2 Timothy 1 - Luaniua New Testament

¹ Anau Paul. Keakua ehaunalia anau iheheaꞌu ma Jesus Christ ikaukali kehakaꞌoko aia. Keakua ekakala mai kehamaoni pela nakama hakoa kela esuꞌui ma Jesus Christ meiola kahi.

² Anau ekakaa aku kelauniu nei i aꞌoe Timothy. Kaukama, anau elaoi aꞌoe. Keakua Kamana kakou la, ia ma kakou Aliꞌi Jesus Christ, ialoha aku aꞌoe, ia ilolosi hakaualeꞌa aꞌoe inoho laoi.

Kekama keloku selavaa inapa i kelono kaualeꞌa

³ Anau ehamaha i Keakua. Anau eheheaꞌu ma kama la, ia emakino pela keola anau ekonu, ehau poi nakipuna anau imua la hoi. Anau eloku aꞌe Keakua keaho ma kepo, ia anau emanaku i aꞌoe.

⁴ Anau emanaku pela aꞌoe ekani kani. Ia kena anau hihai imaka aꞌoe, imea anau ihihia.

⁵ Anau ehakaꞌoko muli kehakina hamaoni aꞌoe la. Kipuna aꞌoe Lois ia ma kina aꞌoe Eunice ehakina pela hoi. Ia anau emakino pela aꞌoe ehakina ehau poi koꞌolua la.

⁶ Keualoko anau nihapili nalima anau iluna aꞌoe, Keakua eau aku kehoꞌi aia. Kena anau eme aku aꞌoe ihai omahi ihuli aꞌe namahi kehoꞌi Keakua la.

⁷ Keakua seau mai Keanana Kapu ihamakaꞌu kakou. Seai. Emeia Keakua eau mai namahi Keanana Kapu la ihapulupulu kakou ilaoi alakama, ia ikuꞌu konu naola kakou.

⁸ Aꞌoe senapa kekakala aꞌe alakama nakipukipu kakou Aliꞌi. Anau epono kia i kelokapu, maikinimea anau heheaꞌu ma kama la, ia aꞌoe isenapa i anau. Kakou ame halono lihu maikinimea kakou ekaukaꞌu kelono kaualeꞌa Keakua i namahi aia.

⁹ Ia Keakua ekonaꞌi kakou iola, kena ianaa kakou ihakea naola kakou. Ia kama la sehakekele namea kaualeꞌa kakou epena. Kama la ehakaꞌoko imua lo kelolosi hakaualeꞌa kakou, nakama kela esuꞌui ma Jesus Christ.

¹⁰ Jesus ehamai nohuli mai kelono kaualeꞌa nokonaꞌi kakou iola. Kama la eseu namahi kemake, kena ehuli mai nakipukipu keola eola kahi la.

¹¹ Keakua ekini anau ikaukaꞌu nakakala aia, kena ihaunalia anau iheheaꞌu maia, iaoaꞌo aꞌe naonohenua la.

¹² Kela hea anau ehalono lihu. Ia anau senapa. Anau emakino pela anau ehakina hamaoni Keakua, kena iau aꞌe kama la keola anau, ilolosi aia. Anau eailoa pela kama la elavaa kelolosi hakaualeꞌa keola anau la, hanokae keaho haoki.

¹³ Aꞌoe ilolosi hakaualeꞌa nakakala kela anau nime aku la. Kena polopolo aku alakama nakakala hamaoni na. Aꞌoe esuꞌui ma Jesus Christ, kena hakina hamaoni kama na, ia laoi alakama.

¹⁴ Kena lolosi kelono kaualeꞌa Keakua la i namahi Keanana Kapu kela enoho ma kakou la.

¹⁵ Aꞌoe emakino pela Phygelus laua ma Hermogenes ia ma nakama enoho iloko Asia la ukiaꞌi anau.

¹⁶ Ia anau ehihai Kealiꞌi ilolosi haleaina Onesiphorus, maikinimea kama la ekonaꞌi kahi anau ihihia. Niaina anau esaisai lia na{seni}, kama la senapa i anau.

¹⁷ Kulana Onesiphorus nikae mai i Rome, kama la ehamai nosesee anau, kena elave anau.

¹⁸ Ia aꞌoe makino pela kama la ekonaꞌi anau iloko Ephesus hoi. Anau eainoa aꞌe Kealiꞌi ialoha aꞌe kama la i keaho haoki la.