James 5 - Luaniua New Testament

Nakama haimoni ilolosi hamakonu

¹ Halono mai, okou nakama haimoni. Okou ikanikani hamaloa, maikinimea nakapahala la mekae aku i okou. Keakua mehakonukonu nakipukipu saꞌino okou la penei.

² Naheheaꞌu okou la meoki. Nalolona iloko napapa la meiꞌai napamalo okou la nomasasae.

³ Ia napahaku emea ma napahaku eꞌiva okou la mepili kia. Niaina okou ehakau komaꞌi naheheaꞌu ikonaꞌi okou i keaho haoki, namela mesaꞌino oia, kena mehuli aku pela okou esala. Keualoko namea la mekunia nakinokama okou, kena okou mehalono lihu haeꞌo.

⁴ Okou seau aꞌe nasui nakama kela eheheaꞌu iloko napaupaꞌu okou la. Nakama la ekaumaluu, kena Keakua Hananiu elono nakakala nakama la. Ia kemela ehuli aku pela okou esala hoi.

⁵ Keualoko okou oinoho i kemaalama nei, okou ekuku laoi, kena ihai huli. Ia emea pela okou ekanakana naola okou ihalono lihu i keaho haoki la. Ehau poi namanu kela ekaloa lia la nohalono lihu.

⁶ Okou ehai aꞌe nakama ekonu kahi la, ia nakama la sevuhu muli maꞌokou. Ia kena okou ekaa nakama la nomake.

Noho Havalekoa

⁷ Aukaina. Okou inoho havalekoa, ikae keualoko Kealiꞌi mehamai. Ila aꞌe. Nakama elolosi paupaꞌu enoho kali iloꞌu keua, imea nalaꞌau paupaꞌu la ihua laoi.

⁸ Ia kena okou inoho havalekoa hoi, ia kaohi mau nahakina okou. Maikinimea Kealiꞌi ukapili ihamai.

⁹ Aukaina, okou isekamumu, aoki Keakua mehakonukonu okou. Ila aꞌe. Kama hakonukonu la ukae mai.

¹⁰ Aukaina. Okou imanaku nakama kela ehakae nakakala Keakua la. Nakama la ekakala i kemale Kealiꞌi. Ia niaina ma nakama la ehalono lihu, nakama la oinoho havalekoa oia.

¹¹ Kakou emakino pela nakama enoho havalekoa la ehakapu lia Keakua. Okou elono hoi pela Job ninoho havalekoa keualoko aia ehalono lihu la. Kena okou emakino pela Kealiꞌi ekonaꞌi kama la, maikinimea aia ealoha nakama hakoa.

¹² Aukaina. Hakaꞌoko nei ehamakua. Poi okou ekakala hamaoni, okou sekapa kevaelani, ma kemaalama nei, ia ma alamea hoi. Poi okou emea pela “ino”, kena kakala pela “ino”. Ia poi okou emea pela “seai”, kena kakala pela “seai.” Aoki Keakua mehakonukonu okou.

Hakina keloku

¹³ Ea? Nakapahala la ukae aku okou? Kena okou iloku aꞌe Keakua. Ea? Okou ehihia? Kena okou ihuhua hamaha i Keakua.

¹⁴ Ea? Ame hekama okou elavea, kena okou ialu nakama hamakua keloku io aku noloku, kena iamusi kama na kelo hala i kemale Kealiꞌi.

¹⁵ Keloku nakama ehakina la mekonaꞌi kama lavea la nomaakala, ia Kealiꞌi mehamasiꞌe kama la ikaha ma kemahana aia la. Ia poi kama la epena namesala, Kealiꞌi mehaialoha kama la hoi.

¹⁶ Ia kena okou nahakina ana ihaꞌali aꞌe nahaisala okou i alakama keloku, ia loku aꞌe Keakua ikonaꞌi okou, pela okou mekaualeꞌa muli. Keloku kekama ekonu kahi ehuli aꞌe namahi elahi. Kena namea aia eloku la meiapihi aku.

¹⁷ Elijah ehakakae nakakala Keakua imua lo. Ia kama la hekama poi kakou. Kama la eloku aꞌe Keakua pela keua la meseloꞌu. Ia kena iloko koukolu nahekau ma kalunaoa namalama, sehiua eloꞌu iluna henua la.

¹⁸ Kena imuli, Elijah eloku aꞌe Keakua hoi, kena keua la uloꞌu iho nomea nalaꞌau la hakoa nohuhui.

¹⁹ Aukaina. Ame hekama okou ekiaꞌi kehamaoni Keakua, kaualeꞌa pela kelaa kama okou ehakaꞌi mai muli kama na.

²⁰ Okou imakino kemenei. Poi hekama ehakaꞌi mai kama haisala la ikaha ma namakeala esala, kama na ekonaꞌi kama haisala la isemake. Ia nahaisala kama la hakoa meseai.