Hebrews 2 - Luaniua New Testament

Halono nakakala Christ

^1-2 Imua lo, na{enselo} la ehaꞌali aꞌe nakakala hamaoni Kealiꞌi. Ia poi hekama esehalono nakakala la nopena namea esala, kena kama na mehalono lihu, ikau ma hea aia epena la. Kela hea kakou ihalono halaoi keaoaꞌo kela kakou nilono la, aoki kakou amekiaꞌi nahakina kakou.

³ Ia vahonei, Kealiꞌi ekakala mai penei. Keakua mekonaꞌi nahakina ana la iola. Nakama kela elono nakakala Kealiꞌi la eme mai kakou nakakala la. Ia poi kakou sehalono namea la, kena kakou mehalono lihu oia, selavaa kehasao. Nakakala la ehuli mai nohamaoni penei.

⁴ Keakua ehuli mai namahi aia i nahaꞌaku ia ma namea kaualeꞌa la, ia evavae aꞌe nahoꞌi Keanana Kapu, ikau ma hea aia ehakaꞌoko la.

Christ ekipu poi hekama

⁵ Keakua sehanoho na{enselo} aia la ilolosi kemaalama kela mehamai imuli, kemaalama kela makou ekakala aku la.

⁶ Ia kela hekama ekakala aꞌe Keakua ma, “Ea? Aꞌoe ehakaꞌoko maha i kekama? Ia aꞌoe meilolosi laoi kama ekipu kama.

⁷ Aꞌoe ekuꞌu kama la ilalo na{enselo}, ia hamalie oia. Ia vahonei, aꞌoe ehamaha kama la, Kena isapai kama la ialuna i namahi aꞌoe.

⁸ Kena imea kama la ilolosi keumea hakoa.” Vahola, Keakua emea kama la ihananiu iluna keumea la hakoa. Ia vahonei, kakou seꞌike pela kama la elolosi namea la.

⁹ Ia kakou eꞌike hamaoni Jesus. Keakua ekuꞌu kama la ilalo na{enselo}, ia hamalie oia. Ia kena Jesus ehalono lihu nomake. Kela hea Keakua ehamaha kama la, kena isapai kama la ialuna i namahi aia. Keakua elolosi laoi nakama hakoa. Kela hea Jesus emake nokonaꞌi nakama la.

¹⁰ Keakua epenapena keumea la hakoa, kena elolosi namea la hakoa i namahi aia. Ia kama la ehihai isau komaꞌi kekama ialuna. Kela hea kama la ehaunalia iho Jesus nohalono lihu, pela keola Jesus meiꞌakoa. Kena kama la elavaa kekonaꞌi nakama hakoa iola.

¹¹ Jesus ehakea naola nakama la, pela nakama la amekaukali hamaoni nakipukipu Keakua. Kena Jesus esuꞌui ma nakama la, pela lakou mememo kinokama hokahi. Kela hea kama la senapa kekapa nakama la ma nikaina aia.

¹² Jesus eme aꞌe Keakua pela, “Anau mehaꞌali aꞌe nakaina anau la nakipukipu aꞌoe. Keualoko nahakina ana la meꞌuku hakoa, Anau mehuhua hamaha i aꞌoe.”

¹³ Ia Jesus ekakala hoi ma, “Anau ehakina hamaoni Keakua.” Kena ime aꞌe hoi ma, “Kenei anau, ma nakamaliꞌi kela Keakua niau mai manau.”

¹⁴ Nakamaliꞌi Keakua la nikama oia. Ia kena Jesus ehanau poi hekama hoi, pela aia amelavaa kemake. Ia keualoko Jesus emake iluna {kolosi}, kama la eseu namahi Satan. Imua, Satan elavaa kekaa naonohenua la nomake.

¹⁵ Ia kena kama la ekaohi mau naola nakama la i namahi aia la. Kena nakama la hakoa emakaꞌu haeꞌo kemake. Ia vahonei, Jesus ehasao nakama la ikaha ma namahi kemake.

¹⁶ Ia kama la ekonaꞌi namopuna Abraham*f1* iola, ia seai pela na{enselo}.

¹⁷ Kela hea Jesus ehanau iho iloko kemaalama nei la, pela aia mehau poi nakaina aia la. Pela kama la amelavaa keheheaꞌu kahi poi hemaakua hamakua imua namaisu Keakua. Ia kena Jesus ehaialoha keonohenua la, kena isolo nahaisala nakama la ikaha.

¹⁸ Jesus elavaa kekonaꞌi nakama kela kaoleole hia Satan. Maikinimea aia soia hoi ekaoleole hia Satan, ia kena ehalono lihu hoi.