Acts 25 - Luaniua New Testament

Festus ehakonu Paul

¹ Festus ukae aꞌe keꞌina la nonoho i Caesarea. Kena imuli ekolu naaho, kama la uhaele nokae Jerusalem.

² Kena namaakua hamakua, lakou ma nakama hamakua na{Jiu} la ehai aꞌe Paul la imua Festus. Nakama la eainoa aꞌe ma Festus

³ ihaunalia muli Paul i Jerusalem. Ia nakama la upenapena hakaꞌoko ikaa Paul imake i keala.

⁴ Ia Festus eme aꞌe pela, “Seai. Makou mekaohi Paul inoho i Caesarea. Anau ukapili ivaꞌai ilaa sonau.

⁵ Alakama okou hamakua ekau keo manau. Ia amea kama la epena keme sala, kena okou amelavaa kehai aꞌe kama la.”

⁶ Ia kena Festus enoho iloko Jerusalem kapili ikae evalu ma sanahulu naaho ulaꞌa, kena ihaele i Caesarea. Kela aho kama la uhaele noko kesao aia poi hekama hakonukonu, kena ime aꞌe napulepule la ihakaꞌi iho Paul ikae iloko kehale hakonu konu la.

⁷ Na{Jiu} kela nikaꞌa mai ikaha ma Jerusalem umui hakiꞌe Paul, ikakala pela kama la epena komaꞌi name sala. Ia nakama la uselavaa kehuli aꞌe pela nakakala lakou la ehamaoni.

⁸ Kena Paul eme aꞌe nakama la, “Anau sehaisala i kevahi nakuaa na{Jiu}, i kevahi hale kapu, ia i kevahi kekuꞌu hamakua kela i Rome.”

⁹ Ia Festus ehihai pela nakama hamakua na{Jiu} la ihihia, kena ime aꞌe Paul, “Aꞌoe eaunahie kehaele i Jerusalem imea anau ihakonu aꞌoe ilaa?”

¹⁰ Ia kena Paul eme aꞌe, “Okou ehakonu konu mai anau i kevahi nakuaa kekuꞌu haRome. Kena okou soꞌokou ekau kehakonu konu anau. Aꞌoe emakino laoi pela anau sepena namesala i kevahi na{Jiu} la.

¹¹ Koaꞌe anau ipena kemea saꞌino, kena anau eaunahie kemake oia. Ia amea nakakala na{Jiu} la esehamaoni, selavaa hekama kehai mai anau. Ia anau ehihai kekuꞌu haRome soia ihakonu anau.”

¹² Festus ma nakama hakonu konu la ekakala solakou, kena kama la eme aꞌe Paul, “Aꞌoe ehihai kekuꞌu i Rome la ihakonu aꞌoe, ia kena aꞌoe meihaele nomaka kama la.”

Paul ekuu imua kekuꞌu Agrippa

¹³ Kela heaho, kekuꞌu Agrippa laua ma keꞌavana aia la Bernice uo namaka Festus i Caesarea.

¹⁴ Koꞌolua la enoho ilaa elava naaho, kena Festus ume aꞌe kekuꞌu la kehakonu konu Paul la. “Felix ekiaꞌi kelaa kanaka nonoho i kelokapu.

¹⁵ Keualoko anau nihaele nokae i Jerusalem, namaakua hamakua, ma nakama hamakua na{Jiu} la ehai aꞌe kama la, kena iainoa mai anau ihakonu konu kama la.

¹⁶ “Ia anau eme aꞌe nakama la, ‘Esala ma nakipukipu makou nakama i Rome iau aku kanaka la. Kama la ekau kekuu imua okou, ihakonu hea okou ehai aꞌe i aia la.’

¹⁷ Keualoko makou nikae mai inei, anau senase, anau ukaohi nohakonu kanaka la i kela aho. Anau eanaa aꞌe alakama hakonu konu la iꞌuku makou, kena ime aꞌe napulepule la ihakaꞌi mai kama la.

¹⁸ Ia keualoko na{Jiu} la nimasiꞌe nokakala, anau ehakaꞌoko ma nakama la mehaꞌali mai namea kanaka la epena esala.

¹⁹ Ia nakama la ekakala mai nakipukipu kehakina lakou la oia. Pela hekama emale ma Jesus nimake. Ia Paul emea pela Jesus eola oia.

²⁰ Anau seailoa i kesee kehamaoni namea nei. Kena anau evasili aꞌe ia Paul poi aia ehihai ihaele i Jerusalem, ihakonu lia aia ilaa.

²¹ Ia Paul ehihai maia inoho i Caesarea. Kama la hihai kekuꞌu haRome la ihakonu aia. Kena anau elolosi kanaka la ikae saika anau mehaunalia kama la nomaka kekuꞌu la.”

²² Agrippa eme aꞌe Festus, “Anau hihai ihalono kama na hoi.” Kena Festus eme aꞌe, “Kaiao, aꞌoe ame lono nakakala kama la.”

²³ Kela aho Agrippa laua ma Bernice uhasula aꞌe iloko kehale elahi hakonu konu la. Koꞌolua la eo aꞌe ma nakama hananiu kemakaꞌina Caesarea, ia ma nakama hananiu napulepule la. Kena Festus ume aꞌe napulepule la ihakaꞌi aꞌe Paul i hale.

²⁴ Kena Festus ukakala ma, “Kekuꞌu Agrippa ma nakama enoho haꞌuku mai i nei la. Okou eꞌike kama nei. Na{Jiu} hakoa i Jerusalem ma Caesarea uo mai nome mai anau pela kama nei sekau keola.

²⁵ Ia anau sehimea elave ikeme pela kama nei imake. Ia kama nei eainoa pela aia hihai kekuꞌu haRome ihakonu aia. Ia kena anau hakaꞌoko ihaunalia kama nei imaka kekuꞌu la.

²⁶ Ia anau sehimea esala elave kekakaa iꞌave kekuꞌu anau la. Ia kena anau ehakuu kama nei imua okou hakoa. Kaohi mua aꞌoe kekuꞌu Agrippa. Anau meilaulahu kama nei, imakino hea anau mekakaa iave kekuꞌu la.

²⁷ Anau ehakaꞌoko pela sekonu keꞌave kama nei i Rome, amea anau sekakaa konu hea kama nei esala.”