Galatians 3 - Luaniua New Testament

Nakama hakina Jesus meihakapu lia Keakua

¹ Okou nakama Galatia, okou evale. Anau eaoaꞌo okou nakipukipu kemake Jesus Christ iluna {kolosi}, kena okou emakino laoi namela. Ia vahonei anau emasalo pela alakama elavaa kehailavaꞌa okou.

² Okou ime mai. Ea. Okou eko Keanana kapu la, maikinimea okou ekaukali nakuaa Moses? Seai. Okou eko Keanana kapu, maikinimea okou elono kelono kaualeꞌa, kena ihakina Christ.

³ Imua, Keanana Kapu eau aku okou namahi aia. Ia vahonei okou uhai namahi okou soꞌokou. Ea? Okou evale oia?

⁴ Poi okou evaꞌai nokaukali nakuaa, nahalono lihu okou imua la melano vale ia.*f4*

⁵ Ea? Keakua eau aku Keanana kapu, kena ihuli aku namahi aia, maikinimea okou ekaukali nakuaa? Seai. Keakua ehoꞌi aku Keanana kapu, kena ihuli aku namahi aia, maikinimea okou ulono kelono kaualeꞌa, kena ihakina Christ.

⁶ Okou makino nakakala kelauniu kapu, “Abraham ehakina Keakua, kena kama la ekonu i namaisu Keakua.”

⁷ Kena okou emakino laoi pela, nakama hamaoni Abraham, ala nikama ehakina Christ.

⁸ Keakua umakino pela alakama enoho pouli mehakina Christ, ia kena nakama la mekonu i namaisu Keakua. Kena Keakua eme aꞌe Abraham kelono kaualeꞌa nei, “Hekama iloko haleaina aꞌoe mehakapu nakama kemaalama nei hakoa.”

⁹ Ia kena kakou umakino pela nakama ehakina Christ keaho nei mehakapu lia Keakua, poi Abraham la hoi.

¹⁰ Poi hekama hihai ikaukali nakuaa Moses imea aia ikonu i namaisu Keakua, kama la mehalono lihu i keꞌina kemake. Kakou ailoa kemenei, maikinimea nakakala nei emau iho iloko nakakala imua pela, “Ame hekama sekaukali nakuaa kelauniu nei hakoa, kama la mehalono lihu i keꞌina kemake.”*f5*

¹¹ Kakou emakino pela, nakama ekaukali nakuaa selavaa kekonu i namaisu Keakua, maikinimea ekakaa iho iloko kelauniu kapu pela “Nakama ehakina, ala nikama ekonu i namaisu Keakua. Nakama la meola kahi.”

¹² Ia kipukipu kehakina la eꞌee ikaha ma nakipukipu kekaukali nakuaa. “Poi hekama ekaukali nakuaa la hakoa, kena kama na meiola.”

¹³ Ia kakou usehai namahi kakou ikaukali nakuaa la. Maikinimea Christ uhalono lihu iluna {kolosi} ihakana kakou isehalono lihu i nakuaa la. Nakakala nei emau iho iloko kelauniu kapu la pela, “Nakama ukoko iluna kelaꞌau mehalono lihu haeꞌo.”

¹⁴ Ia kena Keakua mehakapu nakama enoho pouli kela esuꞌui ma Jesus Christ la hoi. Ehau poi aia ekakala imua ihakapu Abraham. Ia kena kakou nahakina ana hakoa meko Keanana Kapu, ehau poi Keakua nime mai kakou.

Kuaa ia kakala ekonu

¹⁵ Aukaina, anau mekakala haiauna aku. Kulana kakou ekakala nokonu, selavaa hekama keseu nakakala la. Ia selavaa hekama kehapili aꞌe alahakaꞌoko iluna.

¹⁶ Ehau poi Keakua nikakala hamaoni ma Abraham, ia ma kemopuna aia la. Kelauniu Kapu la semea ma namopuna la hakoa. Kela Jesus Christ soia, kemopuna Abraham.

¹⁷ Hakaꞌoko anau eme penei. Keakua uoki kekakala nokonu ma Abraham. Ia kena imuli haa huikalau kipukolu nahekau, Keakua eau aꞌe nakuaa ia Moses. Kena nakuaa la selavaa keseu kakala hamaoni Keakua imua la.

¹⁸ Keakua elolosi laoi Abraham, kena ihoꞌi aꞌe kuhana kama la, ikaukali nakakala hamaoni aia la. Ehau poi Keakua ehoꞌi mai nakuhana kakou, ikaukali nakakala hamaoni aia la, ia seai kekaukali nakuaa la.

¹⁹ Keakua eau aꞌe nakuaa ia Moses maia? Imakino kakou nia kakou epena esala. Keualoko Keakua niau iho nakuaa la, kama la ehaunalia na{enselo} la noau aꞌe nakuaa la ia Moses, kena iko Moses ikakala aꞌe keonohenua la. Ia nakuaa la emoe pela ikae keualoko kemopuna Abraham meihanau mai, ehau poi Keakua nime aꞌe imua.

²⁰ Ia keualoko Keakua ekakala hamaoni ma Abraham, Keakua sehikama ehaunalia, kama la ekakala aꞌe soia.

Kehakaꞌoko nakuaa Moses

²¹ Ea, nakuaa Keakua niau aꞌe Moses elavaa kehakiꞌe nakakala hamaoni aia? Seai. Poi Keakua eau mai hekuaa iola kakou, kena kakou amekaukali kekuaa la ma iola kakou naualoko hamau. Ia Keakua seau mai kekuaa la.

²² Kama la ehuli mai pela kakou hakoa elepokia nahaisala. Ia kena Keakua ekakala hamaoni pela aia meau aꞌe keola hamaoni i nakama kela ehakina Jesus Christ.

²³ Imua, kakou sehakina Jesus Christ. Kena vahola, nakuaa la elolosi kakou. Haele nokae keualoko Keakua ehuli mai kipukipu kehakina.

²⁴ Vahola nakuaa la epolopolo mai kakou, haele nokae kulana kakou ehakina Christ, pela ikonu i namaisu Keakua.

²⁵ Ia vahonei kakou uhakina Christ, kena nakuaa la sekauhano kepolopolo mai kakou.

²⁶ Okou hakoa hakina Jesus Christ. Ia kena okou hakoa nikamaliꞌi Keakua.

²⁷ Keualoko okou nihaauꞌau kapu, okou usuꞌui ma Christ. Kena naola okou uhau poi keola kama la.

²⁸ Kulana Christ enoho iloko kakou hakoa, kakou ehau i namaisu Keakua. Niaina kakou na{Jiu} ia ma nakama haGreek, ia niaina kakou nakama hananiu ia ma nakama moulalo, ia niaina kakou nakanaka ia ma nahine, kakou hakoa ehanakahi i namaisu Keakua, maikinimea kakou usuꞌui ma Jesus Christ.

²⁹ Okou nikamaliꞌi Christ. Ia kena okou nikama iloko haleaina Abraham la hoi. Kena Keakua meiau aku nakuhana okou, ehau poi aia nikakala aꞌe Abraham la hoi.