Colossians 3 - Luaniua New Testament

¹ Okou emasiꞌe ma Christ ikaha ma kemake. Kena okou ihakaꞌoko maha i naola okou ialuna, keꞌina kela Christ enoho i kevahi laua Keakua.

² Okou ihakaꞌoko maha i namea ialuna la, ia sehakaꞌoko maha i namea kemalama nei.

³ Maikinimea okou namake avale. Kena Keakua elolosi hakaualeꞌa naola hamaoni okou la i keꞌina Christ enoho la.

⁴ Ia Christ soia o keola hamaoni okou la. Ia keualoko kama la mevaꞌai mai muli, kena okou mehasula iho ma kama la i namahi aia.

Keola okou imua

⁵ Ia kena okou ikaa imake nakipukipu saꞌino okou imua la. Ala nikipukipu nakama kemalama nei la. Nakama la ehai huli, ia epena namea saꞌino kela esekau ma nakinokama lakou, kena emanaꞌo kahi alakama. Nakama la ehakaꞌoko kahi namea esaꞌino, ia ehakaꞌoko kahi kevahi lakou solakou, kena ehamalumalu naheheaꞌu lakou la.

⁶ Kela hea Keakua meloko i nakama kela esehalono i aia la.

⁷ Imua, okou ekaukali nakipukipu saꞌino la, kena naola okou imua emea pela hoi.

⁸ Ia vahonei, okou ikiaꞌi nakipukipu saꞌino la. Okou isemanava haeꞌo, ia seliloko ma alakama, ia sekalamua namea nakama la. Ia okou isekamoa haeꞌo i alakama, ia sekakala lihu nakama la hoi.

⁹ Okou isenuku laoi soꞌokou. Maikinimea okou nakiaꞌi avale nakipukipu keola okou imua la, kena sepena namea saꞌino la.

¹⁰ Okou eko keola vahonei la, kena ekipu poi Keakua, kama kela eau aku keola vahonei la. Ia kena okou emakino laoi aia.

¹¹ Christ enoho iloko naola nahakina ana hakoa. Niaina ma nakama la ni{Jiu}, ia ma nikama haGreek. Ia niaina ma nakama la ehamakino nakinokama lakou, ia sehamakino nakinokama lakou. Niaina ma nakama la enoho pouli, ia enoho i nahenua emao. Niaina nakama la eheheaꞌu ma alakama, ia niaina nakama la ekana kepena nia lakou hihai. Christ soia ehamakua iluna nakama la hakoa.

Keola okou vahonei

¹² Keakua nahilihili avale okou ime mo kama ekapu aia, kena ilaoi mahi okou. Ia kena okou ialoha alakama, kena ilaoi nakama la. Okou inoho pasemuu, ia sesasasa. Ia okou hoi inoho havalekoa ma alakama.

¹³ Okou imanava aloha i alakama. Ia poi hekama ehai saꞌino kelaa kama, kena koꞌolua la ihaialoha solaua. Kealiꞌi nahaialoha avale okou, ia kena okou hoi ihaialoha soꞌokou.

¹⁴ Ia okou ihapaa aꞌe kipukipu kelaoi iluna nakipukipu kaualeꞌa la. Poi okou hakoa elaoi alakama penei, kena naola okou mesuꞌui hakaualeꞌa.

¹⁵ Okou iko Christ nohamakua naola okou, imea okou inoho laoi. Maikinimea Keakua nianaa okou inoho hakoa, ihau poi kinokama hokahi, kena ikauhano nohamaha aꞌe i aia.

¹⁶ Okou imanaku kahi nakakala Christ. Pela okou memakonu keaoaꞌo alakama, ia epolopolo hakaualeꞌa nakama la. Okou ihuhua nahua kelauniu kapu, ia ma alahua keloku kela okou ekakaa la, ia ma nahua kela Keanana Kapu ehaꞌali aku okou. Ihuli aꞌe pela okou ehihia i namea Keakua eau aku okou la.

¹⁷ Okou ihamaha kemale Kealiꞌi Jesus i namea okou ekakala, ia i namea hakoa okou epena la. Ia okou ihamaha Keakua Kamana i kemale Kealiꞌi Jesus la hoi.

Kipukipu haimakua

¹⁸ Okou nahine haiꞌavana kela ekaukali Kealiꞌi, okou ikau kehalono nakanaka okou la.

¹⁹ Ia okou nakanaka haiꞌavana, okou ihaiꞌavana laoi nahine okou la, ia semanava loko nakama la.

²⁰ Ia okou nakamaliꞌi, okou ihalono namakua okou la i namea hakoa. Maikinimea Kealiꞌi ehihia i nakipukipu pela.

²¹ Ia okou nakamana nakamaliꞌi, okou isemea nakamaliꞌi okou la iloko, aoki nakamaliꞌi la ukipuaina.

²² Ia okou nakama heheaꞌu, okou ihalono nakama hamakua okou la. Keualoko nakama la emakamaka okou, alakama okou ehaiꞌahi pela lakou eheheaꞌu mahi, imea nakama hamakua la ihihia. Ia okou iseme pela. Okou ihalono hamaoni kama hamakua okou la i namea hakoa, maikinimea okou ekaukali Kealiꞌi.

²³ Ia okou iheheaꞌu mahi i namea hakoa okou epena la. Maikinimea okou eheheaꞌu ma Kealiꞌi. Okou seheheaꞌu ma kekama oia.

²⁴ Ia okou emakino pela okou eheheaꞌu ma Kealiꞌi Christ, ia kama la soia meiau aku okou nakuhana okou la.

²⁵ Niaina ma hekama pehe, Kealiꞌi mesui muli aꞌe nakama kela epena namea sala, ikau ma hea nakama la epena la.