James 4 - Luaniua New Testament

Nakipukipu saꞌino kemaalama nei

¹ Okou ehakaukau ia evuvuhu soꞌokou, maikinimea okou ehakekele kahi i namea okou ehihai la.

² Okou emanaꞌo komaꞌi namea, ia okou sehimea eko. Ia kena okou ekaa kama, ia emanava sano. Ia okou oiseko namela. Kena okou ehakaukau ia evuvuhu. Ia okou mesehimea eko, maikinimea okou seainoa aꞌe Keakua.

³ Ia niaina okou eainoa aꞌe Keakua, okou meseko. Maikinimea okou seainoa konu namela. Okou hihai ikahao ma namela oia.

⁴ Ia okou ukiaꞌi Keakua, ehau poi kehine ehai huli nokiaꞌi keꞌavana aia. Kena okou ikau kemakino kemenei. Nakama kela ehihai nakipukipu saꞌino kemaalama nei, meliloko Keakua, kena mehakauꞌaa ma kama la hoi.

⁵ Ea? Okou ehakaꞌoko pela nakakala kelauniu kapu nei esehamaoni? “Niaina ma Keakua ehaola kakou, Kakou ehihai imanava sano oia.”

⁶ Ia niaina ma nakipukipu kakou la esaꞌino, Keakua ekauhano kelolosi laoi kakou nokaualeꞌa. Nakakala nei emau iho iloko kelauniu kapu. “Keakua ehakauoki ma nakama eahu, Ia elolosi laoi nakama pasemuu.”

⁷ Ia kena okou ihalono Keakua, ia hakauꞌaa ma Satan, imea kama la ikele ikaha maꞌokou.

⁸ Okou ihamalumalu kahi Keakua, imea kama la ikapili aku i okou. Okou nakama haisala ihakea naola okou imakahua. Ia poi nahakaꞌoko okou esehanakahi, kena okou ihakonu nahakumanava okou, nokiꞌe ikaha ma nahaisala okou.

⁹ Okou ikau kekipuaina, ia kanikani kealoha okou. Okou iseꞌakaꞌaka, ia ikanikani avale. Okou isehihia, ia enoho kipuaina oia.

¹⁰ Okou ihamalumalu Kealiꞌi, kena kama la meisau okou ialuna.

Sehakonukonu alakama

¹¹ Aukaina. Okou iseveuveꞌu alakama. Poi hekama eveuveꞌu kelaa kama, kama na eveuveꞌu nakuaa Keakua. Ia poi hekama ehakonukonu kelaa kama, kama na soia ehakonukonu nakuaa Keakua la hoi. Ia keualoko okou ehakonukonu nakuaa Keakua la, okou esekaukali nakuaa la, ia okou ehaiꞌahi pela okou ehamakua iluna nakuaa la oia.

¹² Keakua eau iho nakuaa, kena kama la soia ekau kehakonukonu nakama hakoa. Kama la soia elavaa kekonaꞌi alakama iola, ia ikaa alakama imake. Ia okou sekau kehakonukonu alakama.

Okou iseahu

¹³ Halono mai. Okou ekakala ma, “Ame keaho nei ma kaiao kakou meikaꞌa kelaa makaꞌina ma naheheaꞌu kakou nei nonoho ilaa hekau hokahi, imea alakama io mai nosusui naheheaꞌu kakou nei, iko kakou komaꞌi namoni.”

¹⁴ Ia okou semakino pela kaiao, naola okou meikipu pehe. Okou ehau ma kenehu, kela amepili kamasaika oia, kena useai.

¹⁵ Kela hea okou ekau kekakala penei, “Ame Kealiꞌi ehihai, kena kakou amenoho nopena pela.”

¹⁶ Ia vahonei okou ekakala ahu nahakaꞌoko okou la, ia kipukipu la esala.

¹⁷ Ia kena nakama kela eailoa kepena namea kaualeꞌa, ia sepena namela, nakama la esala.