Ephesians 3 - Luaniua New Testament

Paul ekaukaꞌu aꞌe nakama enoho pouli

¹ Anau eheheaꞌu ma Jesus Christ, pela ikonaꞌi okou nakama enoho pouli. Kela hea anau epono kia iloko kelokapu.

² Hamaoni. Okou nalono avale pela Keakua elolosi laoi okou. Kama la ekini anau ihuli aku kelaoi aia la.

³ Eme pela, kama la ehuli mai anau kehakaꞌoko aia, kela nihunaa lia imua. Ia kena anau ekakaa hapopoko aku kehakaꞌoko aia la iloko kelauniu nei.

⁴ Ia keualoko okou meipau hea anau ekakaa nei, okou meailoa pela anau emakino laoi nakipukipu Christ kela nihunaa lia imua.

⁵ Keakua sehuli aꞌe namea la i nakama imua. Ia vahonei, Keanana Kapu ehuli aꞌe namea la i nakama ekapu kela heheaꞌu ma Keakua, ia i nakama hoi kela ehakae nakakala aia la.

⁶ Kehakaꞌoko kela nihunaa lia imua la eme penei. Nakama enoho pouli lakou ma na{Jiu} mehalono kelono kaualeꞌa, kena ihapaa pela heonohenua hokahi. Keakua ekakala hamaoni aꞌe nakama la hakoa, maikinimea lakou esuꞌui ma Christ.

⁷ Keakua elolosi laoi anau, kena iau mai namahi aia, imea anau ikaukaꞌu kelono kaualeꞌa aia la.

⁸ Ia niaina manau hekama moulalo iloko nakama ekapu Keakua, kama la elolosi laoi anau, imea anau ikaukaꞌu aꞌe nakama enoho pouli la nakipukipu kaualeꞌa Christ, kela enoko lo.

⁹ Ia imea nakama la hoi imakino laoi pela nakipukipu Christ la meihuli mai pehe. Keakua epena namea hakoa imua. Ia kama la ehuu namea kela aia mehuli mai imuli.

^10-11 Ia kama la ehakaꞌokoꞌoko imua lo pela kakou Aliꞌi Jesus Christ mehuli mai namea la. Kama la ehihai nahakina ana ihaꞌali aꞌe keakamai aia la imakino na{enselo} ia ma alakama hananiu i kevaelani.

¹² Kakou enoho suꞌui ma Christ, kena ihakina hamaoni kama la. Kela hea kakou esemakaꞌu keo hakapili aꞌe Keakua.

¹³ Ia kena anau eme aku okou isekipuaina keualoko okou eꞌike anau ehalono lihu. Maikinimea anau ehalono lihu vahonei pela konaꞌi okou.

Kelaoi Christ

¹⁴ Kela hea anau ekoukuli imua Keakua.

¹⁵ Kama la o Kamana hamaoni kela nakama i kevaelani ia ma nakama i kemalama nei.

¹⁶ Kena kama la elavaa keau aku namea kaualeꞌa hakoa. Ia kena anau eloku aꞌe kama la iau aku okou namahi Keanana Kapu aia ihapulupulu aku okou, pela naola okou mehuli aꞌe namahi aia la.

¹⁷ Kena okou mehakina hamaoni Christ. Ia kama la menoho iloko nahakumanava okou. Anau eloku hoi pela nakipukipu kelaoi meikaohi mau naola okou, ehau poi kaꞌele ekaohi mau napou kehale la.

¹⁸ Ia kena okou ma nahakina ana hakoa melavaa kemakino laoi pela kelaoi Christ elahi haeꞌo, ia enoko lo.

¹⁹ Okou memakino hamaoni kelaoi aia la, kela elaꞌa iluna ma namea kakou eailoa. Pela naola okou meꞌakoa i namea kaualeꞌa Keakua.

²⁰ Keakua ehuli mai namahi aia la iloko naola kakou. Kama la soia ehuli mai namahi la, kela elaꞌa iluna ma namea kakou eainoa aꞌe i aia. Ia elaꞌa iluna hoi ma namea kakou eailoa la.

²¹ Kakou nahakina ana esuꞌui ma Christ, kena ehamalumalu Keakua naualoko hamau. Amen.