John 13 - Luaniua New Testament

Jesus esolo nakapuae nakama kaukali aia la

¹ Imua keꞌai kePasova, Jesus umakino pela aia mekiaꞌi kemaalama nei ivaꞌai muli Kamana. Jesus elaoi nakama kaukali aia iloko kemaalama nei, kena kama la ehuli aꞌe kelaoi hamaoni aia la nokae kehaoki.

² Ia Satan eusuusu aꞌe Judas Iscariot kama Simon ihaꞌali aꞌe Jesus i nakama hamakua la. Keiahi la, Jesus enoho noꞌai lakou ma nakama kaukali aia la.

³ Kama la emakino pela Kamana eau aꞌe aia namahi iluna namea hakoa. Kama la emakino hoi pela aia ehamai i Keakua, ia mevaꞌai muli Keakua.

⁴ Ia kena Jesus emasiꞌe iluna, noui keuahu aia la ikaha, kena iko pamalo nosai hakiꞌe kemanava aia.

⁵ Kena inini kevai kea iloko {pesoni}, kena iꞌamaka nosolo nakapuae nakama kaukali aia la, ia ihapaupaꞌu nakapuae nakama la pamalo la.*f17*

⁶ Jesus ukae aꞌe i Simon Peter, ia kama la eme aꞌe Jesus, “Kealiꞌi. Aꞌoe mesolo nakapuae anau hoi?”

⁷ Ko Jesus ime aꞌe kama la, “Aꞌoe semakino hea anau ehuli aku vahonei, ia imuli, aꞌoe memakino.”

⁸ Ia Peter eme aꞌe, “Sekau pela aꞌoe isolo nakapuae anau!” Ko Jesus ime aꞌe, “Poi anau sesolo aꞌoe nomakahua, kena aꞌoe mesehikama kaukali anau.”

⁹ Ko Simon Peter ime aꞌe, “Kealiꞌi. Aꞌoe isesolo nakapuae anau oia. Solo nalima ma pohoulu anau hoi.”

¹⁰ Ko Jesus ime aꞌe, “Poi hekama eꞌauꞌau, kinokama kama la emakahua. Kapuae aia la eꞌele oia. Okou emakahua, ia seai okou hakoa.”

¹¹ Jesus namakino avale kekama meihaꞌali aꞌe aia i nakama hamakua. Kela hea kama la emea ma, “Ia seai okou hakoa.”

¹² Jesus esolo nakapuae nakama la nooki, kena iꞌahu muli keuahu aia la, kena ivaꞌai muli keꞌina aia enoho la, kena ime aꞌe, “Okou makino hea anau ehuli aku okou?

¹³ Okou emea pela anau eaoaꞌo okou, ia ma anau o Kealiꞌi okou. {Kenei anau} nei. Kena nakakala okou na ekonu.

¹⁴ Anau Kealiꞌi okou. Ia niaina anau eaoaꞌo okou, anau esolo nakapuae okou. Kena okou ekau kesolo nakapuae alakama okou hoi.

¹⁵ Anau ehuli aku okou nakipukipu kekonaꞌi alakama, kena okou ikau keme pela hoi.

¹⁶ Anau eme aku okou kehamaoni. Kama hamakua la ehananiu iluna kama heheaꞌu aia la. Ia kama kela ehaunalia alakama iꞌave nakakala aia la ehamakua iluna kekama aia ehaunalia la.

¹⁷ Okou uailoa nakakala nei. Ia poi okou ekaukali namenei, okou mehakapu lia Keakua.

¹⁸ “Anau seme pela okou hakoa ekaukali nakakala nei. Anau makino laoi nakama anau nikini la. Ia nakakala kelauniu kapu meihuli mai nohamaoni, ‘Niaina kama la eꞌai naꞌai anau, kama la eliloko anau.’

¹⁹ Anau ekakala aku okou namea nei vahonei, imua kela namea nei meapihi mai. Pela okou meihakina pela {Kenei anau}.

²⁰ Anau eme aku okou kehamaoni. Poi hekama ehihai nakama kela anau mehaunalia la, kama la ehihai anau hoi. Ia ehihai kekama kela ehaunalia iho anau.”

Judas mehaꞌali aꞌe Jesus i nakama hamakua la

²¹ Jesus ekakala penei, kena ialoha haeꞌo nome aꞌe, “Anau eme aku okou kehamaoni. Hekama okou mehaꞌali aꞌe anau i nakama eliloko anau la.”

²² Nakama kaukali la ukipuaina, kena uꞌilaꞌila solakou. Ia nakama la semakino oai kekama Jesus ekakala la.

²³ Kekama Jesus elaoi la*f18* enoho kapili aꞌe Jesus.

²⁴ Kena iko Simon Peter iꞌani aꞌe kama la nomea ma, “Vasili aku kama la maia ekakala na oai.”

²⁵ Ko kama la ihakiꞌe nohapale aꞌe, kena ivasili aꞌe, “Kealiꞌi, kena oai?”

²⁶ Ko Jesus ime aꞌe, “Anau meihui halaoa, kena uau aꞌe kama la.” Kena Jesus eko kemuli halaoa la ihasuu, kena iau aꞌe Judas, kama Simon Iscariot.

²⁷ Keualoko Judas eꞌai halaoa la, kena Satan ukau iloko kama la. Ko Jesus ime aꞌe Judas, “Haikaalualu!”

²⁸ Ia nakama kaukali la semakino aiea Jesus kakala penei laea.

²⁹ Alakama ehakaꞌoko pela ma Jesus emea Judas ihaele nosui hea lakou hihai keꞌai la. Ia ehoꞌi aꞌe nimea ma nakama haaloha la. Mai Judas elolosi kemuli opu namoni lakou.

³⁰ Judas eko halaoa la, kena ihaele imaka hale. Kela keualoko kepo.

Kuaa vahonei

³¹ Judas uhaele, kena iko Jesus ime aꞌe, “Keualoko nei, Keakua meihuli aku namahi {kama ekipu kama}. Ia kama la mehuli aku namahi Keakua.

³² Ia Keakua soia meihuli aku namahi kama la vahonei oia.

³³ “Aukama. Anau menoho ma okou kamaualoko oia. Okou meisesee i anau. Ia anau ekakala aku okou vahonei hea anau nikakala aꞌe nakama hamakua na{Jiu} la. Okou selavaa keo i keꞌina anau mehaele la.

³⁴ “Kena vahonei anau eme aku kuaa vahonei. Laoi alakama. Okou ilaoi alakama ehau poi anau elaoi okou soꞌokou.

³⁵ Poi okou elaoi alakama, kena nakama hakoa meimakino pela okou ekaukali anau.”

Peter meipula aꞌe pela aia semakino Jesus

³⁶ Kena Peter evasili aꞌe Jesus, “Kealiꞌi. Aꞌoe mehaele ihee?” Ko Jesus ime aꞌe, “Vahonei aꞌoe selavaa kekaukali mai anau i keꞌina anau mehaele la. Ia aꞌoe meikaukali mai anau imuli.”

³⁷ Ia Peter eme aꞌe, “Kealiꞌi. Aiea anau selavaa kekaukali aku aꞌoe vahonei naea? Anau ukanakana imake maꞌoe!”

³⁸ Ko Jesus ime aꞌe, “Aꞌoe ukanakana hamaoni imake manau? Anau eme aku aꞌoe kehamaoni. Imua kemoa kane la mekani, aꞌoe meipula koukolu naualoko pela aꞌoe semakino i anau.”