Acts 15 - Luaniua New Testament

¹ Alakama na{Jiu} la uo ikaha ma Judea nokae i Antioch. Nakama la aoaꞌo nahakina ana la penei, “Okou ihamakino nakapukapu okou ikaukali nakipukipu Moses. Aoki Keakua mesekonaꞌi okou.”

² Kena Paul laua ma Barnabas ehakauoki ma nakama la. Ia kena nahakina ana la ekini Paul laua ma Barnabas io ma alakama keloku la nokaꞌa i Jerusalem, novasili aꞌe nakama heheaꞌu Jesus la ia ma alakama hamakua keloku hoi.

³ Kena nahakina ana la ehaunalia koꞌolua la ikaꞌa valoko Phoenicia laua ma Samaria, nokakala aꞌe nakama keloku la pela nakama enoho pouli la uhakina hamaoni. Ia kena nahakina ana la uhihia lo.

⁴ Keualoko Paul ma nakama Antioch la ukae i Jerusalem, nahakina ana ma nakama heheaꞌu Jesus ia ma nakama hamakua keloku la ehihia noko lia halaoi nakama la. Kena nakama la eme aꞌe nakama Jerusalem la namea Keakua ehuli aꞌe iloko naola lakou la.

⁵ Ia naFarasi iloko nahakina ana la eme aꞌe, “Okou ekau kehamakino nakama enoho pouli la, kena upolopolo aꞌe nakama la ikaukali nakuaa Moses.”

⁶ Kena nakama heheaꞌu Jesus ma nakama hamakua keloku la uꞌuku isesee hakaꞌoko kela naFarasi la nime aꞌe lakou.

⁷ Keualoko nakama la ekakala nahakaꞌoko lakou nooki, Peter umasiꞌe iluna nokakala aꞌe nakama la, “Aukaina. Okou emakino pela Keakua ekini anau imua lo, ikakala kelono kaualeꞌa aia ilono nakama enoho pouli la ihakina.

⁸ Keakua eailoa nakipukipu nakama hakoa. Kama la eau aꞌe Keanana Kapu i nakama enoho pouli la, poi aia niau mai kakou imua la. Kena ihuli aꞌe pela aia ehihai nakama la hoi,

⁹ ia sesapai kakou sokakou oia. Nakama la ehakina Keakua hoi, kena Keakua esolo nahakumanava lakou nomakahua.

¹⁰ Okou naFarasi sekau kehaꞌike Keakua. Okou ehihai ihapili aꞌe namea emaha iamo nahakina ana sehi{Jiu} la. Ia kakou na{Jiu} ma nakipuna kakou la uselavaa keamo namea emaha la.

¹¹ Kakou ehakina pela Kealiꞌi Jesus Christ elolosi hakaualeꞌa kakou ikonaꞌi kakou iola, ihau poi kama la ekonaꞌi nakama enoho pouli la hoi.”

¹² Kena keonohenua la hakoa unoho semuu, nohalono Barnabas laua ma Paul. Koꞌolua la ekakala aꞌe namea kaualeꞌa ma nahaꞌaku laua ehuli aꞌe i namahi Keakua iloko naꞌina nakama enoho pouli la.

¹³ Keualoko Barnabas laua ma Paul nikakala nooki, James ume aꞌe,

¹⁴ “Aukaina. Halono mai i anau. Simon Peter ekakala mai kakou pela Keakua elolosi nakama enoho pouli la, kena ihilihili alakama nakama la imea mo onohenua aia.

¹⁵ Nakakala Peter la ehau poi nakakala kela alakama ehakae nakakala Keakua nikakaa imua,

¹⁶ ‘Imuli, anau meivaꞌai mai, nohakuu halaoi kehale David kela usina. Anau meipena muli kehale la i nahaku kela emaseu la oia, Nohakuu hale la iluna.

¹⁷ Kena naonohenua meisesee Kealiꞌi, Ia nakama enoho pouli la meihamalu mai anau. Anei nikakala Keakua, kekama kela ehuli mai namenei,

¹⁸ Poi aia nihakaꞌoko mai imua.’ ”

¹⁹ Kena James eme aꞌe hoi, “Anau sehihai pela nakama enoho pouli la ihainakaa keo mai nokaukali Keakua.

²⁰ Ia penei avale, kakou ekau kekakaa helauniu, ipolopolo aꞌe nakama la. Pela lakou sekau keꞌai naꞌai kela alakama ehoꞌi aꞌe nahakipua la. Keꞌai la esaꞌino. Nakama la sekau keꞌalemaka ailalao alakama. Ia esekau hoi keꞌai namanu emake kekoko la oimoe iloko.

²¹ Na{Jiu} i namakaꞌina hakoa epolopolo kahi nakuaa Moses nei. Kena ipaupau nakakala nei iloko nahale loku lakou, i naaho kapu hakoa.”

Kelauniu la ekae i nahakina ana kela enoho naꞌina emao

²² Nakama heheaꞌu Jesus, ma nakama hamakua keloku, ia ma nahakina ana la hakoa ehakaꞌoko ihilihili nikama, io lakou ma Paul laua ma Barnabas nokaꞌa i Antioch. Nakama la ekini Judas Barsabbas laua ma Silas. Koꞌolua la nikama hamakua nahakina ana la,

²³ kena nakama la ehaunalia koꞌolua la noau aku kelauniu nei, “Makou nakama heheaꞌu Jesus ia ma nakama hamakua keloku ekakaa kelauniu nei iau aku okou nahakina ana kela enoho i nahenua emao, iloko Antioch, Syria ma Cilicia. Aukaina.

²⁴ “Makou elono pela alakama makou inei ekakala hanapa aku i okou. Ia makou sehaunalia aku nakama la.

²⁵ Kena makou hakoa ehakaꞌoko ihilihili nikama io aku lakou ma Paul laua ma Barnabas, nasoa laoi kakou la.

²⁶ Nakama nei ehoꞌi naola lakou ikaukali Jesus Christ, Kealiꞌi kakou la.

²⁷ Kena makou ehaunalia aku Judas laua ma Silas, ime aku okou nakakala makou ekakaa nei.

²⁸ Makou ehakaꞌoko pela Keanana Kapu sehihai okou ihapili namea emaha noamo. Kena okou ekau kekaukali nakipukipu nei oia.

²⁹ Seꞌai naꞌai kela alakama ehoꞌi aꞌe nahakipua. Seunu kekoko, ia seꞌai namanu emake, ia kekoko la oimoe iloko. Ia seꞌalemaka ailalao alakama. Kaualeꞌa pela okou ikuu ikaha ma nakipukipu la. Kena ia.”

³⁰ Nakama la uo ikaha ma Jerusalem, kena io nokae i Antioch, kena ime aꞌe nakama keloku la iꞌuku hakoa, kena iau aꞌe kelauniu la.

³¹ Keualoko nahakina ana la epau kelauniu la, nakama la uhihia nakakala hapulupulu la.

³² Silas laua ma Judas nikama hakae nakakala Keakua hoi. Kena koꞌolua la ekakala kahi aꞌe nahakina ana la ihapulupulu nakama la.

^33-34 Kena kela aho, nahakina ana la ehakapu Judas laua ma Silas inoho laoi, kena ihaunalia koꞌolua la ivaꞌai muli i nakama keloku i Jerusalem.*f10*

³⁵ Ia Paul laua ma Barnabas oinoho i Antioch isuꞌui ma nahakina ana la nokaukaꞌu keonohenua, kena iaoaꞌo nakama la nakakala Kealiꞌi.

Paul laua ma Barnabas uvaea

³⁶ Kela heaho Paul eme aꞌe ia Barnabas, “Imua, kaua nio nokaukaꞌu nakakala Kealiꞌi iloko namakaꞌina komaꞌi. Kena kakou ekau kevaꞌai muli i namakaꞌina la hakoa nomaka nahakina ana la, imakino kaua pela naola lakou eme pehe.”

³⁷ Barnabas ehihai iko John Mark io lakou hoi.

³⁸ Ia John Mark ukiaꞌi koꞌolua la i Pamphylia, seo lakou. Kena Paul eꞌila pela sekonu keko kama la.

³⁹ Kena Paul laua ma Barnabas uhakauoki novae solaua. Kena Barnabas eko Mark nohulo laua i Cyprus.

⁴⁰ Ia Paul ekini Silas ihaele maia. Kena nahakina ana iloko Antioch eloku aꞌe Keakua ilolosi hakaualeꞌa koꞌolua la.

⁴¹ Kena koꞌolua la uo valoko Syria ma Cilicia nohapulupulu nahakina ana la.