Hebrews 10 - Luaniua New Testament

¹ Nakuaa Moses la ekipu poi namea kaualeꞌa kela meio mai imuli. Ia nakuaa la ehau ma kemalu namea la oia. Niaina ma keonohenua la eo nohoꞌi aꞌe namanu la hekau ma hekau, nahoꞌi la selavaa kemea nakama la ikonu kahi imua namaisu Keakua.

² Ame nahoꞌi la elavaa kemea nakama la ikonu kahi, kena nakama la amehoꞌi aꞌe namanu la nosolo nahaisala lakou la nooki. Nakama la amehakaꞌoko pela lakou seisi nahaisala, kena isehoꞌi aꞌe alamanu hoi.

³ Ia keualoko nakama la ehoꞌi aꞌe namanu la hekau ma hekau, nakama la emanaku kahi nahaisala lakou la.

⁴ Maikinimea kekoko kela na{bulumakau} ia ma na{nanikoti} la selavaa kesolo nahaisala ikaha.

⁵ Ia kena keualoko Christ nihamai iloko kemaalama nei la, kama la eme aꞌe Keakua, “Aꞌoe sehihai keonohenua la ihoꞌi aku namanu, Emeia aꞌoe ekanakana kinokama anau ihoꞌi aku aꞌoe.

⁶ Aꞌoe sehihai keonohenua la ikuni namanu ihoꞌi aku aꞌoe, Pela isolo nahaisala lakou ikaha.

⁷ Kena anau eme aku aꞌoe, ‘Kenei anau. Keakua, anau ehamai nohalono i aꞌoe.’ Ia nakipukipu anau nei nimau iho iloko kelauniu kapu.”

⁸ Imua, Christ eme aꞌe Keakua, “Aꞌoe sehihai nakama la ihoꞌi aku namanu. Ia aꞌoe sehihai nakama la ikuni namanu ihoꞌi aku aꞌoe, Pela isolo nahaisala lakou la ikaha.” Niaina ma nakama la ehoꞌi namanu la ikaukali nakuaa, Christ emea ma Keakua sehihai nahoꞌi la.

⁹ Kena Christ eme aꞌe Keakua, “Kenei anau. Anau ehamai nohalono i aꞌoe.” Emea pela Christ ehamau nahoꞌi la, pela aia mehoꞌi aꞌe soia.

¹⁰ Ia kena Christ eaunahie kehoꞌi aꞌe kinokama aia soia heualoko hokahi, pela ihakea naola kakou.

¹¹ Keaho ma keaho, namaakua imua la ekuu imua Keakua noau aꞌe nahoꞌi la. Nakama la ehoꞌi kahi aꞌe namanu la. Ia namela selavaa kesolo nahaisala ikaha.

¹² Ia Christ ehoꞌi aꞌe aia soia heualoko hokahi oia, pela isolo nahaisala hakoa ikaha, kena aia enoho i kevahi laua Keakua.

¹³ Ia kena Christ ehakali keualoko Keakua mekuꞌu nakama haihai manava aia la ilalo namahi aia.

¹⁴ Christ ehoꞌi aꞌe aia soia heualoko hokahi, pela imea nakama aia la ikonu kahi i namaisu Keakua. Ala nikama kela ehakea naola lakou.

¹⁵ Ia Keanana Kapu ekakala mai kakou nakakala Kealiꞌi nei,

¹⁶ “Anau meme aꞌe nakama la nakakala ivi, Ia kena anau mekuꞌu nakuaa anau la iloko nahakumanava lakou, Kena ikakaa namela iloko nahakaꞌoko lakou.”

¹⁷ Ia Kealiꞌi ekakala hoi ma, “Anau meselavaa imanaku nahaisala nakama la, Ia anau mesili hia namea lakou epena esala.”

¹⁸ Kena keualoko Keakua mehaialoha nakama la namea lakou esala, kena namaakua la selavaa ikauhano kehoꞌi aꞌe namanu pela isolo nahaisala lakou la ikaha.

Kakou io nohakapili aꞌe Keakua

¹⁹ Au kaina. Keualoko Christ nimake, kekoko aia la esolo nahaisala kakou la ikaha. Ia kena kakou emakino laoi pela kakou elavaa keulu iloko puikana ekapu la.

²⁰ Eme pela kinokama Christ la o keala vahonei, ilavaa kakou keola hamaoni, kena io valakonu pamalo elahi kela epui keꞌina ekapu la.

²¹ Kena Jesus Christ o kemaakua hamakua kela elolosi laoi kehale Keakua la.

²² Kakou ehakina hamaoni Christ. Ia kama la esolo nahakumanava kakou la imakahua. Ia kena kakou emakino laoi pela kakou sehimea esala. Ia kama la esolo nakinokama kakou hoi imakahua i kevai kea. Ia kena kakou io nohakapili aꞌe Keakua.

²³ Kakou ikaohi mau kehakina kakou, pela inoho kali Christ. Maikinimea Christ mepena kaukali hea aia ekakala la.

²⁴ Kena kakou ihakaꞌoko kahi pela ihapulupulu kekama ma kekama ilaoi hamaoni alakama, ia ipena namea kaualeꞌa.

²⁵ Ia kakou isekiaꞌi kelokuloku kakou. Niaina alakama eo mai nomakananae, kakou ikauhano kehapulupulu kama ma kekama. Maikinimea Kealiꞌi ukapili vaꞌai mai muli.

²⁶ Alakama kakou emakino laoi kehamaoni. Ia nakama la ekauhano kepena namea esala oia. Ia sehikama hoi memake nosolo nahaisala lakou la ikaha.

²⁷ Nakama la ekau kenoho makaꞌu avale, maikinimea Keakua mehakonukonu nakama haisala hakoa. Keahi evela haimahi mekuni nakama haihai manava la novela.

²⁸ Alakama imua eme pela hoi. Nakama la sehalono nakuaa Moses. Ame koꞌokolu nakama uꞌike pela kekama esehalono nakuaa, kena keonohenua la ekaa kama la nomake. Ia niaina ma koꞌolua uꞌike, nakama la ekaa kama la nomake oia. Ia selavaa kealoha kama la.

²⁹ Ia alakama kakou vahonei ehanaꞌino kekama Keakua la. Niaina ma Keakua ekakala eivi pela kekoko Christ la amesolo nahaisala lakou la ikaha, nakama la ehakaꞌoko ma kekoko Christ la hemevale oia. Ia nakama la ekamoa haeꞌo Keanana Kapu kela elolosi laoi lakou. Keakua memea pehe nakama la? Nakama la mehalono lihu haeꞌo.

³⁰ Kakou emakino laoi Keakua. Kama la ekakala ma, “Anau sonau mesui muli hea nakama la esala.” Ia Keakua ekakala hoi ma, “Kealiꞌi mehakonukonu keonohenua aia la.”

³¹ Ia Keakua emaka ola. Kela hea nakama saꞌino la emakaꞌu haeꞌo, aoki kama la amekaohi lakou.

³² Okou imanaku naola okou imua. Vahola, Christ ehamasina naola okou. Ia niaina okou ehalono lihu, okou oikuu mau oia.

³³ Alaualoko keonohenua la ekakala somei okou ilono nakama hakoa, kena imeme haeꞌo kia okou. Ia alaualoko okou ekuu kevahi nakama kela ehalono lihu pela hoi.

³⁴ Vahola, okou ealoha nakama kela epono kia iloko kelokapu. Ia keualoko alakama eko naheaꞌu okou la, kena okou ehihia oia. Maikinimea okou namakino avale pela namea kaualeꞌa lo emoe kali mai okou i kevaelani. Ia namela memoe kahi naualoko hamau.

³⁵ Ia kena okou isekiaꞌi nahakina okou, maikinimea Keakua mehoꞌi aku nakuhana elahi.

³⁶ Okou inoho havalekoa. Kena keualoko okou epena hea Keakua ehihai, okou meko namea kela Keakua ekakala hamaoni iau aku ma okou.

³⁷ Ia Keakua emea ma Christ ukapili ihaele aku i okou. Ia kama la ameselavaa kehanuu kehaele aia la. Ia Keakua ekakala hoi ma,

³⁸ “Poi hekama ehakina hamaoni kulana aia oiola, Kena kama la ekonu kahi i namaisu anau. Ia poi kama la amehaluu ikaha, Anau mesehihia i aia.”

³⁹ Nakama kela ehaluu ikaha meseu naola lakou. Ia kakou mesehaluu ikaha. Seai. Emeia kakou mehakina hamaoni, kena iola kahi.