma keꞌina nei.”