Hebrews 3 - Luaniua New Testament

Jesus ehananiu iluna Moses

¹ Aukaina. Keakua ekini okou, ia okou ekapu imua namaisu aia. Ia kena kakou ihakaꞌoko kahi Jesus. Keakua ehaunalia iho kama la imea mo maakua hamakua. Kena kakou ehakina hamaoni i aia.

² Keakua ekini Jesus, kena Jesus ekaukali hamaoni Keakua. Ia Moses hoi ekaukali hamaoni Keakua, keualoko aia elolosi keonohenua Keakua la hakoa.

³ Ia Jesus ehananiu iluna Moses. Ehau poi kekama kela ehakuu kehale ehananiu iluna kehale aia ehakuu la.

⁴ Nakama elavaa kehakuu nahale. Ia Keakua soia elavaa kepenapena keumea hakoa.

⁵ Moses eheheaꞌu hamaoni ma Keakua. Kena kama la ehaꞌali aꞌe haleaina Keakua la namea kela Keakua meikakala aꞌe imuli.

⁶ Ia Jesus soia kekama Keakua. Kena kama la elolosi hamaoni haleaina Keakua la. Ia kakou mesuꞌui ma haleaina Keakua la hoi. Ia kena kakou ekuu mau, ia semakaꞌu. Kakou ehihia, kena inoho kali Christ nokae kehaoki.

Nakama hakapanaka mesehamalolo

⁷ Keanana Kapu eme mai ma, “Poi okou elono keleo Keakua keaho nei,

⁸ okou isehakapanaka. Nakipuna okou imua la ekamumu haeꞌo i Keakua, Kena ihaꞌike kama la i keꞌina kukuaha.

⁹ Vahola, nakama la eꞌike namahi anau Iloko kipu haa nahekau. Ia nakama la ekauhano kehaꞌikeꞌike anau Imakino lakou namahi anau.

¹⁰ Kela hea anau eloko haeꞌo i nakama la, Kena imea ma, ‘Nakama la esekaukali anau, Ia semakino nakipukipu anau.’

¹¹ Anau eloko i nakama la, kena ikakala ivi pela, ‘Nakama la mesehamalolo manau.’ ”

¹² Aukaina. Okou ilolosi hamakonu, aoki okou amehakaꞌokoꞌoko saꞌino nosehakina, kena ikiaꞌi Keakua kela eola kahi.

¹³ Ia okou ihapulupulu alakama keaho ma keaho. Aoki nakama la amekaoleole hia namesala nohakapanaka.

¹⁴ Ia pena kakou ekaohi mau nahakina kakou imua la, nokae kehaoki, kena kakou mesuꞌui hamaoni ma Christ.

¹⁵ Nakakala nei emau iho iloko kelauniu kapu, “Poi okou elono keleo Keakua keaho nei, Kena okou isehakapanaka. Okou isehau poi nakipuna okou imua la Kela ekamumu haeꞌo aꞌe Keakua,”

¹⁶ Moses ehakaꞌi nakipuna kakou la ikaha ma Egypt. Ia niaina ma nakama la elono keleo Keakua, nakama la ekamumu aꞌe kama la oia.

¹⁷ Kela hea Keakua eloko i nakama la kipu haa nahekau. Nakama la ehaisala, kena isina nomake iloko keꞌina kukuaha la.

¹⁸ Nakama la esehalono Keakua, kena Keakua ekakala ivi pela nakama la mesehamalolo maia.

¹⁹ Kena kakou emakino pela nakama la selavaa kekae henua lakou la, maikinimea lakou sehakina ia Keakua.