James 3 - Luaniua New Testament

Lolosi hamakonu nakakala okou

¹ Aukaina, ame kaualeꞌa pela nakama aoaꞌo okou la emoisi oia. Okou emakino pela Keakua meihakonukonu makou nakama aoaꞌo la elaꞌa iluna ma alakama.

² Kakou hakoa epena namea esala. Ia poi hekama esepena namesala i nakakala aia la, kama na ekonu kahi, kena elavaa kelolosi hamakonu aia soia.

³ Kakou esaisai kemea soliliꞌi iloko puꞌua ke{hosi}, kena ipalepale navahi kemela, imea ke{hosi} la ihakiꞌe pohoulu aia, pela ihaele i keꞌina kakou hihai ihaele la.

⁴ Navaꞌa hakua eme pela hoi. Niaina kevaꞌa la elahi haeꞌo, ia eꞌavea lia i kemakani haimahi. Ia kehoe soliliꞌi la eulu kevaꞌa elahi la nokele i keꞌina kela kealiꞌi kevaꞌa la ehihai ihaele la.

⁵ Kealelo kekama eme pela hoi. Niaina ma kealelo la esoliliꞌi, kemea la elavaa kekakala ahu. Lolosi. Komaꞌi nahie evela sia kamaa ahi la oia.

⁶ Ia kealelo ehau poi kamaa ahi la. Kemela elavaa kemea komaꞌi namea nosaꞌino, kena elavaa kemea kinokama la nosaꞌino hoi. Satan soia eusuusu nakama imea naalelo ikakala namea saꞌino, pela imea naola nakama kemaalama nei nosaꞌino hoi.

⁷ Kekama elavaa kehakalakala komaꞌi namanu kakaloko; namanu lelele, namoꞌo, ia ma naiꞌa kemoana.

⁸ Ia sehikama elavaa kehakalakala kealelo ikakala kahi namea kaualeꞌa. Kealelo la ekakala hahikihiki avale. Kemela esaꞌino haeꞌo, kena elavaa kemea komaꞌi nakama ihalono lihu nomake.

⁹ Kakou ehamaha Keakua Kamana ma naalelo kakou. Kena kakou oikamoa haeꞌo i alakama. Ia ala nikama kela Keakua epena iho i kekipu aia.

¹⁰ Napuꞌua kakou ehamaha, ia kena ekamoa haeꞌo hoi. Aukaina. Kipukipu la esekonu.

¹¹ Kemakaa vai hokahi selavaa kehaꞌo iho kevai kea ma kevai lokai.

¹² Aukaina. Selavaa hekama keꞌahi naniu iluna nanaku. Ia selavaa hekama keꞌahi nanaku iluna nalunasu. Ia kemakaa vai emala selavaa ihaꞌo iho kevai malie.

Keakamai ialuna

¹³ Poi hekama okou eakamai ia emakonu, kena kama la ikau kenoho pasemuu, kena ihuli aꞌe nakipukipu kaualeꞌa aia la.

¹⁴ Ia poi okou emanava sano, ia emamaeꞌaa alakama, kena okou isekakala ahu pela okou eakamai. Nakakala okou la esehamaoni.

¹⁵ Kipukipu keahu la eseakamai, ia sehaele iho i Keanana Kapu ialuna. Kipukipu la ekaukali kehakaꞌoko nakama kemaalama nei, ia ehamai nakipua saꞌino la oia.

¹⁶ Poi nikama kemakaꞌina emanava sano ia emamaeꞌaa alakama, kena nakama la mehakauoki, kena ipena namea saꞌino oia.

¹⁷ Ia poi hekama eakamai hamaoni,*f2* kama na mehakea keola aia, kena menoho laoi ma alakama. Kama na mepasemuu, ia mehalono nakakala alakama. Kama na mehaialoha alakama, kena ipena namea kaualeꞌa. Hakaꞌoko aia ehanakahi, kena kama na eselavaa kekakala uhiuhi.

¹⁸ Nakama pasemuu la enoho laoi ma alakama, imea komaꞌi nakama ikonu kahi.