Hebrews 9 - Luaniua New Testament

Kipukipu kehamalumalu Keakua imua

¹ Kipukipu kehamalumalu Keakua imua eisi nakuaa. Ia eisi keꞌina ekapu hokahi iloko kemaalama nei ihamalumalu kama la hoi.

² Nakama imua la ehakuu hale kapolo ihamalumalu Keakua. Ia puikana amaka iloko hale la ekapa ma “keꞌina ekapu.” Nakama la ehakuu keꞌahi ihamasina keꞌina la, kena ihakuu {sevolo} nohapili nahalaoa ekapu la iluna {sevolo} la ihoꞌi aꞌe Keakua.

³ Ia pamalo elahi epui puikana hasiaoa iloko hale kehale la. Keꞌina la ekapa ma “keꞌina ekapu haeꞌo.”

⁴ Nakama la ehakuu ke{olta} pahaku mea iloko puikana la ikuni ke{incense}. Ia nakama la ehakuu kepapa euhi lia pahaku emea ilaa hoi. Kepapa la hehaꞌaku kela nakakala ivi Keakua. Ia kelo pahaku mea emoe iloko kepapa la, epii halaoa kela Keakua niau aꞌe keonohenua kakou imua. Kelaꞌau Aaron kela nisomo mai imua la emoe iloko kepapa la, ia sahakupaa kela Keakua nikakaa nakuaa emoe ilaa hoi.

⁵ Ia siaoa na{enselo} pahaku mea ekuu iluna kepapa la. Sa{enselo} la eꞌivaꞌiva lo, kena ehuli aꞌe namahi Keakua. Napaꞌau sakoꞌolua la ehola valuna keꞌina la, keꞌina kela Keakua usuꞌui muli ma keonohenua aia la. Ia vahonei, anau sehiualoko ekakala hanoko aku name nei.

⁶ Naheheaꞌu la ehamoe konu hakoa. Ia kena namaakua la ehaele kahi iloko puikana amaka la noheheaꞌu ilaa.

⁷ Ia kemaakua hamakua la soia elavaa kehaele iloko puikana hasiaoa kehale la. Hekau ma hekau, kama la ehaele iloko keꞌina la heualoko hokahi oia. Ia keualoko kama la ehaele iloko puikana la, kama la eko kekoko ihaele maia nohoꞌi aꞌe Keakua, pela isolo nahaisala aia la ikaha, ia isolo nahaisala keonohenua la ikaha hoi. Alaualoko nakama la seailoa pela lakou ehaisala.

⁸ Keualoko kakou ehakaꞌoko namenei, Keanana Kapu ehaꞌali mai kakou keala kela ekae keꞌina ekapu lo. Ia kulana kehale kapolo la oikuu, keala la epui.

⁹ Ia kipukipu imua la ehuli mai kakou kemenei. Niaina ma namaakua imua la ekuni namanu la nohoꞌi aꞌe Keakua. Nakama la sehakaꞌoko pela lakou ekonu kahi i namaisu Keakua.

¹⁰ Nakama la ekaukali nakipukipu imua i kevahi naꞌai lakou eꞌai, ia ma kevai lakou eunu la. Ia ekaukali hoi nakuaa i kevahi keꞌauꞌau nakinokama lakou nomakahua. Ia nakipukipu la sekonaꞌi hamaoni naola lakou. Ia nakama la oikaukali nakipukipu imua la, nokae keualoko Keakua ehakuu nakipukipu vahonei.

Kipukipu kehamalumalu Keakua vahonei

¹¹ Christ umemo maakua hamakua, pela iau mai kakou namea kaualeꞌa. Vahola, kama la sehaele valoko hale kapu kemaalama nei. Seai. Emeia kama la ehaele valoko kehale ekapu ialuna. Ia kehale la elaoi aꞌe ma kehale kapu kela nakama kemaalama nei epena la.

¹² Keualoko Christ ehaele iloko keꞌina ekapu la, kama la seko kekoko na{nanikoti}, ia ma kekoko na{bulumakau}. Seai. Emeia kama la ehoꞌi aꞌe kekoko aia soia, ilavaa aia kehaele iloko keꞌina ekapu la. Pela aia ehasao kakou ikaha ma namahi nahaisala naualoko hamau.

¹³ Namaakua imua la eko kekoko na{nanikoti} ia ma kekoko kela namanu kanaka kela na{bulumakau}. Ia nakama la eko nalehu kemanu hine kela na{bulumakau} la, pela inini aꞌe iluna nakama haisala. Imea nakama la imakahua i kevahi nakuaa.

¹⁴ Ia kekoko Christ ehananiu iluna kekoko namanu la. Kama la ehoꞌi aꞌe aia soia i namahi Keanana Kapu, kela eola kahi. Ia Christ sehimea esala i namaisu Keakua. Kena kekoko aia la elavaa kesolo naola kakou imakahua, imea kakou isekaukali nakipukipu kemake. Pela kakou amelavaa keheaꞌu ma Keakua kela eola hamaoni.

¹⁵ Christ eheheaꞌu kaukali nakakala ivi Keakua vahonei la, pela ihapoꞌi aꞌe nahakina ana la ma Keakua. Nahakina ana la ehaisala i kevahi nakuaa imua la. Ia Christ emake nohasao nakama la ikaha ma namahi nahaisala la. Ia kena Keakua eme aꞌe nakama la iko nakuhana lakou, ehau poi aia nikakala hamaoni iau aꞌe ma lakou.

¹⁶ Ame hekama makua ekuꞌu nakakala eivi aia la, pela saika aia memake, nakamaliꞌi aia la amekaukali nakakala aia la. Kena nakama la ehakali. Ia keualoko lakou eailoa laoi pela kama la umake, kena nakama la eꞌamaka nokaukali nakakala aia la.

¹⁷ Ia kulana kama la oiola, nakama la seꞌamaka nopena hea aia ekakala la. Hakali saika kama la emake.

¹⁸ Ia kakala eivi Keakua imua la emea pela hoi. Keualoko namanu la umake, kena kekoko la ehuli aꞌe pela keonohenua la eꞌamaka nokaukali nakuaa Keakua la.

¹⁹ Imua, Moses nihaꞌali aꞌe nakakala nakuaa la ilono keonohenua la hakoa. Ia kena kama la eko kelaꞌau,*f3* kena isaisai naloulu na{sipisipi} emea, kena ihasuu kemela iloko kekoko napunua na{bulumakau} ehilo ma kevai kea. Kena kama la ekapi kemela iluna kelauniu nakuaa, ia iluna keonohenua la hakoa.

²⁰ Kena Moses eme aꞌe, “Kenei kekoko kela ehuli aku namahi nakakala ivi Keakua. Ala nikuaa kela Keakua eme aku okou ikaukali.”

²¹ Kena iko Moses ikapi kekoko la iluna kehale kapolo la, ia iluna naheheaꞌu ekapu kela emoe iloko hale la hoi.

²² Hamaoni. Nakuaa la emea pela kapili namea hakoa amesolo nomakahua iloko kekoko la. Ia poi kekoko seꞌo iho ikaha, kena Keakua mesesolo nahaisala ikaha.

Christ ehoꞌi aꞌe keola aia soia

²³ Namea ekapu kela emoe iloko hale kapolo la ekipu poi namea hamaoni i kevaelani. Nakama imua la ekau kekapi kekoko namanu iluna naheheaꞌu iloko hale la, imea namea la imakahua i namaisu Keakua. Ia namea hananiu i kevaelani la amesolo hia kekoko kekama hananiu hoi.

²⁴ Nakama kemaalama nei epena kehale kapolo la. Ia kehale la ekipu poi keꞌina ekapu i kevaelani. Ia Christ sehaele iloko kehale kapolo la. Seai. Emeia kama la ehaele soia i kevaelani, pela ikuu imua Keakua nokonaꞌi kakou.

²⁵ Hekau ma hekau, kemaakua hamakua la eulu iloko keꞌina ekapu la. Vahola, kama la eko kekoko namanu ihaele maia, seai kekoko aia soia. Ia Christ sehaele kahi i kevaelani nohoꞌi aꞌe aia soia i Keakua.

²⁶ Seme pela kama la ehalono lihu kahi, amaka mai keualoko Keakua nipena iho kemaalama nei. Seai. Emeia kama la ehoꞌi aꞌe aia soia heualoko hokahi oia, kapili kehaoki kemaalama nei, pela isolo nahaisala hakoa ikaha.

²⁷ Nakama hakoa emake heualoko hokahi oia. Kena Keakua mehakonukonu nakama la.

²⁸ Ia kena Christ ehoꞌi aꞌe aia soia heualoko hokahi oia, isolo nahaisala komaꞌi kekama ikaha. Ia kena kama la meihamai imuli. Ia kama la mesehamai nosolo nahaisala ikaha. Emeia kama la meihamai nokonaꞌi nakama kela enoho kali aia la.