Acts 4 - Luaniua New Testament

Peter laua ma John ekuu imua nakama hamakua

¹ Keualoko Peter laua ma John oikakala aꞌe keonohenua la, namaakua lakou ma napulepule hale kapu la ukae aꞌe keꞌina la. Kena naSatiusi la uo aꞌe hoi.

² Nakama la uloko haeꞌo, maikinimea nakama heheaꞌu Jesus la eaoaꞌo keonohenua la pela nakama umake meimasiꞌe mai ikaha ma kemake, poi Jesus la hoi.

³ Nakama hamakua la uhapiꞌi Peter laua ma John. Ia kelaa la ukapili isulu, kena nakama la epono koꞌolua la iloko kelokapu, nokae kela aho.

⁴ Ia komaꞌi nakama kela ehalono nakakala koꞌolua la ehakina, kena keꞌoina nakanaka ehakina la ekae lima simaka.

⁵ Kahaka kela aho, nakama hananiu, ma nakama hamakua, lakou ma nakama epolopolo nakuaa la uꞌuku hakoa iloko Jerusalem.

⁶ Pohoulu hamakua namaakua enoho ilaa, kanamale Annas. Kena Caiaphas, John, Alexander, ia ma alakama iloko haleaina pohoulu la enoho ilaa hoi.

⁷ Kena nakama la uko aꞌe Peter laua ma John iloko hale keꞌina lakou enoho la, kena ihakuu koꞌolua la ilakonu lakou, kena ivasisili aꞌe koꞌolua la, “Keualoko olua ekonaꞌi kama navae emake la nokaualeꞌa, olua ehuli aꞌe namahi ai? Ia olua ekapa kemale ai?”

⁸ Kena Keanana Kapu ukau iloko Peter ikakala aꞌe nakama hamakua la, “Okou nakama hananiu ia ma alakama hamakua.

⁹ Okou evasisili mai maua keaho nei imakino laoi okou namahi maua ehuli aꞌe ikonaꞌi kama navae emake la nokaualeꞌa.

¹⁰ Okou hakoa ia ma nakama iloko Israel hakoa ekau keailoa pela kama nei ekuu imua okou i namahi kemale Jesus i Nazareth. Okou ekaa Jesus nomake ialuna {kolosi}, ia Keakua hamasiꞌe kama la ikaha ma kemake.

¹¹ Jesus ehau ma, ‘Kehaku kela nakama hakuu nahale haseseꞌe lia, Kehaku la emau soia kekaohi savahi kokoꞌa kehale la.’

¹² Sehikama pela iloko kemaalama nei elavaa kekonaꞌi kakou iola. Keakua ehaunalia iho Jesus soia ikonaꞌi kakou.”

¹³ Nakama hamakua la eꞌike pela Peter laua ma John esemakaꞌu. Ia nakama la umakino pela koꞌolua la nikama vale oia, ia se{sikulu} kaualeꞌa. Nakama la umasalo, ia umanaku pela koꞌolua la ekakaꞌa ma Jesus.

¹⁴ Ia nakama la selavaa kehakaukau ma koꞌolua la, maikinimea nakama la uꞌike pela kekama navae nimake la ekuu kapili aꞌe koꞌolua la, navae aia la ukaualeꞌa.

¹⁵ Kena nakama hamakua la eme aꞌe koꞌolua la ikaꞌa ikaha ma kehale lakou enoho la. Kena nakama la ekakala semuu solakou,

¹⁶ “Hea kakou meipena koꞌolua nei? Koꞌolua la ehuli aꞌe haꞌaku hananiu. Ia nakama hakoa i Jerusalem uailoa, kena kakou selavaa kepula aꞌe pela koꞌolua la sehuli aꞌe namahi la.

¹⁷ Kena kakou ihamakaꞌu aꞌe sakoꞌolua la isekakala aꞌe i alakama hoi i kemale Jesus, ipui kelono nei isekoha.”

¹⁸ Nakama hamakua la uanaa aꞌe sakama heheaꞌu la novaꞌai aꞌe iloko hale, kena ime aꞌe koꞌolua la iseaoaꞌo i kemale Jesus, ia sekakala aꞌe kemale la hoi.

¹⁹ Ia Peter laua ma John ume aꞌe, “Hakaꞌoko okou eme pehe? Keakua mehihai maua ihalono aku okou, ia isehalono i aia?

²⁰ Maua selavaa kenoho semuu, ia mekakala nia maua eꞌike ia elono.”

²¹ Ia nakama hamakua la ehamakaꞌu aꞌe koꞌolua la, kena ihakana koꞌolua la nokaꞌa ikaha. Ia nakama la ehainakaa kememe haeꞌo kia koꞌolua la, maikinimea keonohenua la hakoa ehamaha i Keakua

²² i namahi koꞌolua la ehuli aꞌe nokonaꞌi kekama navae emake la. Ia kama la ukae kipuhaa koe nahekau kemakua aia la.

Nahakina ana eloku semakaꞌu

²³ Keualoko Peter laua ma John nihakana lia nokaꞌa, koꞌolua la ekaꞌa nome aꞌe nahakina ana la hea namaakua la ia ma nakama hananiu la eme aꞌe laua.

²⁴ Kulana nakama la elono nakakala la, nakama la usuꞌui noloku aꞌe Keakua, “Kealiꞌi, aꞌoe o Keakua kela epena kevaelani ma kemaalama nei, ia ma kemoana, ia ma namea hakoa.

²⁵ Kipuna makou la David ehalono i aꞌoe, kena ihakae nakakala kela aꞌoe nime aꞌe Keanana Kapu la, ‘Okea nakama enoho pouli eloko haimahi, Ia ehakaꞌoko namea saꞌino?

²⁶ Nakuꞌu kemaalama nei kanakana kaua ivuhu. Nakama hamakua epena nahakaꞌoko lakou hakoa, Ihakauoki ma Keakua ia ma kekama aia ekini la.’

²⁷ “Herod laua ma Pontius Pilate esuꞌui ma nakama enoho pouli lakou ma na{Jiu} la ihakauoki lakou ma Jesus. Kenei kekama ekapu kela aꞌoe ekini nome mo Mesaea.

²⁸ Ia nakama la mepena kaukali hea aꞌoe ehakaꞌoko kehuli mai i namahi aꞌoe.

²⁹ Kealiꞌi, aꞌoe elono nakakala hamakaꞌu nakama la. Kena konaꞌi mai makou isemakaꞌu kekakala kelono kaualeꞌa aꞌoe.

³⁰ Au mai makou namahi aꞌoe la ikonaꞌi nakama lavea, ia ihuli aꞌe nahaꞌaku ia ma namea kaualeꞌa i kemale Jesus, kekama ekapu kela eheheaꞌu maꞌoe la.”

Nahakina ana evavae naheheaꞌu lakou

³¹ Keualoko keloku la umaseu, keꞌina nakama la eukuꞌuku la unanaue, kena Keanana Kapu ukau iloko nakama la, ia kena nakama la usemakaꞌu kekakala nakakala Keakua.

³² Nahakaꞌoko nahakina ana la ehau hakoa. Sehikama ekakala pela namea aia la, nimea aia soia. Emeia nakama la evavae namea lakou la halaoi ma alakama.

³³ Nakama heheaꞌu Jesus la ekakala i namahi elahi pela Kealiꞌi Jesus umasiꞌe ikaha ma kemake. Kena Keakua elolosi hakaualeꞌa nakama la hakoa.

³⁴ Ia sehikama ekuku haeꞌo. Nahakina ana la eau aꞌe naeleꞌele ia ma nahale lakou isui alakama,

³⁵ kena iau aꞌe namoni la i nakama heheaꞌu la, ivavae aꞌe ikonaꞌi nakama la hakoa.

³⁶ Kela hekama haCyprus eheheaꞌu iloko hale kapu, kemale aia Joseph. Ia nakama heheaꞌu Jesus la ekapa kama la ma Barnabas (emea ma Kama Hapulupulu).

³⁷ Kama la eau aꞌe keeleꞌele aia la isui kelaa kama, kena iau aꞌe namoni la i nakama heheaꞌu la.