3 John 1 - Luaniua New Testament

¹ Anau hekama hamakua keloku, ekakaa kelauniu nei i aꞌoe, Gaius. Kausoa, anau elaoi hamaoni aꞌoe.

² Kausoa. Anau eloku pela kinokama aꞌoe meikaualeꞌa, ia pela keola aꞌoe la hakoa mekuku laoi. Ehau poi keola keanana aꞌoe la ekaualeꞌa.

³ Anau ehihia lo kulana alakaina kakou eo mai nome mai pela aꞌoe ekaukali hamaoni Keakua.

⁴ Keualoko anau elono pela nakamaliꞌi anau la ekaukali hamaoni kama la, anau ehihia haimahi lo.

John ehamaha Gaius

⁵ Kausoa. Niaina aꞌoe semakino nahakina ana la hakoa, aꞌoe ekonaꞌi kahi nakaina kakou i keloku la.

⁶ Kena nakama la ekakala aꞌe alahakina ana la pela aꞌoe elaoi lakou. Ame kaualeꞌa pela aꞌoe ikanakana hakaio ma lakou, ikau ma nakama kela eheheaꞌu ma Keakua la.

⁷ Maikinimea nakama la eo noheheaꞌu ma kama la, ia seainoa aꞌe nakama enoho pouli la ikonaꞌi lakou.

⁸ Kakou ikau kekonaꞌi nakama la, imea kakou hakoa isuꞌui hamaoni i naheheaꞌu nakama la.

Diotrephes ma Demetrius

⁹ Anau ekakaa kelauniu la noꞌave nakama keloku la. Pela Diotrephes sehihai makou, maikinimea kama na ehihai ihamakua soia.

¹⁰ Kulana anau meihaele aku la, anau meimanaku pela Diotrephes ekamumu haeꞌo makou, ia epena komaꞌi name sala. Kelaa mea hoi. Kama la seko nakaina kakou keloku la. Ia kama la epui nahakina ana kela ehihai iko nakama la, kena ihaise nahakina ana la ikaha ma keloku.

¹¹ Kausoa. Au sekaukali hea saꞌino. Emeia aꞌoe ikaukali hea kaualeꞌa. Kekama kela epena namea kaualeꞌa, kena hekama Keakua. Ia kekama kela epena namea saꞌino la, kama la semakino laoi nakipukipu Keakua.

¹² Nakama hakoa emea pela ma Demetrius ekaukali kehamaoni. Niaina Keakua ma makou ekakala pela hoi. Kena aꞌoe makino pela nakakala makou la ehamaoni.

Kakala hihia

¹³ Anau kamaꞌi kemea meikakaa aku i okou. Ia anau ame sekakaa aku kelaa launiu.

¹⁴ Anau hihai iꞌike vave okou ikakala maꞌokou.

¹⁵ Okou inoho laoi. Nasoa kakou inei eau aku kehihia lakou. Au aꞌe kehihia anau i nakama kakahi kela i nasoa kakou ilaa la.