Acts 18 - Luaniua New Testament

Paul iloko Corinth

¹ Kela aho Paul ukiaꞌi Athens, kena ihaele nokae Corinth.

² Kama la ekili kekama ha{Jiu} la, kanamale Aquila. Aquila ehanau iho iloko Pontus. Vahola, Aquila ma keꞌavana aia la Priscilla ekaꞌa ikaha ma Italy nokae i Corinth. Maikinimea kekuꞌu Claudius emea ma na{Jiu} la hakoa ikaꞌa ikaha ma Rome. Kena Paul uhaele nomaka koꞌolua la,

³ kena inoho lakou noheaꞌu hakoa. Koꞌolua la nikama penapena nakama hale kapolo, poi aia la hoi.

⁴ Naaho kapu la hakoa, Paul ekakala iloko hale loku na{Jiu} la ipolopolo aꞌe na{Jiu} lakou ma nakama haGreek la.

⁵ Silas laua ma Timothy eo mai i Macedonia. Keualoko la, Paul ekaukaꞌu kahi nakakala Keakua iaoaꞌo aꞌe na{Jiu} la pela Jesus o keMesaea.

⁶ Ia nakama la sehihai hea Paul ekaukaꞌu la, kena ikakala lihu aꞌe i aia. Kena iko Paul ilulu nalehu emau nauꞌahu aia la ikaha, iko ime aꞌe nakama la, “Kena hesala okou soꞌokou oia. Anau sepena namesala. Vahonei, anau mehaele nokakala aꞌe nakama enoho pouli la oia.”

⁷ Paul ukiaꞌi hale loku na{Jiu} la, kena ihaele iloko hale kehale Titius Justus, hekama kela ehamalumalu Keakua. Kehale kama la ekuu aso aꞌe i kehale loku na{Jiu} la.

⁸ Kela hekama ehamakua i kehale loku na{Jiu} la, kanamale Crispus. Kama la ma haleaina aia la ehakina hakoa i Kealiꞌi. Kena komaꞌi nakama kemakaꞌina Corinth elono nakakala Crispus, kena ihakina Kealiꞌi hoi. Ia kena nahakina ana la ehaauꞌau kapu nakama kela ehakina la.

⁹ Kulana kepo, Paul uꞌike Kealiꞌi ehakumaka aꞌe i aia, kena ime aꞌe, “Aꞌoe isemakaꞌu. Kauhano kekakala aꞌe keonohenua la. Aꞌoe senoho semuu.

¹⁰ Maikinimea anau ekaꞌa maꞌoe. Selavaa hekama kehai haeꞌo kia aꞌoe, maikinimea keonohenua anau ekomaꞌi iloko kemakaꞌina nei.”

¹¹ Kena Paul enoho ilaa hekau hokahi, eono namalama, iaoaꞌo aꞌe keonohenua la nakakala Keakua.

Paul ekuu imua Gallio

¹² Keualoko Gallio nihamakua i Greece, na{Jiu} la ehaꞌuku hakoa, kena ikaohi Paul iꞌave imua nakama hakonu konu la,

¹³ kena imea aꞌe, “Kama nei ekaoleole aꞌe keonohenua la ihamalumalu Keakua i nakipukipu kela sekonu ma nakuaa makou.”

¹⁴ Keualoko Paul eꞌamaka ma ikakala, Gallio ekuu vamua Paul, kena ikakala aꞌe na{Jiu} la penei, “Apoi okou ehakaukau i namesala, anau mekau kehalono aku okou.

¹⁵ Ia poi okou ehakaukau i nakakala okou ma namale okou, ia ma nakuaa okou la oia. Kena anau sehihai kehakonu namela. Hevahi okou soꞌokou ihakonu namela.”

¹⁶ Ia kena Gallio uhaise nakama la io ikaha ma kehale hakonu konu la.

¹⁷ Kena napulepule aia la ukaohi Sosthenes, kekama hamakua kehale loku na{Jiu} la, kena ilili kia kama la imua namaisu nakama hakonukonu la. Ia Gallio usehakekele kama la.

Paul uvaꞌai nokae i Antioch

¹⁸ Paul enoho iloko Corinth elava naaho. Kena Priscilla laua ma Aquila ekaꞌa ma Paul, nokae i Cenchrea. Paul ekuu keloulu aia, ihuli aꞌe pela aia emea kakala hamaoni ma Keakua. Kena nakama la eꞌae kevaꞌa nohaele i Syria,

¹⁹ kena ihulo nokae Ephesus. Kena Paul ukiaꞌi Priscilla laua ma Aquila, kena ihaele iloko kehale loku na{Jiu} la, noaoaꞌo aꞌe nakama la.

²⁰ Nakama la eainoa aꞌe Paul inoho ma lakou, ia kama la sehihai.

²¹ Keualoko Paul ukiaꞌi nakama la, kama la ime aꞌe, “Poi Keakua ehihai, anau mevaꞌai mai.” Ia kena Paul euhu ikaha ma Ephesus,

²² kena ihulo nokae Caesarea. Kama la ehaele nokakala hakaualeꞌa nakama keloku la, kena ihaele nokae i Antioch.

²³ Paul enoho iloko Antioch kama saika oia, kena ihaele valoko Galatia ma Phrygia, ihapulupulu aꞌe nakama kaukali Jesus la.

Apollos

^24-25 Kela hekama na{Jiu} ehanau mai i Alexandria, kanamale Apollos. Kama la emakino laoi kekakala, ia iaoaꞌo nakakala kelauniu kapu ma namahi aia. Alakama niaoaꞌo aꞌe Apollos namakeala Kealiꞌi. Kena kama la ehai namahi aia kekakala konu nakipukipu Jesus noaoaꞌo alakama. Ia kama la eailoa kehaauꞌau kapu John Baptist la oia. Apollos ehaele nokae Ephesus,

²⁶ kena isemakaꞌu kekaukaꞌu iloko hale loku na{Jiu} la. Ia keualoko Priscilla laua ma Aquila nilono kama la, koꞌolua la ekakala hamakahua aꞌe kama la nakipukipu Keakua.

²⁷ Saika la, Apollos ehihai ihaele valoko Greece. Keakua elolosi hakaualeꞌa nakama henua la ihakina i aia. Kena nahakina ana iloko Ephesus ehapulupulu aꞌe Apollos ihaele Greece, kena ikakaa kelauniu iꞌave nakama ehakina Jesus iloko Greece la, iainoa nakama la iko lia halaoi Apollos. Kena Apollos uhaele nokae keꞌina la nokonaꞌi nakama la.

²⁸ Apollos ehakauoki ma na{Jiu} la imua namaisu keonohenua la, kena iaoaꞌo nakakala kelauniu kapu ihuli aꞌe kehamaoni pela Jesus o keMesaea.