Acts 6 - Luaniua New Testament

Koahiku nakama eheheaꞌu ma nahakina ana

¹ Kulana la, nakama ehakina Jesus la uo mai nokomaꞌi. Nakama haGreek ehakaukau ma na{Jiu} la, maikinimea nakama kela evavae naꞌai keaho ma keaho seau aꞌe nakaukuaha haGreek la nakuhana kela ekau ma lakou.

² Kena sanahulu ma lua nakama heheaꞌu Jesus la uhaꞌuku aꞌe nahakina ana la hakoa, kena ime aꞌe, “Sekonu pela makou ikiaꞌi keaoaꞌo nakakala Keakua, ivavae aꞌe naꞌai oia.

³ Kena aukaina, okou ihilihili koahiku nakama ekaualeꞌa i namaisu keukulana kakou nei. Hilihili nakama eakamai, nakama kela ekau lia Keanana Kapu. Nakama la ekau kevavae naꞌai nakaukuaha kakou nei.

⁴ Kena makou mekauhano kelokuloku, ia ikaukaꞌu nakakala Keakua.”

⁵ Keukulana la hakoa ehihai hakaꞌoko la, kena ihilihili nakama nei, Stephen, kekama kela ehakina haimahi, ia Keanana Kapu ekau iloko aia, Philip, Prochorus, Nicanor, Timon, Parmenas, ia Nicolaus (hekama i Antioch, uhamai mo {Jiu})

⁶ Kena nakama la uhakuu nakama lakou ehili la imua nakama heheaꞌu Jesus la, iloku aꞌe Keakua, kena ihapili nalima lakou iluna nakama la nohakapu nakama la.

⁷ Nakakala Keakua ukoha, kena komaꞌi nakama iloko Jerusalem uo aꞌe nokaukali ia Jesus. Ia komaꞌi namaakua hoi ehalono nohakina.

Stephen uhapiꞌi lia

⁸ Keakua eau aꞌe namahi Stephen, kena ilolosi hakaualeꞌa kama la. Kena Stephen ehuli aꞌe nahaꞌaku ia ma namea kaualeꞌa imua namaisu keonohenua la.

⁹ Keukulana kehale loku na{Jiu} la ekapa lia ma Nakama Ekana. Ala na{Jiu} kela eo mai i Cyrene ma Alexandria, ia ma na{Jiu} kela eo mai Cilicia ma Asia. Ia nakama la ehakaukau lakou ma Stephen.

¹⁰ Ia Stephen ehuli aꞌe keakamai Keanana Kapu. Ia kena nakama la uselavaa kesui muli nakakala aia la.

¹¹ Kena nakama keukulana la eusuusu aꞌe alakama ime aꞌe, “Makou elono kama nei ekakala somei Moses, ia ekakala somei Keakua hoi.”

¹² Nakama la ehako aꞌe keonohenua la, lakou ma nakama hamakua na{Jiu} la, ia ma nakama epolopolo nakuaa la. Kena nakama la ekaohi Stephen iau aꞌe kama la nohakuu imua nakama hamakua la.

¹³ Kena nakama la esee nakama ikakala nukulaoi ma, “Kama nei ekakala saꞌino i kehale kapu ia ma nakuaa Moses.

¹⁴ Makou elono kama nei ekakala ma Jesus kela i Nazareth meiseu hale kapu, kena ihakiꞌe sala namakeala kela Moses niau mai kakou la.”

¹⁵ Kena nakama hamakua la ukoꞌa hamakonu aꞌe ia Stephen, kena iꞌike pela namaisu kama la ehau poi namaisu ke{enselo}.