Ephesians 5 - Luaniua New Testament

Christ ehamasina iloko naola okou

¹ Ia vahonei, okou ikaukali nakipukipu Keakua. Mai kama la elaoi okou poi nikamaliꞌi hamaoni aia.

² Kena okou ilaoi alakama, ehau poi Christ elaoi okou la hoi. Kama la eaunahie kehoꞌi aꞌe aia soia imake, nokonaꞌi kakou. Ia kena kama la ehau poi kehoꞌi kelo manoni kela esauna laoi imua namaisu Keakua.

³ Okou nikama ekapu Keakua, kena okou esekau kepaa huli, ia sekau kepena sala ma alakama. Ia okou esekau kemanaꞌo namea alakama hoi.

⁴ Okou isepuꞌua saꞌali, ia sekakala vale, ia sekausua kahi. Nakakala la esekau ma okou. Ia okou ikau kekakala hamaha avale.

⁵ Okou ikau kemakino pela nakama epaa huli, lakou ma nakama kela epena sala ma alakama, nakama la meselavaa keko nikuhana ma lakou i kenoholana Christ ia ma Keakua. Nakama kela emanaꞌo la eme pela hoi. Nakama la ehamalumalu naheheaꞌu lakou la oia.

⁶ Lolosi hapulu, pela sehikama mekaoleole aku okou i nakakala vale aia la. Maikinimea Keakua meloko i nakama kela sehihalono i aia la.

⁷ Kena okou isesuꞌui ma nakama la.

⁸ Okou ninoho pouli imua. Ia vahonei, Kealiꞌi ehamasina naola okou. Ia kena okou ikauhano kekaukali nakipukipu aia la.

⁹ Maikinimea kemasina la emea naola kakou hakoa ikaualeꞌa, ia ikonu kahi hamaoni.

¹⁰ Ia kena okou memakino laoi namea kela Kealiꞌi ehihai la.

¹¹ Okou isesuꞌui ma nakama enoho pouli la nopena namea evale. Ia okou ihaꞌali aꞌe pela nakipukipu lakou la esaꞌino oia.

¹² Ia makou enapa kehaꞌali aku okou hea ehunaa lia iloko naola nakama enoho pouli la.

¹³ Ia keualoko Keakua mehamasina namea kela ehunaa lia la, kena kakou meꞌike laoi namea la.

¹⁴ Maikinimea kemasina la emea kakou iꞌike laoi. Kela hea kakou ekakala penei, “Mahulu okou nakama oimoe, Masiꞌe iluna ikaha ma kemake, Kena Christ mehamasina naola okou.”

¹⁵ Okou ilolosi hamakonu naola okou. Okou isenoho poi nimanapuhi, ia noho poi nikama eakamai avale.

¹⁶ Okou isenoho kalavale, maikinimea nakapahala la ukapili kae mai.

¹⁷ Okou isenoho vale. Ia okou iailoa hea Kealiꞌi ehihai okou ipena.

¹⁸ Okou iseunu pela ivale. Maikinimea nakama kela eunu kahi namevale eselavaa kehaniki nakipukipu saꞌino lakou la. Emeia okou iko Keanana Kapu ihamakua naola okou.

¹⁹ Keualoko okou meiꞌuku hakoa, okou ihuhua nahua kelauniu kapu, ia ma alahua keloku kela okou ekakaa la, ia ma nahua kela Keanana Kapu ehaꞌali aku okou. Okou ihuhua nahua la nohamaha hamaoni Kealiꞌi.

²⁰ Okou ihamaha kahi Keakua Kamana i kemale Jesus Christ kakou Aliꞌi, i namea hakoa kela mekae aku i okou.

Nalukanaka

²¹ Okou ihamaha Christ, ia kena ihalono nakakala kekama ma kekama.

²² Okou nahine haiꞌavana, okou ihalono nakanaka okou la, ihau poi okou ehalono Kealiꞌi.

²³ Maikinimea nakanaka la ehamakua iluna naꞌavana lakou la, ehau poi Christ ehamakua iluna nahakina ana. Nakama la hakoa o kinokama Christ. Ia kama la ekonaꞌi nakama la iola.

²⁴ Nahine haiꞌavana ihalono nakanaka lakou la i namea hakoa. Ehau poi nahakina ana la ehalono Christ.

²⁵ Okou nakanaka haiꞌavana, okou ihaiꞌavana laoi nahine okou la, ihau hoi poi Christ elaoi nahakina ana. Kama la ehoꞌi aꞌe keola aia soia nomake,

²⁶ pela ihakea naola lakou. Eme pela kama la ehaꞌali aꞌe nakama la nakakala aia, kena ehaauꞌau lakou nomakahua i kevai kea.

²⁷ Ia kena Christ meko nahakina ana la nohapoꞌi aꞌe i aia soia. Kama la ehihai ma nakama la iꞌila hakaualeꞌa, seisi namea esala. Kama la ehihai nakama la ikapu hamaoni, ia ikonu kahi hakoa.

²⁸ Okou nakanaka ime pela hoi. Okou ihaiꞌavana laoi nahine okou, ehau poi okou elolosi laoi nakinokama okou la. Poi hekama elaoi keꞌavana aia, kama na elaoi aia soia.

²⁹ Eme penei. Selavaa hekama ihai hasaꞌino kinokama aia soia. Kakou eꞌai hakaualeꞌa pela ilolosi laoi nakinokama kakou, ehau poi Christ elolosi laoi nahakina ana.

³⁰ Ia kakou nahakina ana esuꞌui hakoa iloko kinokama aia la.

³¹ “Kela hea kaupeala amekiaꞌi kamana ia ma kina aia la, Kena mehanoa ma kaupu. Ia kena koꞌolua na meo mai poi hekama hokahi.”

³² Kehakaꞌoko nakakala nei ehunaa lia, ia eisi hakaꞌoko enoko lo. Ia anau ehuli aku nakipukipu kesuꞌui Christ ia ma nahakina ana la.

³³ Ia nakakala nei ekakala aku okou hoi. Pela nakanaka haiꞌavana hakoa ihaiꞌavana laoi nahine lakou la, ehau poi lakou elaoi solakou. Ia nahine la hoi ihamaha nakanaka lakou la.