James 2 - Luaniua New Testament

Laoi nakama hakoa

¹ Aukaina. Okou ehakina pela Jesus Christ Kealiꞌi kakou la soia ehananiu. Ia kena okou isesapai alakama ihananiu.

² Poi hekama haimoni ehaele aku hale loku okou la, kama la amekalo kemoni pahaku mea, ia hahao naheheaꞌu suinaka. Ia poi hekama haaloha ehaele aku hale loku okou la, kama la ameleleu keapaapa oia.

³ Okou amehamaha kekama haimoni la, kena ime aꞌe kama la ihamai nonoho imua. Ia okou ameme aꞌe kekama haaloha la ikuu i makahale, ia ihanoho i keꞌina moulalo soia.

⁴ Ia keualoko okou ehavaꞌee nakama la penei, okou ehakonukonu nakama haaloha la. Ia kehakaꞌoko okou la esaꞌino oia.

⁵ Aukaina. Halono mai. Keakua ehilihili nakama haaloha i kemaalama nei ihakina haimahi aia, pela nakama la mehamakua i kenoholana aia la. Ia kama la ekakala hamaoni iau aꞌe kenoholana la i nakama kela elaoi aia la.

⁶ Ia okou ehanaꞌino nakama haaloha la. Okou ehamaha nakama haimoni la. Ia ala nikama kela ememe haeꞌo kia okou, kena iꞌave okou imua nakama hakonukonu.

⁷ Ia kela mea hoi. Nakama haimoni la ekamoa haeꞌo kemale kaualeꞌa Kealiꞌi okou la.

⁸ Ame kaualeꞌa pela okou ihalono kuaa hananiu nei, kela emau iloko kelauniu kapu, “Laoi alakama, ihau poi aꞌoe elaoi soꞌoe.”

⁹ Ia poi okou esapai nakama okou hihai la oia, kena hea okou epena la esala. Ia kuaa la ehuli aku pela okou esekaukali nakuaa Keakua la.

¹⁰ Oai kekama haiꞌahi pela aia ikaukali nakuaa hakoa, ia sekaukali kuaa hokahi, kama na esala i kevahi nakuaa la hakoa.

¹¹ Keakua ekakala ma, “Okou iseꞌalemaka ailalao”, ia “Sekaa kama.” Poi okou seꞌalemaka ailalao, ia okou ekaa kama, eme pela okou sekaukali hamaoni nakuaa la.

¹² Kuaa hananiu la amehakana okou ikaha ma namea saꞌino. Ia Keakua mehakonukonu okou kaukali kuaa la hoi. Ia kena okou ikakala ia ipena namea ikau ma kuaa la.

¹³ Poi okou sehaialoha alakama, kena Keakua mesehaialoha aku okou, ia mehakonukonu okou avale. Ia nakipukipu kehaialoha alakama ehananiu iluna nakipukipu kehakonukonu alakama.

Penapena name konu ihuli aꞌe nahakina okou

¹⁴ Aukaina. Ame hekama ekakala maia ehakina, ia sehimea epena ihuli aꞌe kehakina aia la, kena kama na ekakala vale oia. Kehakina la selavaa kekonaꞌi aia.

¹⁵ Poi nikama keloku sehipamalo, ia sehimea iꞌai,

¹⁶ ia okou ekakala aꞌe nakama la ma, “Okou oikaha ia noho laoi. Leleu napamalo kaualeꞌa, ia iꞌai nopohu.” Ia poi okou seau aꞌe nakama la nimea ikonaꞌi lakou, kena okou ekakala vale oia.

¹⁷ Poi okou emea pela okou ehakina, ia sehimea epena ikonaꞌi alakama, kena kehakina okou na esehamaoni.

¹⁸ Ia poi hekama emea maia ehakina, ia eme manau epena namea ekonu, kena anau amesui muli aꞌe nakakala aia la penei, “Aꞌoe eme pela aꞌoe mehuli mai kehakina aꞌoe, ia sehimea epena iꞌike anau. Ia anau amepena namea ekonu ihuli aku kauhakina.”

¹⁹ Ea? Okou ehakina pela Keakua ehananiu? Kaualeꞌa. Nakipua saꞌino la ehakina pela hoi, kena epole i lakou makaꞌu.

²⁰ Aꞌoe evale oia. Poi aꞌoe haiꞌahi pela aꞌoe ehakina, ia sehimea epena ihuli aꞌe kehakina aꞌoe la, kena aꞌoe ehakina vale oia. Ea, aꞌoe hihai anau ihuli aku kehamaoni nakakala nei?

²¹ Kipuna kakou Abraham ehakina Keakua, kena ihoꞌi aꞌe kanakama Isaac iluna ke{olta}. Keualoko Abraham epena kemea ekonu la, Keakua ehakaꞌoko pela kama la ekonu kahi i namaisu aia.

²² Okou eꞌike pela kehakina kama la ehanakahi ma namea aia epena la. Keualoko aia nipena namea ekonu la, kehakina aia la uꞌakoa.

²³ Kena nakakala kelauniu kapu la ehuli mai nohamaoni, “Abraham ehakina i Keakua, kena Keakua ehakaꞌoko pela kama la ekonu kahi i namaisu aia.” Kela hea Abraham hesoa laoi Keakua.

²⁴ Kena okou emakino kemenei. Poi hekama epena namea ekonu ihuli aꞌe kehakina aia, kena kama na amekonu i namaisu Keakua. Ia seai pela nakama kela ehakina ia sehimea epena.

²⁵ Rahab eme pela hoi. Niaina kehine la ehai huli, kama la epena namea ekonu hoi. Rahab eko koꞌolua nakama haakiaki la nohuu iloko hale kehale aia la. Ia kena kehine la ekonaꞌi nohasao koꞌolua la i kela ala. Kela hea kehine la ekonu kahi i namaisu Keakua.

²⁶ Poi kinokama kekama esemanavanava, kama na umake. Ia poi hekama ehakina, ia sepena namea ekonu, kena kehakina kama na useai pela hoi.