Hebrews 6 - Luaniua New Testament

¹ Ia kena kakou ikiaꞌi naaoaꞌo hainahie la, kena iaꞌo nakipukipu Christ kela imea nahakina kakou la iivi. Kakou isevaꞌai muli naaoaꞌo imua la. Kakou naaꞌo avale pela kakou ikau kehaluu ikaha ma namea saꞌino kela ekaa kakou imake. Ia kakou emakino hoi pela kakou ikau kehakina hamaoni Keakua.

² Ia kakou naaꞌo avale nakipukipu kehaauꞌau kapu, ia ma nakipukipu kehapili nalima. Ia kakou emakino pela nakama umake la memasiꞌe muli ikaha ma kemake. Ia kakou emakino hoi pela Keakua mehakonukonu naonohenua la i keaho haoki.

³ Ia poi Keakua ehakana kakou iaꞌo, kena kakou meaꞌo nakipukipu Christ kela ekau ma nakama makua.

⁴ Ia nakama kela ekiaꞌi nahakina lakou la, nakama la amevaꞌai muli pehe? Imua, Keakua ehamasina naola nakama la, kena ihoꞌi aꞌe nakama la Keanana Kapu.

⁵ Nakama la namakino avale pela nakakala Keakua ekaualeꞌa. Ia nakama la naailoa avale namahi Keakua kela meiapihi mai imuli.

⁶ Ia poi nakama la ekiaꞌi nahakina lakou la, kena amehainakaa haeꞌo kevaꞌai nohakina halaoi. Eꞌila pela nakama la evaꞌai nokii muli kekama Keakua la iluna {kolosi}, kena imea kama la nonapa imua namaisu keonohenua la.

⁷ Kipukipu kakou nakama ehau poi kalina. Keua eloꞌu iluna kalina la. Kena naꞌai la esomo laoi. Kena nakama kela esasaꞌa kalina la eꞌai naꞌai kela ekau ma lakou. Kela hemea kaualeꞌa Keakua.

⁸ Ia kelaa kalina esomo napupu manamana oia. Kena nakama kela esasaꞌa kalina la memea pela kalina lakou la esaꞌino oia. Kena nakama la mekuni keꞌina la novela.

⁹ Au soa. Niaina makou ekakala penei, makou emakino laoi pela naola okou la ehau poi kalina kaualeꞌa la. Emea pela okou ekaukali nakipukipu Keakua kela meikonaꞌi okou iola.

¹⁰ Keakua ekonu kahi. Kena kama la selavaa kesili namea kaualeꞌa okou epena la, ia ma kelaoi kela okou ehuli aꞌe i aia la, kulana okou ekonaꞌi nakama ekapu aia la.

¹¹ Ia makou hihai okou hakoa imakaola kehakina hamaoni Keakua, hanokae kehaoki.

¹² Ia makou sehihai pela okou imakananae. Emeia okou ikaukali nakipukipu nahakina ana kela enoho havalekoa. Nakama la meko nakuhana kela Keakua ekakala hamaoni iau aꞌe lakou la.

¹³ Sehikama hoi ehananiu iluna Keakua. Ia kena kulana kama la nikakala aꞌe Abraham, kama la ekakala hamaoni i kemale aia soia.

¹⁴ Kama la emea ma, “Anau mehakapu aꞌoe Kena iau aku nakamaliꞌi Ma nahaimopuna komaꞌi.”

¹⁵ Ia kena Abraham enoho havalekoa. Pela aia meko namea kela Keakua nikakala hamaoni iau aꞌe i aia la.

¹⁶ Poi hekama emea kakala eivi, kama la ekapa keinoa kama hamakua aia la, ihuli aꞌe pela nakakala aia la ehamaoni. Kena nakakala la epui alakama isehakaukau maia.

¹⁷ Kena kulana Keakua nikakala hamaoni aꞌe nakama meiko nakuhana lakou la, kama la ehihai nakama la imakino laoi pela aia amea selavaa kesui kehakaꞌoko aia la. Emoe pela oia. Kela hea kama la ekakala hamaoni i kemale aia soia.

¹⁸ Ia kama la selavaa kenuku laoi, ia selavaa kesui kehakaꞌoko aia. Siaoa nakipukipu la ehapulupulu kakou io aꞌe Keakua, kena ihakina hamaoni nakakala aia eme mai kakou.

¹⁹ Nakakala hamaoni Keakua la ehau poi kaula kela ekaohi mau naola kakou. Kakou ehakina nakakala aia la. Kela hea kakou elavaa kehaele valakonu pamalo elahi kela epui keꞌina ekapu Keakua la.

²⁰ Ia Jesus ehaele ilaa imua kakou, nokonaꞌi kakou iola. Kama la umemo maakua hamakua naualoko hamau, ehau poi Melchizedek la hoi.