2 Timothy 2 - Luaniua New Testament

Kipukipu nakama kaukali Jesus Christ

¹ Kena kaukama, aꞌoe ihaiviivi, maikinimea Keakua elolosi hakaualeꞌa aꞌoe isuꞌui ma Jesus Christ.

² Aꞌoe nilono kekaukaꞌu anau, ia komaꞌi nakama elono nakakala anau la hoi. Aꞌoe ipolopolo aku keaoaꞌo na i nakanaka kela ehakina hamaoni la. Kena nakama la elavaa i keaoaꞌo alakama hoi.

³ Aꞌoe ihavalekoa kehalono lihu, poi hepulepule kaualeꞌa Jesus Christ.

⁴ Kepulepule la sehakekele nakakala nakama kela sevuhu kaua la. Emeia kama la ehalono kama hamakua aia la, pela imea kama la ihihia i nakipukipu aia la.

⁵ Ia pena hekama ehihai imua haiva la, kama la elavaa kemua, amea kama la ekaukali nakipukipu kenasolo.

⁶ Kekama heheaꞌu iloko paupaꞌu aia la ekau keko mua kuhana aia la noꞌai.

⁷ Aꞌoe ihakaꞌoko hakaualeꞌa hea anau ekakala aku i aꞌoe, maikinimea Kealiꞌi elavaa kekonaꞌi aꞌoe iailoa namenei hakoa.

⁸ Manaku pela Jesus Christ ehanau mai iloko haleaina David. Kena kama la emasiꞌe ikaha ma kemake. Kenei kelono kaualeꞌa anau ekaukaꞌu.

⁹ Kela hea anau esaisai lia na{seni}, kena anau ehalono lihu, ehau poi hekama haisala. Ia sehikama elavaa kesaisai nakakala Keakua la.

¹⁰ Ia kena niaina anau ehalono lihu, anau ekauhano kekakala oia. Pela Keakua ame konaꞌi nakama aia ehilihili la. Kena nakama la meisuꞌui ma Jesus Christ, noola naualoko hamau i kemalama ialuna.

¹¹ Nakakala nei ehamaoni, “Penaa kakou emake ma kama la, kakou meiola muli ma kama la hoi.

¹² Penaa kakou ekauhano kekuu mau, kakou meinoho nohamakua ma kama la hoi. Ia penaa kakou epula pela kakou semakino i aia, Kena kama la meipula pela aia semakino kakou hoi.

¹³ Niaina kakou sekaohi mau kama la, kama la meikauhano nokaohi mau kakou oia, maikinimea kama la selavaa kekiaꞌi nakipukipu aia la.”

Kekama heheaꞌu kela Keakua ehihai

¹⁴ Aꞌoe ikauhano keme aꞌe nahakina ana la imanaku keaoaꞌo nei. Ia aꞌoe ikakala hamakaꞌu aku nakama na imua namaisu Keakua isepuꞌua hakaukau. Kipukipu kehakaukau na sekonaꞌi nakama kela elono la, ia elavaa ikeseu nahakina lakou la.

¹⁵ Hai omahi pela Keakua meihihai keheheaꞌu aꞌoe la. Aꞌoe iaoaꞌo konu nakakala hamaoni Keakua, kena aꞌoe meisenapa i namaisu aia.

¹⁶ Aꞌoe isekakala vale poi nakama kela sehamalumalu Keakua. Nakama la oinoho pouli oia.

¹⁷ Nakakala nakama la ehau poi hesanuꞌu kela ehanolahi. Ehau poi nakakala Hymenaeus laua ma Philetus.

¹⁸ Koꞌolua na ukiaꞌi nakakala hamaoni. Kena ime aꞌe pela nakama umake la namasiꞌe avale ikaha ma kemake. Kena nakama la eseu nahakina alakama.

¹⁹ Ia niaina emea penei, namea Keakua epena la ekuu mau. Poi hea nakakala nei eme aꞌe, “Kealiꞌi emakino nakama aia la.” Kela mea hoi, “Nakama la eme aꞌe pela Kealiꞌi ehamakua lakou, kena ikiaꞌi nakipukipu saꞌino la.”

²⁰ Komaꞌi na{pesoni} ekaꞌoko iloko nahale elahi. Na{pesoni} pahaku mea, ia ma na{pesoni} pahaku iva. Ia naumeke ekaꞌoko ilaa hoi. Nakama kehale la ehakaꞌoko maha na{pesoni} kaualeꞌa, ia ehakaꞌoko pela naumeke nimea vale oia. Nakipukipu okou eme pela hoi.

²¹ Penaa okou ekiaꞌi nakipukipu vale, kena Keakua meihakea naola okou. Kena ikanakana okou ipena naheheaꞌu kaualeꞌa, pela okou meikau kepena namea Kealiꞌi ehihai la.

²² Aꞌoe isemanaꞌo namea kela nakama oikipu aꞌe hihai la. Emeia aꞌoe ikaukali nakipukipu ekonu, nohakina Keakua, laoi alakama, ia nonoho hakaualeꞌa ma nakama hakoa. Alakama ekaukali nakipukipu la hoi. Nahakumanava lakou la emakahua lo, ia kena nakama la eloku aꞌe Kealiꞌi.

²³ Ia aꞌoe isehalono nakakala evale kela seisi kehakaꞌoko la. Aꞌoe emakino pela alakama ehakekele nakakala na, kena ihakaukau kahi.

²⁴ Ia kekama heheaꞌu ma Kealiꞌi sekau kepuꞌua hakaukau. Emeia kama la ikau kenoho pasemuu ma nakama hakoa, kena imakino laoi keaoaꞌo alakama, ia selokoloko nahie.

²⁵ Ia kama la ekau kemasemu nopolopolo nakama kela ehakauoki i keaoaꞌo aia la. Ia kena Keakua meikonaꞌi nakama la iui ikaha ma nahaisala lakou, kena iailoa laoi kehamaoni,

²⁶ kena iailoa laoi hoi kehasao ikaha ma kaiꞌi Satan. Ia vahonei, Satan ekaohi mau nakama la, ipena hea aia hihai la.