Acts 11 - Luaniua New Testament

Peter uvaꞌai nokae i Jerusalem

¹ Nakama heheaꞌu Jesus ma nahakina ana iloko Judea la ulono pela nakama sehi{Jiu} la uhalono nakakala Keakua.

² Ia keualoko Peter ukae Jerusalem, alakama na{Jiu} la ehai aꞌe Peter penei,

³ “Aꞌoe sekau kenoho iloko nahale nakama enoho pouli, kena iꞌai ma nakama la.”

⁴ Kena Peter uꞌamaka nokakala aꞌe nakama la hea eapihi aꞌe i aia.

⁵ “Saika anau ninoho iloko kemakaꞌina Joppa, anau eloku, kena uisi keꞌike hakaꞌoko anau. Anau uꞌike kemea ehau poi kaona elahi ehaele iho i kevaelani. Kemela ekaohi lia namaka ehaa la, nohamau kapili mai anau.

⁶ Kulana anau ehakiu iloko kemela, anau eꞌike komaꞌi napoi, namanu leikama, namoꞌo, ia ma namanu lelele la.

⁷ Ia kena anau elono keleo eme mai anau, ‘Peter. Kuu iluna nokaa nimanu noꞌai.’ ”

⁸ “Kena anau eme aꞌe, ‘Seai Kealiꞌi. Anau selavaa keꞌai naponohi saꞌino la.’

⁹ “Kena keleo la eme iho i kanahasiaoa ikaha ma kevaelani, ‘Kulana Keakua ekapa kemea kaualeꞌa, aꞌoe sekapa kemela saꞌino.’

¹⁰ Kemenei eapihi mai koukolu naualoko, ia kena namea la hakoa uko lia novaꞌai muli i kevaelani.

¹¹ “Saika la, koꞌokolu nakanaka ukae aꞌe kehale anau ninoho la. Kama hamakua lakou la uhaunalia lakou ikaha ma Caesarea nokae mai i anau.

¹² Keanana Kapu ume mai anau ikaꞌa ma nakama la, ia sehakekele. Koaono nahakina ana la eo manau nokae kehale kama hamakua la.

¹³ Kena kama la eme mai makou maia eꞌike ke{enselo} ekuu iloko hale kehale aia la. Ke{enselo} la eme aꞌe kama hamakua la, ‘Haunalia nikanaka nokaꞌa kemakaꞌina Joppa, nome aꞌe Simon Peter ihamai.

¹⁴ Kama la meikakala aku okou, ikonaꞌi aꞌoe ma nahaleaina aꞌoe la iola.’

¹⁵ “Keualoko anau niꞌamaka nokakala, Keanana Kapu ukau iloko nakama la, ehau poi aia nikau iloko kakou i keꞌamaka la hoi.*f7*

¹⁶ Ia kena anau umanaku nakakala Kealiꞌi, ‘John ehaauꞌau kapu keonohenua i kevai, ia Keakua meihaauꞌau kapu okou i Keanana Kapu.’

¹⁷ Keakua eau aꞌe kehoꞌi Keanana Kapu i nakama la, ehau poi aia niau mai kakou keualoko kakou uhakina i Kealiꞌi Jesus Christ. Anau selavaa kepui Keakua isehuli aꞌe namahi aia la.”

¹⁸ Keualoko na{Jiu} la elono nakakala nei, nakama la uhamoku kehakauoki lakou la, ihamaha i Keakua, ia kena ikakala ma, “Keakua ukonaꞌi nakama enoho pouli la hoi ikiꞌe ikaha ma nahaisala lakou iola hamaoni.”

Nahakina ana i Antioch iloko Syria

¹⁹ Keonohenua la ehai haeꞌo kia nahakina ana iloko Jerusalem hoi. Ia kena nahakina ana la umaseu nokaꞌa valoko Phoenicia, Cyprus, ia ma kemakaꞌina Antioch iloko Syria. Ia nakama la ekakala kelono kaualeꞌa la i na{Jiu} la oia.

²⁰ Ia alakama i Cyprus ia ma kemakaꞌina Cyrene esuꞌui ma nahakina ana la, kena ikaꞌa nokae Antioch nokaukaꞌu aꞌe nakama haGreek la nakipukipu Kealiꞌi Jesus.

²¹ Namahi Keakua enoho ma nakama la. Kena komaꞌi kekama uhakina, kena ikaukali Kealiꞌi.

²² Nahakina ana iloko Jerusalem la ulono pela komaꞌi nakama Antioch uhakina. Kena nakama la uhaunalia Barnabas

²³ nokae kemakaꞌina la. Kena kama la eꞌike pela Keakua elolosi hakaualeꞌa nahakina ana la. Ia kena kama la uhihia lo. Barnabas ehako aꞌe nakama la ikaukali Kealiꞌi, ia ikaohi mau nahakina lakou la.

²⁴ Barnabas hekama kaualeꞌa ehakina hamaoni, ia Keanana Kapu enoho iloko kama la. Ia kena komaꞌi nakama ukaukali Kealiꞌi.

²⁵ Barnabas uhaele i Tarsus nosee ia Saul.

²⁶ Barnabas elave kama la, kena ihakaꞌi kama la nonoho laua iloko Antioch. Hekau la hakoa, koꞌolua la ekili ma nakama keloku la, kena iaoaꞌo komaꞌi nakama. Keonohenua iloko Antioch la uꞌamaka nokapa nahakina ana la pela Nikama Christ.

²⁷ Keualoko la, nakama hakae nakakala Keakua la eo aꞌe ikaha ma Jerusalem nokae i Antioch.

²⁸ Kela hekama esuꞌui ma nakama la, kanamale Agabus. Kama la ehakakae nakakala Keanana Kapu, emea ma keone meikoha iloko kemaalama nei hakoa. (Keone la ukae mai keualoko kekuꞌu Claudius nihamakua.)

²⁹ Nahakina ana la ehakaꞌoko pela ikonaꞌi nahakina ana kela enoho i Judea. Kama ma kekama ehoꞌi aꞌe hea ekau maia.

³⁰ Ia kena nakama la ehaunalia Barnabas laua ma Saul noꞌave nahoꞌi lakou la i nakama hamakua keloku i Judea.