Hebrews 1 - Luaniua New Testament

Christ ehuli mai nakipukipu Keakua

¹ Imua, Keakua ekini alakama ihakae nakakala aia la, pela ikakala aꞌe nakipuna kakou la. Keakua ekakala kahi aꞌe nakipuna kakou la i komaꞌi naala eꞌee.

² Imua lo, Keakua ekuꞌu kanakama ipenapena keumea hakoa, kena ikini kama la ilolosi namea la. Ia vahonei, Keakua ehaunalia iho kama la ihakae nakakala aia.

³ Kama la ekipu hamaoni poi Keakua, kena ihuli mai namahi Keakua. Kama Keakua la esapai keumea la hakoa i namahi nakakala aia. Ia keualoko kama la niui nahaisala hakoa ikaha, kama la enoho i kevahi laua Keakua i kevaelani.

Christ ehananiu iluna na{enselo}

⁴ Ia kena kama Keakua la elaꞌa iluna ma na{enselo}. Keakua eau aꞌe kama la kemale kela ehananiu iluna ma namale na{enselo} la.

⁵ Ia Keakua seme aꞌe he{enselo} i na{enselo} aia la pela, “Aꞌoe o kaukama. Keaho nei, anau eme mo kamana aꞌoe.” Seai. Keakua seme aꞌe he{enselo} pela, “Anau meme mo kamana aia, Kena kama la meme mo kama anau.”

⁶ Keualoko Keakua nihaunalia iho keilipou aia iloko kemaalama nei, Keakua eme aꞌe na{enselo} aia la hakoa, “Hamalumalu kama la.”

⁷ Kena Keakua ehaꞌali aꞌe nakipukipu na{enselo} la penei, “Na{enselo} aia la eania poi hemakani, Nakama la eula poi heahi keualoko lakou eheheaꞌu maia.”

⁸ Ia Keakua ehaꞌali aꞌe nakipukipu kama aia la penei, “Keakua, aꞌoe mehananiu naualoko hamau. Aꞌoe elolosi konu keonohenua aꞌoe la.

⁹ Aꞌoe ehihai nakipukipu ekonu, Ia sehihai nakipukipu saꞌino. Kela hea Keakua koAkua esau aꞌoe iluna alakama, Kena iamusi aꞌoe kelo, Pela imea aꞌoe ihihia lo,”

¹⁰ Kena Keakua ekakala hoi ma, “Kealiꞌi, aꞌoe ehakuu kemaalama nei imua lo, Ia epenapena kevaelani la hoi i nalima aꞌoe.

¹¹ Namea la hakoa meo noseai, Ia aꞌoe menoho kahi. Namea la meo nokuai, poi niapaꞌapa.

¹² Kena aꞌoe ame hakuhaku namela poi heuahu, Kena namea la ame ehuli sia noꞌee. Ia aꞌoe amekipu penaa naualoko hamau. Kena keola aꞌoe la meselavaa ioki.”

¹³ Keakua seme aꞌe he{enselo} i na{enselo} aia la pela, “Noho i kevahi laua anau, Kae keualoko anau mekuꞌu nakama liloko aꞌoe la, Ilalo nakapuae aꞌoe.”

¹⁴ Emeia Keakua ehaunalia na{enselo} la hakoa io nosapai nakama kela aia ehihai ikonaꞌi la.