Acts 26 - Luaniua New Testament

Paul ekakala aꞌe kekuꞌu Agrippa

¹ Kekuꞌu Agrippa eme aꞌe Paul, “Aꞌoe ikakala kevahi aꞌoe soꞌoe.” Kena Paul uhaiauna aꞌe nakama la ihalono aꞌe, ia kena ikakala penei,

² “Kekuꞌu Agrippa. Anau ehihia kekuu imua aꞌoe keaho nei ihakonu konu lia hea na{Jiu} la ehai mai anau la.

³ Maikinimea aꞌoe umakino laoi nakipukipu makou na{Jiu}, ia ma namea makou ehakaukau la. Kena anau eainoa aku aꞌoe ihalono mai anau.

⁴ “Na{Jiu} la hakoa emakino nakipukipu keola anau, keualoko anau nimakua mai i henua makou la, haele nokae kulana anau ninoho i Jerusalem.

⁵ Nakama na uailoa anau saika loloa lo. Amea nakama na hihai, nakama na elavaa keme aku pela anau heFarasi. Makou naFarasi ehalono nakipukipu kehakina na{Jiu} hakoa, elaꞌa iluna alaukulana keloku makou la.

⁶ Okou ehakonu mai anau keaho nei, maikinimea anau ehakina nakakala hamaoni kela Keakua nime aꞌe nakipuna makou imua la.

⁷ Sehui ma lua naꞌaha makou la ehamalumalu Keakua keaho ma kepo. Nakama la ehihai nakakala Keakua ihuli aꞌe nohamaoni. Kekuꞌu Agrippa. Anau ehakina nakakala hamaoni la. Kela hea nakama hamakua na{Jiu} la ehai mai anau.

⁸ Ea, okou ehakaꞌoko pela Keakua ehainakaa kehamasiꞌe kekama ikaha ma kemake?

⁹ “Imua lo, anau ehakaꞌoko ihakauoki ma nakama kela ehamalumalu Jesus i Nazareth la.

¹⁰ Anau ehai haeꞌo kia nakama la i Jerusalem. Kena namaakua hamakua la eau mai namahi anau, ipono komaꞌi nakama ekapu Keakua la iloko kelokapu. Keualoko keonohenua nikaa nahakina ana la nomake, anau enuu pela kela hemea ekaualeꞌa.

¹¹ Anau ehaele hakiꞌe nahale loku na{Jiu} la ihai haeꞌo kia nahakina ana la. Ia anau ehai aꞌe nakama la ikakala lihu aꞌe Keakua. Anau eliloko nakama la. Kena iko anau ihaele i namakaꞌina emao la, nosee nahakina ana la nohai haeꞌo kia nakama la.

¹² “Kekuꞌu Agrippa. Namaakua hamakua eau mai namahi lakou la ihakonukonu keonohenua, kena anau ehaele i Damascus.

¹³ Saika kelaa lakea, anau eꞌike keahi kevaelani emasina poi kelaa la. Keahi la emasina hakiꞌe anau ma nakama kela ekaꞌa manau la.

¹⁴ Makou hakoa usina ilalo. Kena anau elono keleo ekakala mai anau la i nakakala na{Jiu} la ma, ‘Saul, Saul. Hea aꞌoe ehai haeꞌo kia anau? Aꞌoe ehainakaa haeꞌo kevuhu manau.’

¹⁵ “Ia kena iko anau ime aꞌe, ‘Oai aꞌoe Kealiꞌi?’ “Kama la eme mai, ‘Anau Jesus, kekama kela aꞌoe ehai haeꞌo kia la.

¹⁶ Masiꞌe iluna. Anau ekuu aku imua aꞌoe, maikinimea anau meihilihili aꞌoe iheheaꞌu manau. Aꞌoe meikakala aꞌe naonohenua la namea aꞌoe eꞌike, ia namea anau meihuli aku.

¹⁷ Anau meihaunalia aꞌoe nokae naꞌina emao. Ia anau mehasao aꞌoe ikaha ma namahi keonohenua na{Jiu} la, ia ma namahi nakama enoho pouli la hoi.

¹⁸ Anau meikalaꞌi naꞌalemaka nakama la, ia kena nakama la mekiꞌe ikaha ma kepouli, nonoho i kemasina. Pela nakama la mekiaꞌi namahi Satan, kena ukaukali Keakua. Keakua meisolo nahaisala lakou ikaha. Nakama la mehakina i anau, kena Keakua meihakea naola lakou, ia au aꞌe nakama la nakuhana lakou la.’

¹⁹ “Kekuꞌu Agrippa, anau eꞌike kekama kela ehaele iho ikaha ma kevaelani la, kena anau ehalono nakakala aia la.

²⁰ Kena anau uꞌamaka nome aꞌe naonohenua la ikiꞌe ikaha ma nahaisala lakou la, nokaukali Keakua. Ia anau eme aꞌe nakama la pela lakou ekau kepena namea kaualeꞌa hoi. Kena anau eꞌamaka nokaukaꞌu i Damascus, kena iloko Jerusalem, ma naꞌina hakoa i Judea, ia ma naꞌina nakama enoho pouli la.

²¹ Kela hea na{Jiu} la ekaohi anau iloko hale kapu, ihaꞌikeꞌike ma lakou ikaa anau imake.

²² Ia Keakua ekonaꞌi anau, nokae keaho nei. Ia kena anau ekuu imua okou nakama hamakua ma nakama moulalo. Anau ehaꞌali aku namea Moses ia ma nakama hakae nakakala Keakua nime mai makou. Ia anau ehaꞌali aku hoi pela namela ukapili iapihi mai.

²³ Pela Christ uhalono lihu nomake, ia kama la o kekama amaka kela umasiꞌe ikaha ma kemake. Kela hea kama la ehuli aꞌe na{Jiu} ma nakama enoho pouli la pela lakou elavaa keola muli hoi.”

²⁴ Kulana Paul oihakonu hea na{Jiu} la ehai aꞌe i aia, Festus eanaa hamaloa, “Paul. Aꞌoe ekakala vale haeꞌo. Aꞌoe eaoaꞌo komaꞌi nahakaꞌoko, kena kehakaꞌoko aꞌoe la evale oia.”

²⁵ Ia Paul ume aꞌe, “Anau sekakala vale. Anau eme aku nakakala hamaoni. Nakakala nei ekonu oia. Kama hamakua Festus.

²⁶ Kekuꞌu Agrippa la eailoa namenei. Kela hea anau semakaꞌu kekakala aꞌe aia. Anau ehakina pela namenei sehuu, maikinimea namenei sehuli mai iloko keꞌina hokahi oia.

²⁷ Kekuꞌu Agrippa, aꞌoe hakina hea nakama hakae nakakala Keakua ekakaa la? Anau eailoa pela aꞌoe ehakina oia.”

²⁸ Kena kekuꞌu Agrippa ume aꞌe ia Paul, “Aꞌoe ekaoleole mai anau ivave kekaukali Christ?”

²⁹ Ia kena Paul ume aꞌe, “Niaina aꞌoe evave, ia enase kehakina. Anau hihai pela aꞌoe ma nakama kela elono nakakala anau nei la meihau poi anau. Ia anau sehihai pela okou isaisai lia na{seni} nei.”

³⁰ Kena kekuꞌu Agrippa ma {kaumani} Festus ia ma Bernice lakou ma nakama la hakoa ukuu iluna.

³¹ Ia keualoko nakama la ekaꞌa ikaha, nakama la ekakala penei, “Kama la sepena name sala pela aia ikau kemake, ia ipono iloko kelokapu.”

³² Kena kekuꞌu Agrippa ume aꞌe {kaumani} Festus, “Koaꞌe kama nei seainoa ma kekuꞌu haRome ihakonu aia, kakou elavaa kehakana kama na ihaele.”