Acts 27 - Luaniua New Testament

Paul uuhu nohaele i Rome

¹ Nakama hamakua la ehakaꞌoko pela ma makou iuhu nohaele i Italy. Kena ime aꞌe kepulepule hamakua emale ma Julius ilolosi Paul lakou ma ala{palaseni} hoi. Julius hekama keukulana napulepule kekuꞌu haRome la.

² Makou eꞌae kevaꞌa kela ehamai pela i kemakaꞌina Adramyttium. Kevaꞌa la ekana kana ihaele hakiꞌe namakaꞌina Asia. Kelaa hekama kemakaꞌina Thessalonica iloko Macedonia ekaꞌa ma makou hoi, kanamale Aristarchus.

³ Kela aho makou ukae i Sidon. Ia Julius ekaualeꞌa ia Paul, kena ihakana Paul ihaele iuka nomaka nasoa aia la. Ia kena nakama la elolosi hakaualeꞌa Paul.

⁴ Keualoko makou niuhu ilaa, kemakani la epui mai imua makou, ia kena makou uhaele hapale i kehenua emale ma Cyprus.

⁵ Kena ihaele hakapili aꞌe Cilicia ma Pamphylia nokae kemakaꞌina Myra iloko Lycia.

⁶ Julius ulave kevaꞌa ehamai pela i Alexandria, kela mehaele Italy, ia kena ihaunalia makou noꞌae kevaꞌa la.

⁷ Makou euhu nohaele hasolo komaꞌi naaho, ia makou ehainakaa kekae kemakaꞌina Cnidus. Kemakani la upui imua makou, ia kena makou uhaele halaꞌa kemaka Crete, emale ma Salmone.

⁸ Kena makou ehaele hasolo hakapili aꞌe henua la nokae i keꞌina emale ma Keꞌina Ekaualeꞌa Kehaluu, kapili kemakaꞌina Lasea.

⁹ Vahola, komaꞌi naaho ulaꞌa. Keualoko na{Jiu} ehasese hiꞌai la uoki. Ia makou ukae saika esaꞌino kehaele vakemoana. Kena Paul ume aꞌe nakama la,

¹⁰ “Okou nakanaka. Poi kakou euhu vahonei nohaele, kevaꞌa ma na{kako} nei hakoa meilano, ia komaꞌi nakama kakou meimake.”

¹¹ Ia pulepule hamakua la sehalono aꞌe ia Paul, kama la ehalono kealiꞌi kevaꞌa la laua ma kekama esui kevaꞌa la.

¹² Kehapakio la sehiꞌina ekaualeꞌa i kekuu kevaꞌa la, keualoko kemoana epeau. Ia kena nakama kevaꞌa la ehakaꞌoko iuhu uhaꞌike ikae Phoenix, kemakaꞌina i Crete nokuu ilaa. Maikinimea hapakio la ehuli konu aꞌe i keꞌupu halaꞌi ma koꞌolau halaꞌi.

Pukiꞌa kemoana

¹³ Keualoko la, kamamakani i keꞌupu la eꞌamaka noaniani. Ia kena nakanaka la ehakaꞌoko pela kemakani la ame kaualeꞌa. Kena ihuki kaula la nohaele hapale Crete.

¹⁴ Ia semao, kemakani la uꞌamaka nomaili mai koꞌolau hanaꞌe pela i namouna henua la.

¹⁵ Kemakani maili la emea makou nokahea i kemoana, pela makou selavaa kevaꞌai muli.

¹⁶ Makou uhaele hakapili aꞌe henua emale ma Cauda, ia keꞌina la uluu aꞌe hamalie, ia kena makou uhai namahi makou ihauka kama monoui la iluna kevaꞌa.

¹⁷ Kena nakama kevaꞌa la usaisai kemonoui la ma kevaꞌa la i namaea. Kena ilaku kaula imea kevaꞌa la inase kekahea, maikinimea nakama la emakaꞌu ma kevaꞌa la noꞌasa naluahua i Libya. Kena ikiaꞌi kevaꞌa la ihakahe kemakani maili.

¹⁸ Kela aho, makou ukili pukiꞌa haimahi, kena nakama kevaꞌa la ukaua na{kako} la i kemoana.

¹⁹ Kena keaho kana hakolu nakama la ulaku naheheaꞌu kevaꞌa la hakoa iloko kelokai.

²⁰ Komaꞌi naaho makou seꞌike kelaa ma nahekuu, ia kemakani ekauhano nomaili mahi, ia kena makou usehakaꞌoko pela makou meiola.

²¹ Saika loloa lo, sehikama makou eꞌai naꞌai, kena Paul ukuu iluna nome aꞌe nakama la, “Okou nakanaka usehalono mai anau, kena iuhu i Crete. Kela hea na{kako} kakou la hakoa ulano.

²² Ia vahonei, anau eme aku okou isekipuaina, maikinimea sehikama kakou memake. Kevaꞌa nei soia meilano.

²³ Keakua elolosi anau, kena anau eheheaꞌu maia. Kepo la ke{enselo} Keakua ekuu mai nokakala mai ma,

²⁴ ‘Paul aꞌoe isemakaꞌu. Aꞌoe meikuu imua namaisu kekuꞌu haRome. Ia kevahi aꞌoe Keakua meikonaꞌi naola nakama kela ehaele maꞌoe na.’

²⁵ Ia kena okou isekipuaina. Anau emakino laoi pela Keakua meikonaꞌi kakou, poi hea aia ekakala mai anau.

²⁶ Ia kevaꞌa nei meꞌasa iluna henua.”

²⁷ Sehui ma haa naaho kemakani maili la ehakakahe lia makou valoko kemoana. I lakonu kepo, nakama kevaꞌa la ulono pela makou ukapili nahenua.

²⁸ Nakama la haꞌike kenoko kemoana la nolave pela ukae kipulua namaꞌaa. Kama saika hoi nakama la uhaꞌike nolave pela ukae sehui ma lima namaꞌaa.

²⁹ Ia kena nakama la umakaꞌu, aoki kevaꞌa la meꞌasa naꞌau. Kena nakama la elaku ehaa nakaula imuli kevaꞌa la, kena iloku pela lakou meola nokae keulu keaka.

³⁰ Nakama heaꞌu kevaꞌa la hihai ma lakou imuni nohulo iuka, kena ihakele kemonoui la ilalo i kelokai, ihailavaꞌa ma lakou elaku nakaula imua kevaꞌa la.

³¹ Ia Paul eme aꞌe pulepule hamakua la ma napulepule aia la, “Apoi nakama kevaꞌa nei senoho iloko kevaꞌa, kena Keakua mesekonaꞌi okou iola.”

³² Ia kena napulepule la ukuu namaea kela esai kemonoui la nokeiho i kelokai.

³³ Imua keulu keaka, Paul eme aꞌe nakama la iꞌai naꞌai, “Vahonei ukae sehui ma haa naaho okou sehimea eꞌai.

³⁴ Kena anau eme aku okou, iꞌai naꞌai ikaohi naola okou pela sehikama okou memake.”

³⁵ Paul ekakala aꞌe nakama la, kena iko halaoa iloku aꞌe i Keakua imua namaisu nakama la hakoa. Kena ikohikohi halaoa la noꞌai.

³⁶ Nakama la hakoa ulono nakinokama lakou ukaualeꞌa, ia kena iꞌai naꞌai lakou la.

³⁷ Kela lua huikalau, kipuhiku ma ono nakama hakoa enoho iluna kevaꞌa la.

³⁸ Kena keualoko makou nioki keꞌai, nakama la ukaua naaupu halaoa iloko kelokai, imea kevaꞌa la ilana.

Kevaꞌa la umaseu

³⁹ Kulana kahaka, nakama la eꞌike hapakio eleꞌele, ia sehikama emakino henua la. Ia kena ihakaꞌoko ihaꞌasa kevaꞌa la i keꞌina la.

⁴⁰ Nakama la ekuu nakaula kevaꞌa la nomaoha i kemoana. Kena ikaohi sahoeꞌulu kevaꞌa la. Kena ialeko puꞌei la nokele iuka.

⁴¹ Nakama la ekae kesao, kena ihaꞌasa kevaꞌa la ialuna keluahua la, imua kevaꞌa la uꞌapi nomau. Kena napeau elahi la useu imuli kevaꞌa la.

⁴² Napulepule la ehakaꞌoko pela lakou ikaa na{palaseni} la imake, pela selavaa hekama meꞌau nosao.

⁴³ Ia pulepule hamakua la ehihai ikonaꞌi Paul, kena ipui nakama la isekaa nakama la. Ia kena imea nakama kela eailoa keꞌau la ilee i kelokai, noꞌau iuka.

⁴⁴ Kena nakama ekoe la uko nihono ma alamea iluna kevaꞌa la ihalana lakou iꞌau iuka. Ia kena makou hakoa ukae laoi iluna henua la, sehikama elano.