Hebrews 8 - Luaniua New Testament

Jesus kemaakua hamakua kakou

¹ Hakaꞌoko hamakua makou emea penei. Pela kemaakua hamakua kakou la enoho i kevahi laua kenoholana Keakua i kevaelani.

² Kama la eheheaꞌu iloko keꞌina ekapu ialuna. Ia Keakua soia ehakuu kehale hamaoni la, seai kekama.

³ Keakua ekini namaakua hamakua imua iau aꞌe aia nahoꞌi keonohenua, ia ikuni kuni namanu ihoꞌi aꞌe i aia hoi. Kena kemaakua hamakua ialuna ekau kehoꞌi aꞌe Keakua hoi.

⁴ Ia keualoko kama la enoho iloko kemaalama nei, kama la sememo maakua poi namaakua imua la. Maikinimea nakama la solakou eau aꞌe nahoꞌi lakou, kaukali nakipukipu nakuaa Moses la.

⁵ Ia namaakua kemaalama nei la eheheaꞌu iloko kehale kapu kemaalama nei. Ia kehale la ekipu poi kehale kapu kevaelani. Ia kena keualoko Moses nihakuu hale kapolo, Keakua ekakala aꞌe kama la penei, “Lolosi hamakonu. Aꞌoe ihakuu kehale na, kaukali hea anau ehuli aku aꞌoe iluna kemouna la.”

⁶ Ia nakakala ivi Keakua la ehananiu iluna nakakala nakuaa la. Jesus eheheaꞌu kaukali nakakala ivi Keakua vahonei la, pela ihapoꞌi aꞌe nahakina ana la ma Keakua. Ia namaakua imua eheheaꞌu kaukali nakuaa imua la. Kela hea naheaꞌu Jesus la ehananiu iluna naheaꞌu namaakua la.

⁷ Nakuaa imua la seꞌakoa, kela hea Keakua emea nakakala eivi hoi.

⁸ Ia Keakua eꞌike pela keonohenua la esala i kevahi nakuaa la, ia kena kama la emea ma, “Halono mai. Kamaualoko oia, Anau memea kakala eivi vahonei ma keonohenua Israel, Ia ma keonohenua Judah.

⁹ Ia nakakala ivi anau la Mesehau ma nakakala kela anau nimea i nakipuna lakou imua la, Keualoko anau nihakaꞌi nakama la ikaha ma Egypt. Nakama la sekaukali nakakala ivi anau la. Kela hea anau ehuli anakua aꞌe i lakou.

¹⁰ Kena imuli, anau memea nakakala ivi nei Ma keonohenua Israel. Ia kena anau mekuꞌu nakuaa anau iloko nahakaꞌoko lakou. Ia anau mekakaa nakuaa la iluna nahakumanava lakou. Anau mememo Akua lakou. Ia kena nakama la mememo onohenua anau.

¹¹ Vahola, sehikama meaoaꞌo kelaa kama. Ia sehikama meme aꞌe kaina aia la, ‘Aꞌoe ikau keailoa Kealiꞌi.’ Maikinimea nakama la hakoa meailoa anau, Nakama moulalo, ia ma nakama hananiu la hoi.

¹² Kena anau mehaialoha aꞌe nakama la nia lakou esala. Ia kena mesili hia namea kela lakou epena esala la.”

¹³ Namea kuai la ehaele noseai. Kena nakuaa imua la eme pela hoi. Keualoko Keakua emea kakala ivi vahonei la, kena nakuaa imua la sehananiu iluna kakou.