Acts 8 - Luaniua New Testament

Saul ekaa nakama keloku imake

¹ Keualoko la, naonohenua ememe haeꞌo kia nakama keloku iloko Jerusalem. Kena nahakina ana la umaseu nokaꞌa naꞌina hakoa iloko Judea ma Samaria. Ia nakama heheaꞌu Jesus la oinoho iloko Jerusalem.

² Alakama keloku uko kinokama Stephen. Kena nakama la ukanikani kealoha lakou.

³ Ia Saul ehaꞌike maia iseu nahakina ana la. Kama la ehaele hakiꞌe nahale la nokaohi nakanaka ma nahine nahakina ana la, iko nakama la ipono iloko kelokapu.

Kelono kaualeꞌa upalalaha i Samaria

⁴ Nahakina ana la uo ikaha ma Jerusalem, nokaukaꞌu kelono kaualeꞌa.

⁵ Philip uhaele kemakaꞌina i Samaria, kena ikaukaꞌu nakipukipu Christ.

⁶ Keualoko keonohenua la elono nakaukaꞌu Philip, ia eꞌike nahaꞌaku aia ehuli aꞌe la, nakama la ehalono hakaualeꞌa nakakala aia la.

⁷ Nakipua saꞌino la evaa hamaloa, kena io iho ikaha ma nakama lakou ekau la. Ia komaꞌi nakama epiꞌo la ma nakama navae emake la ukaualeꞌa.

⁸ Ia kena nakama kemakaꞌina la uhihia lo.

Simon eisi napanamu

⁹ Kela hekama enoho i kemakaꞌina la, kanamale Simon. Kama la epenapena napanamu aia la nomasalo keonohenua Samaria la, ia eahu soia maia hekama ehananiu.

¹⁰ Nakama hamakua lakou ma nakama vale la ehalono hamakonu nakakala Simon, kena ime aꞌe, “Kama nei ehananiu lo, kena ihuli aꞌe namahi Keakua.”

¹¹ Saika emao, kama la ekaohi napanamu aia la. Ia kena nakama la emakaꞌu, kena ihalono i aia.

¹² Keonohenua la elono Philip ekaukaꞌu kelono kaualeꞌa kenoholana Keakua, ia ma nakipukipu Kealiꞌi Jesus. Nakanaka ma nahine la uhakina, kena Philip ehaauꞌau kapu lakou.

¹³ Simon uhakina hoi, kena Philip ehaauꞌau kapu kama la. Simon ekakaꞌa ma Philip. Ia kulana Simon eꞌike namahi Philip ia ma nahaꞌaku kama la ehuli aꞌe, Simon umasalo haeꞌo.

¹⁴ Nakama heheaꞌu Jesus la oinoho i Jerusalem. Ia kulana nakama la elono pela keonohenua i Samaria uhihai nakakala Keakua, nakama la ehaunalia Peter laua ma John nokaꞌa i Samaria.

¹⁵ Koꞌolua la uo nokae keꞌina la, kena iloku pela Keanana Kapu meikau iloko nakama Samaria la.

¹⁶ Philip nahaauꞌau kapu avale keonohenua la i kemale Kealiꞌi Jesus, ia Keanana Kapu seikau iloko nakama la.

¹⁷ Kena koꞌolua la ehapili nalima laua iluna nakama la, kena Keanana Kapu ukau iloko nakama la.

¹⁸ Simon uꞌike koꞌolua la ehapili nalima laua iluna nakama la iau aꞌe Keanana Kapu. Kena Simon ehuli aꞌe namoni aia la, kena ime aꞌe,

¹⁹ “Au mai namahi na i anau hoi. Pela saika anau mehapili nalima anau iluna alakama, Keanana Kapu meikau iloko nakama la.”

²⁰ Kena Peter ume aꞌe Simon, “Aꞌoe ma namoni aꞌoe na meio hakoa i keꞌina keahi! Aꞌoe hakaꞌoko maꞌoe elavaa kesui kehoꞌi namahi Keakua.

²¹ Aꞌoe sehimea elave iloko heaꞌu maua nei. Maikinimea hakumanava aꞌoe esala i namaisu Keakua.

²² Kiꞌe ikaha ma nahaisala aꞌoe na. Loku aꞌe Kealiꞌi ihaialoha aku i nahakaꞌoko aꞌoe na.

²³ Anau eailoa pela aꞌoe esano mahi, ia elepokia nakipukipu saꞌino.”

²⁴ Kena Simon ume aꞌe, “Loku aꞌe Kealiꞌi pela nakakala olua na meisekae mai anau.”

²⁵ Koꞌolua la uhaꞌali aꞌe nakama Samaria la nakakala Kealiꞌi, kena ikaꞌa valoko namakaꞌina i Samaria nokakala aꞌe kelono kaualeꞌa Keakua, kena ivaꞌai muli i Jerusalem.

Philip eaoaꞌo kekama haEthiopia

²⁶ Ke{enselo} Keakua ekakala aꞌe ia Philip ma, “Kuu iluna. Haele ikaha ma Jerusalem, i kevahi keꞌupu i keala keꞌina ekukuaha, nokae i Gaza.”

²⁷ Kena Philip uhaele kaukali keala la, nokili kanaka haEthiopia. Kanaka la ehamakua i keheaꞌu ma Candace, kekuꞌu hine i Ethiopia. Kanaka la elolosi namoni hakoa kehine la. Kama la ehaele i Jerusalem nohamalumalu Keakua.

²⁸ Ia keualoko kama la evaꞌai muli i henua aia la, kama la enoho iluna kevaꞌa aia la nopaupau kelauniu Isaiah, kama hakakae nakakala Keakua.

²⁹ Kena Keanana Kapu eme aꞌe ia Philip, “Haele nokaukali kevaꞌa la.”

³⁰ Kena Philip ukele nokae kevaꞌa la nolono kanaka la epau kelauniu Isaiah. Philip uvasili aꞌe kama la, “Aꞌoe makino hea aꞌoe epau?”

³¹ Ia kama hamakua la eme aꞌe, “Amea sehikama ekonaꞌi mai anau, anau meailoa pehe?” Kena iko kama la ime aꞌe Philip iꞌae aꞌe iluna nonoho i kevahi aia.

³² Kena kanaka la epau nakakala kelauniu kapu nei, “Nakama la uhakaꞌi kama la poi he{sipisipi} ikaa kama la imake. Kama la sehikakala eme aꞌe. Ehau poi punua {sipisipi} epasemuu, Keualoko nakama la mekuu nahuluhulu {sipisipi} la.

³³ Nakama la ehakonu konu kama la. Ia enuku laoi ma inapa kama la. Kena ikaa kama la nomake. Sehikamaliꞌi meikauhano ikipu haimakua aia la.”

³⁴ Kama hamakua la eme aꞌe ia Philip, “Anau evasili aku, kekama ekakaa kelauniu nei ekakala i ai? Kama la ekakala i aia soia, ma ekakala i kelaa kama?”

³⁵ Kena Philip uꞌamaka nopau nakakala kelauniu kapu la, nokaukaꞌu aꞌe nakipukipu Jesus.

³⁶ Keualoko koꞌolua la eo kaukali keala la, koꞌolua la ukae keꞌina kevai. Kena iko kama hamakua la ime aꞌe ia Philip, “Ili aꞌe, keꞌina kevai nei. Ea. Ekau pela aꞌoe meihaauꞌau kapu anau?”

³⁷ Kena iko Philip ime aꞌe, “Poi aꞌoe ehakina hamaoni, aꞌoe ekau oia.” Kama hamakua la ume aꞌe, “Anau ehakina pela Jesus Christ o kekama Keakua.”

³⁸ Kena iko kama hamakua la ime aꞌe kekama lolosi kevaꞌa aia la ihamau. Koꞌolua la ulee ilalo nokuu iloko kevai la, kena Philip uhaauꞌau kapu kama la.

³⁹ Kulana koꞌolua la uo ikaha ma kevai la, Keanana Kapu Kealiꞌi uko Philip ikaha, ia kama hamakua la useꞌike kama la hoi. Kama hamakua la uhaele hihia lo.

⁴⁰ Ia Philip uhasula aꞌe i kemakaꞌina Azotus, kena ihaele hakiꞌe namakaꞌina hakoa nokae i Caesarea, nokaukaꞌu kelono kaualeꞌa Keakua.