Ephesians 4 - Luaniua New Testament

Suꞌui hakoa poi kinokama hokahi

¹ Anau epono kia iloko kelokapu, maikinimea anau eheheaꞌu ma Kealiꞌi. Ia kama la nianaa aku okou iheheaꞌu ma aia hoi. Ia kena anau ekakala hapulu aku okou ikaukali nakipukipu keola kela ekau ma nakama heheaꞌu aia la.

² Okou inoho pasemuu, ia iloumalie. Ia noho havalekoa nolaoi alakama, ia sesasasa.

³ Keanana Kapu ehapaa okou inoho laoi. Ia kena okou ihai namahi okou ikauhano kenoho laoi hakoa.

⁴ Kakou nahakina ana ehapaa poi kinokama hokahi. Ia eisi Keanana Kapu hokahi hoi. Ia Keakua nianaa mai kakou hakoa inoho kali

⁵ Kealiꞌi hokahi, kena ihakina i kama la soia. Ia ihaauꞌau i kehaauꞌau kapu hokahi.

⁶ Keakua hokahi enoho poi kamana nakama hakoa, kena ehamakua iluna nakama la. Kama la ehuli aꞌe namahi aia iloko naola nakama hakoa, ia enoho ma nakama la hoi.

⁷ Christ elolosi laoi kekama ma kekama, kena iau aꞌe nahoꞌi lakou la, ikau ma kehakaꞌoko aia.

⁸ Kela hea nakakala nei emau iho iloko kelauniu kapu, “Keualoko kama la nihaele iluna kevaelani, Kama la ehasao komaꞌi kekama kela nipono kia ilalo, Kena iau aꞌe nakama la nahoꞌi lakou.”

⁹ Kehakaꞌoko kekakala, “ehaele iluna”, eme penei. Emea pela ma kama la nihaele iho ilalo kemalama nei.

¹⁰ Ia niaina ma kama la ehaele iho ilalo, kama la ehaele nonoho iluna kevaelani hoi, pela aia meꞌuhi keumea hakoa.

¹¹ Christ ehaunalia alakama iheheaꞌu maia, ia ekini alakama ihakae nakakala aia. Kama la ekini alakama ikaukaꞌu kelono kaualeꞌa, ia ekini alakama ilolosi noaoaꞌo nahakina ana la.

¹² Ia kena nakama la ekanakana nahakina ana hakoa iheheaꞌu ma Christ, pela imea kinokama kama la mesomo noivi.

¹³ Ia kena kakou oisomo nosuꞌui hakoa nohakina hamaoni i kekama Keakua la, ia emakino laoi kama la. Ia kena naola kakou meꞌakoa, ikaukali hamaoni nakipukipu Christ la hakoa.

¹⁴ Vahola, kakou mesehau poi nikamaliꞌi kela ehalono naaoaꞌo eꞌee. Alakama eusuusu nakamaliꞌi la ikaukali nahakaꞌoko esala lakou la. Kena nakamaliꞌi la ehau poi napeau eania lia kemakani maili la.

¹⁵ Ia kakou isehau poi nakamaliꞌi la. Kakou ekakala hamaoni avale, pela ihuli aꞌe kelaoi kakou. Kena naola kakou hakoa mekaukali hamaoni nakipukipu Christ, pohoulu kakou.

¹⁶ Kama la esuꞌui hakaualeꞌa kakou noivi, imemo kinokama aia. Ia keualoko kama ma kekama eheheaꞌu konu nolaoi alakama, kena kinokama la memakua laoi noivi.

Keola vahonei

¹⁷ Anau ekakala hamakaꞌu aku okou i namahi Kealiꞌi. Okou isekaukali nakipukipu nakama enoho pouli. Nakama la ehakaꞌokoꞌoko namea evale oia.

¹⁸ Ia nakama la ehakapanaka haeꞌo, ia kena sehimea ailoa. Kela hea nahakaꞌoko lakou la oipouli oia, ia naola lakou emao ikaha ma Keakua.

¹⁹ Nakama la selavaa inapa, ia emanani kepena namea saꞌino kela esekau ma nakinokama lakou, ia ehakaꞌokoꞌoko kahi kekaukali nakipukipu saꞌino hakoa.

²⁰ Okou ehalono Christ. Ia seme pela makou eaoaꞌo aku okou nakipukipu saꞌino la. Seai.

²¹ Okou ulono nakakala Jesus, kena makou eaoaꞌo aku okou kehamaoni aia la.

²² Imua, nahakaꞌoko okou la evale. Ia kena okou emanaꞌo namea esala. Ia namea la emea naola okou nosaꞌino oia. Ia vahonei, makou eaoaꞌo aku okou ikiaꞌi nakipukipu naola okou imua,

²³ pela nahakaꞌoko okou la mehuli nokaualeꞌa.

²⁴ Okou iko keola vahonei la, kela ekaukali nakipukipu Keakua. Keola la ekonu kahi, ia ekapu hamaoni.

²⁵ Ia kena okou isekakala nuku laoi. Ia okou ikakala hamaoni aꞌe i alakama. Maikinimea kakou hakoa esuꞌui poi hekinokama hokahi.

²⁶ Niaina ma okou eloko, okou isepena namea esala. Ia okou isekaohi mau naloko okou la nokae keualoko kelaa la esulu.

²⁷ Okou iseau aꞌe Satan heꞌina maia inoho.

²⁸ Nakama kela ailalao, ihamau keailalao lakou la, ia uꞌamaka noheheaꞌu hakaualeꞌa ma nalima lakou. Ilavaa lakou kekonaꞌi nakama haaloha.

²⁹ Okou isekakala hasaꞌino, ia ikakala hakaualeꞌa avale, ikonaꞌi nakama kela ehalono okou la, kena ihapulupulu nakama la.

³⁰ Okou isemea Keanana Kapu Keakua ikipuaina. Kama la ehamakino okou, ihuli aꞌe pela Keakua mehasao okou ikaha ma namahi nahaisala i keaho haoki.

³¹ Okou iseꞌumi naloko okou. Okou isemanava haeꞌo, ia iselokoloko nahie. Okou isehakaukau, ia isesalu haeꞌo alakama. Ia kiaꞌi nakipukipu saꞌino la hakoa.

³² Okou imanava laoi alakama, ia ihaialoha alakama. Ehau poi Keakua nihaialoha aku okou, keualoko okou nisuꞌui ma Christ.