Galatians 2 - Luaniua New Testament

Nakama keloku i Jerusalem uhihai Paul

¹ Imuli sehui ma haa nahekau, maua ma Barnabas uvaꞌai i Jerusalem. Ia anau eko Titus hoi.

² Anau evaꞌai muli ilaa, maikinimea Keakua soia eme mai anau ihaele ilaa. Kena anau eꞌuku ma nakama hamakua keloku, nohaꞌali aꞌe nakama la kekaukaꞌu kela anau nime aꞌe nakama enoho pouli. Aoki nakama hamakua la amesehihai nakaukaꞌu anau la.*f1*

³ Titus eo maua ilaa hoi. Niaina ma kama la hekama haGreek, nahakina ana na{Jiu} la sehakaꞌoko pela kama la ekau kehamakino kinokama aia.

⁴ Ia ala{Jiu} ehaiꞌahi ma lakou ehakina. Nakama la eulu mai nohapaa ma keukulana makou, imakino lakou nakipukipu makou,*f2* kena iusuusu makou ikaukali nakuaa lakou la.

⁵ Ia makou sekaukali nahakaꞌoko nakama la. Makou hihai kelono kaualeꞌa hamaoni Christ la ikauhano aku i okou.

⁶ Alakama eahu ma lakou ehananiu. Ia Keakua sehakaꞌoko maha nakama la. Ia anau sehakekele nakama la hoi. Kela hea nakama la selavaa kehapaa nakakala lakou ma kelono kaualeꞌa anau nikaukaꞌu aꞌe la.

⁷ Maikinimea nakama la emakino pela Keakua ehaunalia anau ikaukaꞌu kelono kaualeꞌa i nakama enoho pouli. Ehau poi kama la eme aꞌe Peter ikaukaꞌu aꞌe kelono kaualeꞌa i na{Jiu}.

⁸ Keakua eau aꞌe namahi Peter ikonaꞌi na{Jiu}. Ia Keakua hoi eau mai namahi anau ikonaꞌi nakama enoho pouli la.

⁹ Komaꞌi nakama ehakaꞌoko pela James, Peter laua ma John, nikama hananiu keloku. Ia koꞌokolu la umakino pela Keakua elolosi laoi anau hoi. Ia kena nakama la uhihai maua ma Barnabas, kena ihakaꞌoko ma maua meo nokonaꞌi nakama enoho pouli. Ia nakama la ehakaꞌoko ma lakou menoho nokonaꞌi na{Jiu}.

¹⁰ Nakama la eme mai maua imanaku nokonaꞌi nakama haaloha i Jerusalem. Ia anau hihai ikonaꞌi nakama haaloha la hoi.

Paul ehuli aꞌe pela Peter esala

¹¹ Keualoko Peter nihamai Antioch, anau eꞌoki maua, maikinimea Peter esala.

¹² Keualoko Peter nikae i Antioch, kama la eꞌai ma nakama sehi{Jiu}. Ia kulana James nihaunalia alakama hamakua na{Jiu} nokae Antioch, Peter uhanaꞌino nakama sehi{Jiu} la, maikinimea kama la emakaꞌu nakama hamakua na{Jiu} la.*f3*

¹³ Alakama na{Jiu} iloko Antioch umakaꞌu nakama hamakua la. Ia kena nakama la ehanaꞌino nakama sehi{Jiu}, ehau poi Peter. Kena Barnabas ukaukali nakipukipu saꞌino na{Jiu} la hoi.

¹⁴ Ia anau naꞌike avale nia nakama la esala. Nakama la sekaukali kelono kaualeꞌa hamaoni. Ia kena anau ehai aꞌe Peter, imua namaisu nakama la hakoa, “Aꞌoe he{Jiu}. Ia keualoko aꞌoe ninoho ma nakama sehi{Jiu}, aꞌoe seꞌai poi kakou na{Jiu}. Aꞌoe ukaukali nakipukipu nakama sehi{Jiu} la oia. Ia kena aꞌoe sekau kepolopolo nakama sehi{Jiu} la ikaukali nakipukipu kakou na{Jiu}.”

Keakua ekonaꞌi nakama hakoa kela ehakina i aia

¹⁵ Kakou sehanau iho iloko nakama enoho pouli, kakou ehanau iho iloko na{Jiu}.

¹⁶ Kakou emakino pela, selavaa hekama ikaukali nakuaa hakoa, imea aia ikonu i namaisu Keakua. Emeia nakama hakina Jesus Christ mekonu i namaisu Keakua. Ia kakou hoi ehakina Jesus Christ, kena kakou ukonu i namaisu Keakua. Selavaa hekama kekaukali nakuaa Moses ime aia ikonu i namaisu Keakua. Ia kena kakou sehai namahi kakou ikaukali nakuaa la.

¹⁷ Emeia kakou ekaukali Christ, maikinimea kakou hihai ikonu i namaisu Keakua. Kena alakama amehakaꞌoko pela kakou uhaisala, maikinimea kakou sekaukali nakuaa la hakoa. Ea? Christ eme kakou nohaisala? Seai.

¹⁸ Koaꞌe anau ekiaꞌi Christ, kena ivaꞌai nokaukali nakuaa Moses pela ikonu i namaisu Keakua, kena anau meihuli aꞌe pela anau hekama haisala.

¹⁹ Anau nahaꞌike avale ma ikaukali nakuaa la, ia anau uselavaa kekaukali nakuaa hakoa. Ia kena anau ukiaꞌi nakuaa la, kena ikaukali Keakua.

²⁰ Christ emake iluna {kolosi} ikonaꞌi anau. Ia kena anau ehoꞌi aꞌe keola anau poi Christ la hoi. Seme pela anau sonau eola. Emeia Christ ehaola anau. Kena keaho ma keaho, anau ehakina kama Keakua la. Kama la ehaikama laoi anau, kena ihoꞌi aꞌe keola aia nokonaꞌi anau.

²¹ Ia poi hekama elavaa kekaukali nakuaa la ime aia ikonu i namaisu Keakua, kena kemake Christ la melano vale ia. Ia kena anau sehai namahi anau kekaukali nakuaa. Emeia anau hakina pela Keakua melolosi laoi anau.